වීසා නොමැතිව ශ්‍රී ලංකාවේ රැඳී සිටීමේ චෝදනාවකට වැලිසර රැඳවුම් මධ්‍යස්ථානයේ රඳවා සිටි රැඳවූවකු ඉතා කඩිනමින් නිදහස් කර යැවීමට කටයුතු කර දෙන බව පවසා ඔහුගෙන් රුපියල් ලක්ෂ පහක අල්ලසක් ලබා ගැනීමක් සම්බන්ධයෙන් අල්ලස් හෝ දූෂණ විමර්ශන කොමිසමේ නිලධාරීන් විසින් අත්අඩංගුවට ගත් ආගමන විගමන දෙපාර්තමේන්තුවේ වැලිසර රැඳවුම් මධ්‍යස්ථානයේ බලයලත් නිලධාරියකු ලබන 31 දක්වා රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් තනූජා ලක්මාලි මහත්මිය ඊයේ (21) නියෝග කළාය.
වැලිසර රැඳවුම් මධ්‍යස්ථානයේ බලයලත් නිලධාරියකු වන කේ.කේ.ඩබ්. මහින්ද හේම කුමාර නමැත්තකු එසේ රක්ෂිත බන්ධනාගාරගත කෙරුණි.
අදාළ රැඳවියා ඉන්දියන් ජාතිකයකු බව පවසමින් වැල්ලවාය පොලීසිය මීට කලකට පෙර අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව මෙම රැඳවුම් මධ්‍යස්ථානයට යොමු කර ඇති බව ද විමර්ශන නිලධාරීහු අධිකරණයට දැන්වූහ.
මෙම රැඳවියා ඉන්දියන් ජාතිකයකු බව හඟවා ඔහුව මෙම රැඳවුම් මධ්‍යස්ථානය වෙත යොමු කර ඇතත් ඔහු ඉන්දියන් ජාතිකයකු නොවන බවත් යාපනයේ කෝවිලක පූජකයකු බව ද අනාවරණය වූ බව විමර්ශන නිලධාරීහු අධිකරණයට දැක්වූ කරුණුවලින් හෙළි විය.
දින ගණනක් එම මධ්‍යස්ථානයේ රඳවා සිටීම නිසා තමාව නිදහස් කිරීමට අවශ්‍ය කටයුතු සලසා දෙන ලෙස අදාළ රැඳවියා සැකකාර බලයලත් නිලධාරියාගෙන් කිහිප අවස්ථාවක දී ඉල්ලා ඇති බවත් ඒ අවස්ථාවේ දී සැකකාර නිලධාරියා ඒ සඳහා රැඳවියාගෙන් රුපියල් ලක්ෂ පහක මුදලක් ඉල්ලා ඇති බව අධිකරණය හමුවේ අල්ලස් කොමිසන් සභාවේ නිලධාරීන් සඳහන් කළේය.
අදාළ රැඳවියා දුරකතන මාර්ගයෙන් අල්ලස් හෝ දූෂණ විමර්ශන කොමිසමට කරන ලද පැමිණිල්ලක් අනුව සිදු කළ වැටලීමක දී සැකකාර පුද්ගලයා ලක්ෂ පහක මුදල ලබා ගත් අවස්ථාවේ දී උපාය දූතයකු මගින් අත්අඩංගුවට ගත් බව අධිකරණයට විමර්ශන නිලධාරීහු පැවැසීය.
සැකකරු මීට පෙරද රැඳවියාගෙන් ලක්ෂ දෙකක මුදලක් අල්ලසක් ලෙස ලබාගෙන ඇති බවට කරුණු අනාවරණය වී ඇති බව ද අධිකරණයට දැන්වීය.
තම සේවා දායකයා මෙම සිද්ධියට සම්බන්ධ නොවන බවත් වසර විස්සකට අධික කාලයක් රාජ්‍ය සේවයකු වන බැවින් ඔහුව ඇපමත නිදහස් කරන ලෙස සැකකරු වෙනුවෙන් අධිකරණයේ පෙනී සිටි නීතිඥවරයා පැවැසීය.
දෙපාර්ශ්වයේම කරුණු සලකා බැලූ අධිකරණය මෙම සිද්ධියට අදාළ සැකකරු ලබන 31 දක්වා රක්ෂිත බන්ධනාගාරගත කරන ලෙස සහ විමර්ශන කටයුතු කඩිනම් කරන ලෙසද දැන්වීය.
කල්පනි අබේසිංහ
