මල්වතුහිරිපිටිය ආදාහනාගාරය සහ සුසාන භූමිය පිහිටි මහර ප්‍රාදේශීය සභාවට අයත් මල්වතුහිරිපිටිය උප කාර්යාල බලප්‍රදේශයේ එක්රැස් කරන කුණු පිරි ට්‍රැක්ටර් ට්‍රේලර් දින ගණන් ගාල් කර දැමීම හේතුවෙන් අවට ප්‍රදේශය පුරා අධික දුර්ගන්ධයක් පැතිරීමට පටන්ගෙන ඇත.
ආදාහනාගාරයට පැමිණෙන පිරිසට මෙන්ම එහි සේවක පිරිසට ද මේ හේතුවෙන් දුෂ්කරතා රැසකට මුහුණ පෑමට සිදුව තිබේ. ඉසිලිය නොහැකි දුර්ගන්ධය මෙන්ම පණුවන්ගෙන් පිරී පැවතීම හේතුවෙන් බෝ වන මැසි උවදුරින් ආදාහනාගාරයට පැමිණෙන පිරිසට මෙන්ම එහි සේවක පිරිසට ද පීඩා විඳීමට සිදුව ඇත. මෙම භූමියට යාබදව මහර සමුපකාර සමිතියට අයත් මල් ශාලාව පිහිටා ඇති අතර, එහි පවතින මෘත දේහ සකස් කිරීමේදී ඒ අසල ඇති කුණු පිරි ට්‍රේලර්වල සිටින මැස්සන් මෘතදේහ මත වැසීම නිසා සේවකයන්ට ද දුෂ්කරතාවලට මුහුණ පෑමට සිදුව තිබේ.
මල්වතුහිරිපිටිය ප්‍රාදේශීය සභා උප කාර්යාලයට අයත් තාර බැරල් හා කානු කැට කාලයක් තිස්සේ දමා ඇත්තේ ද මෙම සුසාන භූමියේය. ගසක් කපා දමා ඇතත් එයද මෙතෙක් ඉවත් කර නැත. භූමදාන කටයුතුවලදී ඉන් මහත් බාධාවන් දිගින් දිගටම සිදු වුවත් මල්වතුහිරිපිටිය ප්‍රාදේශීය සභාවේ බලධාරීන් මේ දක්වා මුනිවත රැකීම හමුවේ ප්‍රදේශය පුරා විෂබීජ පතුරන තෝතැන්නක් බවට මෙම භූමිය පත්ව ඇතැයි ප්‍රදේශවාසීහු මැසිවිලි නඟති.
