රුපියල් ලක්ෂ 50ක මුදලක් කප්පම් ලෙස ගැනීම සඳහා දවුලගල, හපුගහයටතැන්න ප්‍රදේශයේ ව්‍යාපාරිකයකුගේ 19 හැවිරිදි දියණියක වෑන් රථයකින් පැහැර ගැනීම සම්බන්ධයෙන් නිසි ලෙස රාජකාරි ඉටු නොකිරීමේ චෝදනාව මත දවුලගල පොලීසියේ පරිපාලන අංශයේ පොලිස් ස්ථානාධිපතිවරයාගේ වැඩ තහනම් කරමින් ළමා හා කාන්තා කාර්යාංශයේ ස්ථානාධිපතිනියත්, අපරාධ අංශයේ ස්ථානාධිපතිවරයාත් ස්ථාන මාරු කිරීමට මධ්‍යම පළාත් ජ්‍යෙෂ්ඨ නියෝජ්‍ය පොලිස්පති ලලිත් පතිනායක මහතා පියවර ගෙන ඇත.
මේ පැහැරගැනීම සිදු වූ පසුගිය 11 වැනිදා දවුලගල පොලිස් ස්ථානයේ වැඩ බලන ස්ථානාධිපති ලෙස සේවයේ නිරතව සිට ඇත්තේ පරිපාලන අංශ ස්ථානාධිපති වන ප්‍රධාන පොලිස් පරීක්ෂක ආර්. ඒ. එස්. එස්. රණසිංහ නැමැති නිලධාරියාය. වැඩ තහනම් කර ඇත්තේ ඔහුගේය.
දවුලගල පොලිස් ස්ථානයේ ළමා හා කාන්තා කාර්යාංශයේ ස්ථානාධිපති පොලිස් පරීක්ෂිකා ජී.ජී. කුසුම් ගමගේ මහත්මිය ස්ථාන මාරු කර ඇත්තේ කඩුගන්නාව පොලිස් ස්ථානයටයි. අපරාධ අංශ ස්ථානාධිපති ලෙස කටයුතු කළ උප පොලිස් පරීක්ෂක ජී. ඒ. එස්. නිමල්සිරි මහතා ස්ථාන මාරු කර ඇත්තේ වෙලම්බඩ පොලිස් ස්ථානයටයි.
සිසුවිය පැහැර ගත් බවට 119 පොලිස් හදිසි ඇමතුම් අංශය ඔස්සේ මුල්ම පැමිණිල්ල ලැබී ඇති බවත්, අනතුරුව මේ පැහැරගැනීම දුටු පුද්ගලයන් ද පොලීසියට තොරතුරු දී තිබියදීත් ඒ ගැන උනන්දුවක් නොමැතිව කටයුතු කිරීම ඇතුළු කරුණු ගණනාවක් සම්බන්ධයෙන් එල්ල වූ චෝදනා මත මේ වැඩ තහනම් කිරීම සහ ස්ථාන මාරුවීම් සිදු කර ඇත.
මේ සම්බන්ධයෙන් ඉහළ නිලධාරීන් ක්ෂණිකව දැනුම්වත් කර විමර්ශන ආරම්භ කරනවා වෙනුවට මේ පැහැරගැනීම සම්බන්ධයෙන් වූ පැමිණිල්ල ගැන කිසිදු උනන්දුවකින් තොරව මේ නිලධාරීන් කටයුතු කර ඇති බව ඉහළ පොලිස් නිලධාරීන්ට පෙනී යෑමෙන් පසු මේ වැඩ තහනම සහ ස්ථාන මාරුවීම් දී තිබේ.
අසේල කුරුළුවංශ
