රජයේ පාසල්වලට සිසුන් ඇතුළත් කර ගැනීමේ දී අනුමත ගාස්තු හැර මවුපියන්ගෙන් මුදල් ලබා ගැනීම නොකළ යුතු බවට අධ්‍යාපන අමාත්‍යාංශය චක්‍ර‍ෙල්ඛන මඟින් දැනුම් දී තිබිය දී අදාළ චක්‍ර‍ෙල්ඛන උල්ලංඝනය කරමින් මහනුවර ප්‍රධාන පෙළේ පාසල් ගණනාවකම මුදල් එකතු කිරීම් සිදු කරන බවට පළාත් අධ්‍යාපන අමාත්‍යාංශයට ලැබුණු පැමිණිලි සම්බන්ධයෙන් පරීක්ෂණයක් ආරම්භ කර තිබේ.
නිවාසාන්තර ක්‍රීඩා උත්සව සංවිධාන කටයුතු සඳහා යැයි කියමින් ජනප්‍රිය පාසල් ගණනාවකම මුදල් එකතු කිරීම් මේ වන විට සිදු කෙරෙමින් පවතින අතර ඇතැම් පාසල්වල අදාළ කටයුත්ත පවරා තිබෙන්නේ ශිෂ්‍ය නායක නායිකාවන්ටය.
මේ සඳහා රුපියල් 300 සිට 500 දක්වා මුදල් එකතු කරනු ලබන බවත් මුදල් රැගෙන එන ලෙස වට්ස් ඇප් ඔස්සේ දැනුම් දීම් සිදු කරන බවත් මවුපියෝ පවසති.
පළමු වසර සඳහා සිසු සිසුවියන් බඳවා ගැනීම වෙනුවෙන් සංවිධාන කරනු ලබන උත්සව වෙනුවෙන් යැයි කියමින් ප්‍රධාන පෙළේ එක් පාසලක් මඟින් රුපියල් 10000 ක මුදලක් එකතු කරමින් සිටින බවත් එම කටයුත්ත මෙවර පළමු වසරට දරුවා ඇතුළත් කරන ලද මවක මුල් වී සිදු කරනු ලබන්නේ විදුහල්පතිනියගේ අනුදැනුම මත බවත් වාර්තා වේ.
අධ්‍යාපන අමාත්‍යාංශය මඟින් නිකුත් කළ චක්‍ර‍ෙල්ඛනය උල්ලංඝනය කරමින් අයථා මුදල් ලබා ගැනීම් සිදුවන නිසා මධ්‍යම පළාත් ප්‍රධාන හා අධ්‍යාපන අමාත්‍යාංශ ලේකම් මධුපානි පියසේන මහත්මිය මධ්‍යම පළාත් අධ්‍යාපන අධ්‍යක්ෂවරයා හා කලාප අධ්‍යාපන අධ්‍යක්ෂවරු මඟින් සියලුම විදුහල්පතිවරු වෙත ලිපියක් යොමු කරමින් එලෙස මුදල් එකතු කිරීම් නොකරන ලෙස දැනුම් දී තිබේ.
අධ්‍යාපන අමාත්‍යාංශය විසින් 2023 දෙසැම්බර් 29 වැනි දිනැතිව නිකුත් කර තිබෙන චක්‍රලේඛනය මඟින් පාසල් දරුවන් ඇතුළත් කිරීමේ දී අනුමත හා සාමාජික ගාස්තු හැර මවුපියන්ගෙන් මුදල් ලබා ගැනීමට කටයුතු නොකළ යුතු බව පෙන්වා දී ඇත. අතරමැදි ශ්‍රේණිවලට සිසුන් ඇතුළත් කිරීම සම්බන්ධයෙන් 2024 අප්‍රේල් 25 වැනි දිනැතිව නිකුත් කර ඇති චක්‍රලේඛනය මඟින්ද රජයේ සියලුම පාසල්වලට පහසුකම් හා සේවා ගාස්තු, පාසල් සංවර්ධන සමිති සාමාජික මුදල් හා අනුමත ගාස්තු හැර වෙනත් ගාස්තු හා ආධාර මුදල් හෝ වෙනත් බඩු බාහිරාදිය ලබා ගැනීම තහනම්ය. එවැනි පැමිණිලි සම්බන්ධයෙන් විනයානුකූල ක්‍රියාමාර්ග ගැනීමට සිදුවන බව ද එමඟින් පෙන්වා දී ඇත.
අසේල කුරුළුවංශ
