දෙමළ දේශපාලන පක්ෂ සියල්ලම මේ අවස්ථාවේදී එකතු වී රජයට සභාග ආණ්ඩුවක් සඳහා බල කිරීමෙන් දෙමළ ප්‍රශ්නයට විසඳුමක් ගතහැකි බව දෙමළ ජාතික සන්ධානයේ හිටපු පාර්ලිමේන්තු මන්ත්‍රී එම්. ඒ. සුමන්තිරන් මහතා ප්‍රකාශ කළේය.
හිටපු මන්ත්‍රීවරයා මේ බව පැවසුවේ පෙරේදා (19) ඉලංකෙයි තමිල් අරුසු පක්ෂයේ මධ්‍යම කාරක සභා රැස්වීමෙන් පසුව මාධ්‍යවේදීන් නැඟූ ප්‍රශ්නවලට පිළිතුරු දෙමිනි.
එහිදී වැඩිදුරටත් අදහස් දැක්වූ හිටපු මන්ත්‍රීවරයා මෙලෙස ද කීවේය.
“මේ අවස්ථාවේදී උතුරු නැඟෙනහිර ප්‍රශ්නයට විසඳුමක් ගැනීමට යෑමේදී සාමූහික ප්‍රයත්නයක් කෙරෙහි විශ්වාසය තැබීම ඉතා වැදගත්. 2020දී ආර්. සම්පන්දන් මන්ත්‍රීවරයාගේ ප්‍රධානත්වයෙන් පැවති සාකච්ඡාවකදී ද මේ තීරණය ගත්තා. එහි ඇතුළත් කරුණු එවකට ජනාධිපතිවරයා ලෙස කටයුතු කළ ගෝඨාභය රාජපක්ෂ මහතාට භාර දුන්නා. නමුත් ඔහු
ඊට කිසිදු අනුකූලතාවක් දැක්වූයේ නෑ.
වත්මන් ජනාධිපතිවරයා උතුරු නැඟෙනහිර ප්‍රශ්නයට යම් දේශපාලනික විසඳුමක් දීමට කැමැති බව ප්‍රකාශ කර තිබීම නිසා 2020දී සකසන ලද සභාග රජයක් පිළිබඳව වූ කෙටුම්පතට අවශ්‍ය නම්, සංශෝධන ද ඉදිරිපත් කර ජනාධිපතිවරයාට භාර දී ඒ පිළිබඳව සාකච්ඡා කළ යුතුයි.
උතුරු නැඟෙනහිර පළාත් සඳහා වෙනම දේශපාලන ව්‍යුහයක් ගැනීම සහ ෆෙඩරල් පාලන ක්‍රමයකට යෑම වැනි කාරණා වර්තමානයට සහ වත්මන් දේශපාලන රටාවට නොගැළපෙන නිසා සභාග පාලන ක්‍රමයකට තල්ලු වීම වඩා වැදගත් වෙනවා.”
උතුරු පළාත් විශේෂ රසුල දිල්හාර ගමගේ
