යතුරුපැදි අනතුරකට ලක්වූ සිවුදරු පියකුගේ සිරුර නුවරඑළිය නගරයේ සිට ග්‍රෙගරි වැවට ජලය ගලා බසිනා තලගල ඔයේ බොක්කුවක් යට තිබී පසුගියදා (25) සොයාගත් බව නුවරඑළිය මූලස්ථාන පොලීසියේ ස්ථානාධිපති ප්‍රධාන පොලිස් පරීක්ෂක ප්‍රේමලාල් හෙට්ටිආරච්චි මහතා කියා සිටියේය.
බෝක්කුව යට තිබී හමුවී ඇත්තේ නුවරඑළිය, හාවාඑළිය ප්‍රදේශයේ පදිංචිව සිටි සෙල්වරාජ් නඩරාජ් නමැති 41 හැවිරිදි නුවරඑළිය මහ නගර සභාවේ කම්කරුවකු වශයෙන් සේවය කළ සිවුදරු පියාගේ සිරුරයි. ජීවිතක්ෂයට පත් පුද්ගලයා පසුගිය 24 වැනි දින රාත්‍රියේ නුවරඑළිය නගරයේ සිට නිවෙස දක්වා යතුරුපැදියෙන් ගමන් කරමින් සිටියදී නුවරඑළිය තුරඟ තරග පිටිය වටරවුම් මාර්ගයේදී අනතුරට ලක්ව තිබිණ.
ඒ අනුව, පසුගිය 24 වැනි දින රාත්‍රියේ නුවරඑළිය නගර සීමාවේ මුර සංචාරයේ යෙදුණු පොලිස් නිලධාරීන් අනතුරට පත් යතුරුපැදිය දැක පැදිකරු සොයා නුවරඑළිය ගිනි නිවීමේ ඒකකයේ නිලධාරීන්ගේ සහාය ඇතිව මෙහෙයුම් දියත් කළද සිරුර සොයා ගැනීමට නොහැකි විය. පසු දින (25) උදෑසන සිට සිදු කළ මෙහෙයුමකදී ඔහුගේ සිරුර තලගල ඔයේ බොක්කුව යට තිබී මෙසේ සොයාගෙන තිබිණ.
හැටන් – රංජිත් රාජපක්ෂ
