පොහොර මිල මෙන්ම විදුලි බිල ගැනත් රජය අනුගමනය කරන්නේ එක හා සමාන ප්‍රතිපත්තියක් බව විපක්ෂ නායක සජිත් ප්‍රේමදාස මහතා පැවසීය.
විපක්ෂ නායකවරයා මේ බව පැවසුවේ පෙරේදා (19) ඇහැටුවැව ප්‍රදේශයේ පැවති ජන හමුවකදීය.
එහිදී වැඩිදුරටත් අදහස් දැක්වූ විපක්ෂ නායකවරයා මෙලෙස ද කීවේය.
“සියයට 33කින් විදුලි බිල අඩු කරනවා කියූ මේ අය විදුලි බිල 37%කින් වැඩි කරන්න තීන්දු කරලා. විදුලිබල මණ්ඩලය ද මාස හයකට විදුලි බිල අඩු කරන්න බෑ කිව්වත් මහජන උපයෝගීතා කොමිසම විදුලි බිල 20%කින් අඩු කරන්න නිර්දේශ කළා. එවැනි මොහොතක රජය ඒ සඳහා මුදල් අමාත්‍යාංශයේ අනුමැතිය අවශ්‍ය බව පවසනවා. සියයට 20කින් පවා විදුලි බිල අඩු කරන්නට රජයට විශාල දුකක් විඳින්න සිදුව තිබෙනවා.
මැතිවරණ වේදිකාවේ පොරොන්දු රැසක් දුන් වර්තමාන රජයට පොරොන්දු වු ආකාරයට පොහොර සහනාධාරය දෙන්න හැකි වෙලා නෑ. කොටසකට රුපියල් 10,000ක්, තවත් කොටසකට රුපියල් 15,000 දුන්නත් අංගසම්පූර්ණ රුපියල් 25,000ක සහනාධාරය දෙන්න බැරි වෙලා තිබෙනවා. මේ සහනාධාරය දෙන්න වෙන් වී ඇති මුදලින් 40%ක් පමණක් වැය වී තිබෙනවා.
පොහොර සහනාධාරය පමණක් නොව අස්වැන්නට සහතික මිලක් අවශ්‍යයි. කෘෂිකර්මාන්ත කටයුතු සඳහා යන වියදම ගැනවත් රජයට අවබෝධයක් නෑ. AC කාමරවල සිට තීන්දු තීරණ ගන්නා මේ අයට ගොවි ජනතාව විඳින දුක, වගා හානි, පොහොර මිල ගැන හරිහැටි තක්සේරුවක් නෑ. ගොවියාගේ වියදමත් ආවරණය නොවන සහතික මිලක් දී තිබෙනවා. ගොවියාගේ කරපිටින් රජ පුටුවට පැමිණියත් ගොවියාගේ දුක, කඳුළ, වේදනාවට නිසි විසඳුම් දෙන්න රජයට හැකි වී නෑ.”
රක්ෂණ ශ්‍රියන්ත
