ජාතික ලැයිස්තු මන්ත්‍රීවරයකු ලෙස පාර්ලිමේන්තුවට පත් වූ ඇමැති ආචාර්ය උපාලි පන්නිලගේ මහතාගේ මන්ත්‍රී ධුරය බලරහිත කිරීමේ රිට් ආඥාවක් නිකුත් කරන ලෙස ඉල්ලා ගොනුකර ඇති රිට් පෙත්සමක් ලබන පෙබරවාරි මස 19 වැනිදා සලකා බැලීමට අභියාචනාධිකරණය ඊයේ (22) නියෝග කළේය.
අභියාචනාධිකරණ විනිසුරු එම්. ගොපල්ලව මහතා ඉදිරියේ එම පෙත්සම කැඳවූ අවස්ථාවේදී මේ බව තීරණය කෙරිණි.
මෙම පෙත්සම්කරුවන් අතුරු සහන ඉල්ලීමක් අපේක්ෂා කරන බැවින් වගඋත්තරකරුවන් සියලු දෙනාට නොතීසි ලබාදීමෙන් අනතුරුව පෙත්සම සලකා බැලීම සුදුසු බව එහිදී විනිසුරුවරයා පෙන්වා දුන්නේය.
අදාළ නොතීසි මේ මස 27 වැනිදාට පෙර සියලු වගඋත්තරකරුවන් වෙත යැවීමට පියවර ගන්නා ලෙස විනිසුරුවරයා විසින් පෙත්සම්කාර පාර්ශ්වයට නියෝග කරන ලදී.
පෙත්සම සලකා බැලීම සඳහා පෙබරවාරි මස 19 වැනිදා කැඳවීමට ද නියම කෙරිණ.
අභිනව නිවහල් පෙරමුණේ සභාපති ඔෂල හේරත් මහතා විසින් ගොනු කර ඇති මෙම පෙත්සමෙහි වගඋත්තරකරුවන් ලෙස ඇමැති ආචාර්ය උපාලි පන්නිලගේ, පාර්ලිමේන්තු මහලේකම්, රුහුණු විශ්වවිද්‍යාලය සහ එහි උප කුලපති ඇතුළු පිරිසක් නම් කර සිටිති.
ආචාර්ය උපාලි පන්නිලගේ මහතා පසුගිය මහමැතිවරණයෙන් අනතුරුව ජාතික ලැයිස්තු මන්ත්‍රීවරයකු වශයෙන් පාර්ලිමේන්තුවට පත්කළ බව පෙත්සමෙහි සඳහන් වේ.
ජාතික ලැයිස්තු පාර්ලිමේන්තු මන්ත්‍රීවරයකු ලෙස පත් කරන අවස්ථාවේදී ඔහු රුහුණු විශ්වවිද්‍යාලයේ සමාජ විද්‍යා මහාචාර්යවරයකු ලෙස සේවය කරමින් සිටි බවට තොරතුරු ලැබී ඇති බව පෙත්සමෙහි දැක්වෙයි.
රජයේ සේවයේ නිරතව සිටියදී මෙලෙස පාර්ලිමේන්තු මන්ත්‍රීවරයකු ලෙස පත්කිරීම ආණ්ඩුක්‍රම ව්‍යවස්ථාවේ 91 වැනි ව්‍යවස්ථාවට පටහැණි බව පෙත්සම්කරු දෙනු ලැබීය.
එලෙස අදාළ අවස්ථාව වනවිට රජයේ සේවයේ නිරතව සිටීම පාර්ලිමේන්තුවට තේරී පත්වීමට සහ මන්ත්‍රී ධුරය දැරීමට නුසුදුසුකමක් බව පෙත්සමෙහි සදහන් වේ.
එබැවින් දැනට ඇමැතිවරයකු ලෙස කටයුතු කරන ආචාර්ය උපාලි පන්නිලගේ මහතාට පාර්ලිමේන්තුවට තේරී පත්වීමට, අසුන් ගැනීමට සහ ඡන්දය ප්‍රකාශ කිරීමට ආණ්ඩුක්‍රම ව්‍යවස්ථාව යටතේ සුදුසුකම් නොමැති බවට තීන්දු කරන ක්වො වොරොන්ටෝ රිට් ආඥාවක් නිකුත් ලෙස පෙත්සම්කරු අධිකරණයෙන් ඉල්ලා සිටියි.
