දිවියාගහ පඤ්ඤානන්ද හිමි
නීති විරෝධී ලෙස කසළ ගෙනත් දමනු ලැබූ පර්චස් 25ක පමණ භූමි භාගයක් ඉතා මනරම් උද්‍යානයක් බවට පරිවර්තනය කළ පුවතක් මාතර දික්වැල්ල ප්‍රදේශයෙන් වාර්තා වේ.
දික්වැල්ල – බෙලිඅත්ත අලුත් පාර වැටී ඇත්තේ දික්වැල්ල කලපුව හරහාය. එම කලපුව ආසන්න ප්‍රදේශයට කසළ බැහැර කිරීමට ඇතැම් පිරිස් යොමුවී සිටියහ. එය පරිසර අලංකරණයට විශාල බාධාවක්ව පැවැතිණි. මේ පිළිබඳව දික්වැල්ල වත්තේගම සුධර්මාදාර විහාරයේ පූජ්‍ය දිවියාගහ පඤ්ඤානන්ද හිමියන්ගේ අවධානය යොමුවුණා. උන්වහන්සේ තම කාලය ධනය ශ්‍රමය පරිත්‍යාගයෙන් මෙන්ම අනේකවිධ දුක්ඛ දෝමනස්සයන් විඳගනිමින් මෙම භූමිය පරිසර හිතකාමී අලංකාර උද්‍යානයක් බවට පරිවර්තනය කරන ලදි.
දිවියාගහ පඤ්ඤානන්ද නාහිමි:
දික්වැල්ල ප්‍රදේශයේ තිබුණු කුණු එකතුවන ස්ථානයක් මේක. නොයෙකුත් පුද්ගලයින් මෙම භූමියට කුණු ගෙනත් දැමීමට පුරුදුව සිටියා. එම තත්ත්වය වැළැක්වීමට නොයෙකුත් විධික්‍රම භාවිත කළත් ඒ සියල්ල අසාර්ථක වුණා.
මෙම ඉඩමේ අයිතිය තියෙන්නෙ රජයට. ඒ අනුව මම දික්වැල්ල ප්‍රාදේශීය ලේකම් මධුමතී එම්. රත්නායක මහත්මිය සහ ප්‍රාදේශීය සභාවේ ලේකම් චාන්දනී වේරගොඩ මහත්මිය සමඟ සාකච්ඡා කොට එම භූමිය සංවර්ධනය කිරීමට අවසර ලබාගත්තා. ඒ සමඟම එම කලපුව හා සම්බන්ධ ඇළ මාර්ගයද ඔවුන්ගේ අනුග්‍රහයෙන් මනාව පිරිසිදු කරගනු ලැබුවා. ඒ හේතුවෙන් අධික වර්ෂා කාලයට ඇතිවන ගංවතුර උවදුරෙන් ජනතාව බේරා ගැනීමටද හැකිවුණා.
උද්‍යානය ගොඩනැඟීමට මාගේ ධනය, ශ්‍රමය සහ කාලය විශාල ලෙස වැය කරනු ලැබුවා. දික්වැල්ල සංචාරක කලාපයක් නිසා විදේශිකයින් බහුලව ගැවසෙනවා. ඒ පිළිබඳවත් අවධානය යොමුවුණා.
මෙම භූමියේ වටිනාකම ජනතාවගේ හදවතට දැනෙන විදිහට බොදු බැති ගී වැඩසටහනක් සහ රසවින්දනාත්මක ගී සැඳෑවක් පවත්වා මෙම භූමිය “කඩොලාන උද්‍යානය” නමින් ජනතාවට පවරා දෙනු ලැබුවා. දික්වැල්ල-බෙලිඅත්ත අලුත් පාර ප්‍රධාන මාර්ගයේ පිහිටි මෙම උද්‍යානය නිසා පරිසරයට අතිවිශාල අලංකාරයක් එකතුවී තිබෙනවා. කසළ ගොඩගැසී තිබූ භූමියක් මෙවන් අලංකාරවත් උද්‍යානයක් බවට පත්කර ගැනීමට හැකිවීම පිළිබඳ මා අතිශයින්ම සතුටට පත්වෙනවා.
මහේෂ් නිලංග
