පවතින ආපදා තත්ත්වය හේතුවෙන් පීඩාවට පත් ජනතාවට සහන සැළසීමට රුපියල් මිලියන 30ක් වෙන්කර ඇති බව ආරක්ෂක නියෝජ්‍ය අමාත්‍ය විශ්‍රාමික මේජර් ජෙනරාල් අරුණ ජයසේකර මහතා සඳහන් කළේය.
ආපදා තත්ත්වය හේතුවෙන් මිය යන පුද්ගලයකු වෙනුවෙන් ලබාදෙන වන්දි මුදල රුපියල් මිලියනය දක්වා ඉහළ නැංවීමට තීරණයකර ඇති බවද නියෝජ්‍ය ඇමැතිවරයා පැවසීය. මෙතෙක් වෙන්කර තිබුණු මුදල රුපියල් 250,000කි.
ආපදා කළමනාකරණ මධ්‍යස්ථානයේ ඊයේ (21) පස්වරුවේ පැවැති මාධ්‍ය හමුවකදී ආරක්ෂක නියෝජ්‍ය අමාත්‍යවරයා ඒ බව පැවසීය.
දිස්ත්‍රික්ක 18කට බලපා ඇති අයහපත් කාලගුණික තත්ත්වය හේතුවෙන් පවුල් 9,000කට අධික පුද්ගලයන් 30,000කට වැඩි පිරිසක් පීඩාවට පත්ව ඇති බව ආපදා කළමනාකරණ මධ්‍යස්ථාන තොරතුරු සඳහන් කරයි. ආපදා තත්ත්වය හේතුවෙන් මරණ 02ක් බදුල්ල සහ පොළොන්නරුව යන දිස්ත්‍රික්කවලින් වාර්තා වී ඇති බව ආරක්ෂක නියෝජ්‍ය අමාත්‍යවරයා පැවසීය.
උපාලි කරුණාරත්න
