1400කට ආසන්න පිරිසක් ආහාරපාන, පොල්තෙල්, හඳුන්කූරු සහ අටපිරිකර ඇතුළු පූජා භාණ්ඩත්, අනෙකුත් අවශ්‍ය පහසුකම් සියල්ලත් නොමිලයේ ලබාදෙමින් තම පෞද්ගලික වියදමින් අනුරාධපුර අටමස්ථානය වෙත දෙදින සංචාරයක් පිණිස රැගෙන ගිය පුද්ගලයකු පිළිබඳ පුවතක් පසුගියදා ඉංගිරියෙන් වාර්තා විය.
ඔහු නමින් ඉංගිරිය, කිරිගල ප්‍රදේශයේ පදිංචි එස්.ඒ.ඒ. විජේකුමාර මහතායි. ඉංගිරිය “මනුසත් පදනම” මූලික කරගනිමින් විජේකුමාර මහතා විසින් සංවිධානය කර තිබූ මෙම පුණ්‍යකර්මයට බස් 24ක්, ලොරි රථ තුනක්, වෑන් දෙකක්, කැබ් රථයක් සහ කාර් රථයක් ලෙසින් රථවාහන 31ක් එක්ව තිබූ අතර, බාල, තරුණ, මහලු වයස් සීමාවකින් හෝ වෙනත් කිසිදු කොන්දේසියකින් තොරව කැමති ඕනෑම ගණනකට මෙම සංචාරයට එක්වීමට ඉඩ ලබාදීම මෙහි විශේෂත්වයක් විය.
එස්.ඒ.ඒ. විජේකුමාර
චාරිකාව සිදු කළ දෙදිනෙන් ප්‍රථම දින සවස් කාලයේ සිට පසුදා උදෑසන වන තුරු අනුරාධපුර ජේතවනාරාම සෑ මළුවේදී බළන්ගොඩ රාධ ස්වාමින් වහන්සේ විසින් සිදු කරන ලද මහා සතිපට්ඨාන සූත්‍ර දේශනාවටද බැතිමතුන්ට සහභාගි වීමට අවස්ථාව ලැබුණු අතර, සම්පූර්ණ ගමන පුරාවටම වන්දනා කටයුතු සඳහා අවශ්‍ය පොල්තෙල්, හඳුන්කූරු, පහන්තිර පමණක් නොව, බස් රථයකට එක බැගින් අටපිරිකර ලබාදීමටද ඔහු කටයුතු කර තිබුණි.
නිවෙස්වල තනිව ආර්ථික අපහසුකම්වලින් දිවි ගෙවන, අටමස්ථානය වන්දනා කිරීම ජීවිත කාලයටම සිහිනයක් පමණක්ව පැවති විශාල පිරිසකට එම සිහිනය සැබෑ කරගැනීමට මෙදින අවස්ථාව හිමිවූ අතර, තමන්ට සිදුවූ වියදම කොතෙක් වුවද, එම බැතිමතුන් විඳි අවිහිංසක ප්‍රීතිය මෙන්ම ඔවුන්ගෙන් තමන් ලද ආශීර්වාදය කිසිදා මිලයට ගත නොහැකි බව මේ පිළිබඳව අදහස් දක්වමින් විජේකුමාර මහතා පවසා සිටියේය.
