සබරගමුව මහ සමන් දේවාලයේ තිබූ අඩි 4කට වඩා දිගැති ඇත් දළ ජෝඩු දෙකක් අස්ථානගත වීම ඇතුළු දේවාලයේ රන් රිදී මුතු මැණික් තැන්පත් කර ඇති සේප්පු දෙකේ යතුරු අස්ථාන ගත වීම ඇතුළු කරුණු කිහිපයක් සම්බන්ධයෙන් රත්නපුර නියෝජ්‍ය බෞද්ධ කටයුතු කොමසාරිස්වරයා රත්නපුර කොට්ඨාස අපරාධ විමර්ශන කාර්යාංශයට පෙරේදා (20) පැමිණිල්ලක්කර ඇත.
අඩි 4කට වඩා දිගැති ඇත් දළ ජෝඩු දෙකක් අස්ථානගත වීම, දේවාලයේ රන් රිදී මුතු මැණික් තැන්පත් කර ඇති සේප්පු දෙකේ යතුරු අස්ථානගත වීම, වාර්ෂික හා අර්ධ වාර්ෂික ආදායම් වියදම් වාර්තා නිසි ලෙස ඉදිරිපත් නොකිරීම, දේවාලය සතු නින්දගම් ඉඩම්වල පතල් කැපීම සඳහා ඉඩම් බදුදීම හා බලපත්‍ර ලබා දීම සම්බන්ධව නිසි ලිපි ගොනුවක් පවත්වා නොගැනීම යන කරුණු 4ක් සමබන්ධයෙන් රත්නපුර නියෝජ්‍ය බෞද්ධ කටයුතු කොමසාරිස්වරයාමෙම පැමිණීල්ල ඉදිරිපත් කර තිබේ.
අස්ථානගතව ඇති ඇතැම් දේපළ සම්බන්ධයෙන් පොත්පත්වල සටහන්ව ඇතත් එම දේපළ දේවාලයේ නොමැති බව මූලික විමර්ශන වලින් පෙනී ගොස් ඇතැයි උසස් පොලිස් නිලධාරියෙක් පැවසීය.
මෙම කරුණු සම්බන්ධයෙන් 2024.12.01 වන සිදුකළ විගනනයකින් හෙළිව ඇතැයි ද පැවසේ.
බෞද්ධ කටයුතු කොමසාරිස් ජනරාල්වරයා විසින් 2025 ජනවාරි මස 20 දිනැති ලිඛිත නියෝගයකට අනුව 1931 අංක 19 දරණ විහාර දේවාල ආඥා පනත යටතේ අංක 32 වගන්තියට ප්‍රාකාරව රත්නපුර නියෝජ්‍ය බෞද්ධ කටයුතු කොමසාරිස්වරයා විසින් මේ සම්බන්ධයෙන් වූ පැමිණිල්ල පොලිසියට කර තිබේ.
විමර්ශනයට අදාළව හිටපු බස්නායක නිළමේවරයාගෙන් ප්‍රකාශයක් සටහන්කර ගැනීමට නියමිතය.
කුරුවිට – කේ. ඒ. සුනිල්
