පසුගිය 2024 වර්ෂයේ දී අනුරාධපුර දිස්ත්‍රික්කයේ කැලෑබද ප්‍රදේශවල මියගිය වනඅලින් සංඛ්‍යාව 54ක් බව වනජීවී සංරක්ෂණ දෙපාර්තමේන්තුව පවසයි. සංඛ්‍යාත්මක වශයෙන් එය 2023 වර්ෂයට වඩා අඩුවීමක් බව අනුරාධපුර සහකාර වනජීවී අධ්‍යක්ෂ කාර්යාලය පෙන්වාදෙයි. 2023 දී අනුරාධපුර වනජීවී කලාපය තුළ මියගොස් ඇති වනඅලින් ගණන 87 දෙනෙකි. අලින්ගේ මරණ වැඩි සංඛ්‍යාවක් වාර්තා වී ඇත්තේ පසුගිය ඔක්තෝබර් මාසයේදී ය. එම සංඛ්‍යාව නවයකි. අලින්ගේ මරණ වැඩි වශයෙන් සිදු වී ඇත්තේ මිනිස් ක්‍රියාකාරකම් හේතුවෙනි. අලින් 12දෙනකු වෙඩි වැදීමෙන් ද, 11දෙනකු හක්ක පටස් පිපිරීමෙන් ද, විදුලි සර වැදීමෙන් 08 දෙනකු ද මියගොස් ඇත.
මරණයට හේතුව අනාවරණය නොවූ ගණන හතක් වේ. ස්වාභාවික හේතූන් නිසා මියගොස් ඇති අලින් ගණන 05කි. වස කැවීමෙන් මරණ 04ක් සිදු වී තිබේ. පණු රෝග හා තුවාල ආසාදන හේතුවෙන් මියගිය අලින් සංඛ්‍යාව 05දෙනෙකි. දුම්රියෙහි ගැටීමෙන් හා වගා ළිඳකට වැටීමෙන් අලින් දෙදෙනකු මියගොස් ඇති බවත් වනජීවී නිලධාරීහු පැවසූහ. මේ අතර වනඅලින් පහරදීම හේතුවෙන් ද මිනිස් ජීවිත 32ක් පසුගිය වර්ෂයේ දී රටට අහිමි වී ඇතැයි ද වනජීවී සංරක්ෂණ දෙපාර්තමේන්තුවේ අනුරාධපුර සහකාර අධ්‍යක්ෂ ඩබ්ලිව්.එම්. කේ. එස්. චන්ද්‍රරත්න මහතා පැවසීය. වනඅලි පහරදීම් නිසා මියගිය පුද්ගලයන් වෙනුවෙන් රුපියල් දෙකෝටි පනස් පන් ලක්ෂයක වන්දි මුදල්, ඔවුන්ගෙන් යැපෙන්නන් වෙත ගෙවීමට ආපදා වන්දි කමිටුවේ අනුමැතිය ලැබී ඇතැයි ද හෙතෙම පැවසීය.
තඹුත්තේගම විශේෂ – ඩබ්ලිව්. ප්‍රදීප්
