ශ්රී ලංකා නාවික හමුදා ක්රීඩා සමාජයට එරෙහිව ලකුණු 39-33ක සටන්කාමී ජයක් වාර්තා කිරීමට පළමු වරට අන්තර් සමාජ පළමු පෙළ ලීග් රග්බි පිටියට එක්වී සිටින ශ්රී ලයන්ස් ක්රීඩා සමාජය ඊයේ සමත් විය.
වැලිසර නාවික හමුදා ක්රීඩා පිටියේ පැවති මේ තරගයේ පළමු භාගය නිමා වනවිට ලකුණු 39-7කින් පෙරමුණ ගැනීමට ශ්රී ලයන්ස් පිල සමත්වූ අතර, දෙවැනි භාගයේදී ආක්රමණශීලී ක්රීඩා රටාවක නිරත වූ නාවික හමුදා පිල අවසන් මිනිත්තුව වන විට ලකුණු පරතරය 33-36ක් ලෙස අවම කරගනිමින් ශ්රී ලයන්ස් පිලට දැඩි අභියෝගයක් එල්ල කළේය. අවසන් මිනිත්තුවේදී දඬුවම් පහරක් සාර්ථක කරගත් ශ්රී ලයන්ස් පිල මෙවර තරගාවලියේ සිය දෙවැනි ජයග්රහණය අත්කර ගත්තේය. ශ්රී ලයන්ස් පිලේ ලකුණු සංඛ්යාවට ගෝල් 4ක්, උත්සාහක දිනුමක් සහ දඬුවම් පහර 2ක් එක්වූ අතර, නාවික හමුදා පිලට රැස් කිරීමට හැකිවූයේ ගෝල් 4 සහ උත්සාහක දිනුමක් පමණි.
මේ අතර ශ්රී ලංකා ගුවන් හමුදා ක්රීඩා සමාජය සමඟ ඊයේ නිත්තවෙලදී තරග වැදුණු මහනුවර ක්රීඩා සමාජය ලකුණු 37-5ක දැවැන්ත ජයග්රහණයක් වාර්තා කිරීමට සමත් විය. තරගයේ පළමු භාගය අවසන් වන වනවිට ලකුණු 13-0කින් පෙරමුණ ගත් මහනුවර පිල තරගය පුරා ගෝල් 2ක්, උත්සාහක දිනුම් 4ක් සහ දඬුවම් පහරක් රැස් කළ අතර, ගුවන් හමුදා පිලේ ලකුණු සංඛ්යාව උත්සාහක දිනුමකට සීමා විය.
7 වැනි සති අන්තයේ තරග ආරම්භ කරමින් සීඑච් ඇන්ඩ් එෆ්සී ක්රීඩා සමාජය සහ හැව්ලොක් ක්රීඩා සමාජය අතර පසුගියදා කොළඹ තුරඟ තරග පිටියේ පැවති තරගය ලකුණු 27-21කින් ජය ගැනීමට හැව්ලොක් පිල සමත් විය. හැව්ලොක් පිලේ ලකුණු සංඛ්යාවට ගෝල් 2ක්, උත්සාහක දිනුම් 2ක් සහ දඬුවම් පහරක් ඇතුළත් වූ අතර, සීඑච් පිල ගෝල් 3ක් රැස් කළේය. තරගයේ පළමු භාගය අවසන් වන විට හැව්ලොක් පිල ලකුණු 17-14කින් ඉදිරියෙන් සිටියේය. සීආර් ඇන්ඩ් එෆ්සී ක්රීඩා සමාජය සහ පොලිස් ක්රීඩා සමාජය අතර එදිනම පස්වරුවේ සීආර් පිටියේ පැවති තරගයෙන් ලකුණු 40-20ක ජයක් සීආර් පිලට හිමි විය. පළමු භාගය නිමා වනවිට පොලිස් පිල ලකුණු 17-14කින් පෙරමුණ ගැනීමට සමත් වුවද, දෙවැනි භාගයේදී සුපුරුදු දස්කම් අතරට පිවිසි සීආර් පිල තරගයේ ජය වාර්තා කරනු ලැබුවේ ගෝල් 5ක් සහ උත්සාහක දිනුමක් සමඟිනි. පොලිස් පිලේ ලකුණු සංඛ්යාවට ගෝල් 2ක්, ඩ්රොප් ගෝලයක් සහ දඬුවම් පහරක් එක් විය.
ෆවුස් මොහොමඩ්