වසර 2013දී ශ්‍රී ලන්කන් ගුවන් සේවයට පළල්බද සහිත නව ගුවන් යානා ඇණියක් ප්‍රතිස්ථාපනය කිරීමේදී සිදුව ඇති දූෂණ වංචා සම්බන්ධයෙන් ගොනු කර ඇති නඩුවට අදාළව රහස් සාක්ෂිකරුවකු ඊයේ (20) කොටුව මහේස්ත්‍රාත් නිලුපුලී ලංකාපුර මෙනවිය හමුවේ පැයකුත් විනාඩි දහයකට ආසන්න කාලයක රහස් සාක්ෂියක් ලබා දුන්නේය.
අපරාධ පරීක්ෂණ දෙපාර්තමේන්තුව එම නඩුකරය සඳහා රහස් සාක්ෂියක් ලබා දීමට පුද්ගලයෙකු ඉදිරිපත් වී ඇති බවට අධිකරණයට කළ දැනුම් දීම මත මහේස්ත්‍රාත්වරිය මෙම රහස් සාක්ෂිය කැඳවනු ලැබීය.
ඒ අනුව ඊයේ පස්වරු 1.50ට රහස් සාක්ෂිය ලබාදීම ආරම්භ වූ අතර පස්වරු 3.00ට සාක්ෂි ලබාදීම අවසන් විය.
2013 වසරේදී ශ්‍රී ලන්කන් ගුවන් සමාගමට එයාර්බස් A-330 ගුවන් යානා 06ක් සහ A- 350 වර්ගයේ ගුවන් යානා 08 ක් මිලට ගැනීමේදී එයාර්බස් සමාගම සහ ශ්‍රී ලන්කන් ගුවන් සමාගම අතර සිදු වූ අයථා මුදල් ගනුදෙනුවක් සම්බන්ධයෙන් මෙම විමර්ශන සිදු කරනු ලැබූ අතර විමර්ශන අවසන් බවට අපරාධ පරීක්ෂණ අධිකරණයට පසුගිය 17 වැනිදා මෝසමක් ගොනු කරමින් කියා සිටියේය.
සිංගප්පූරු ඩොලර් මිලියන දෙකක මුදලක් මෙම එයාර්බස් ගනු දෙනුවට අදාළව කොමිස් මුදල් ලෙස ලබා ගෙන ඇති බව අපරාධ පරීක්ෂණ දෙපාර්තමේන්තුව සිදු කළ විමර්ශන අනාවරණය කර ඇති අතර මෙම විමර්ශනයට අදාළව නීතිපතිවරයා අපරාධ පරීක්ෂණ දෙපාර්තමේන්තුව ලබාදුන් උපදෙස් ලේඛනයේ ශ්‍රී ලන්කන් ගුවන් සමාගමේ හිටපු විධායක නිලධාරී කපිල චන්ද්‍රසේනගේ බිරිය වන නියෝමාලි විජේනායක නමැත්තිය තනි අධ්‍යක්ෂ ධුරයක් දරන සිංගප්පුරූවේ බිස් සොලූෂන්ස් නම් සමාගමකට 2013.12.27 වැනි දින එයාර්බස් සමාගමේ මව් සමාගම අමෙරිකානු ඩොලර් මිලියන 02ක මුදලක් බැර කර ඇති බව දක්වා ඇත.
එමෙන්ම එම ගිණුමෙන් අවස්ථා 04කදී එම මුදල් ප්‍රමාණය කපිල චන්ද්‍රෙස්න සතු ඔස්ට්‍රේලියාවේ කොමන්වෙල්ත් බැංකුවේ ගිණුමකට බැර කර සිංගප්පූරු ගිණුම 2015.11.25 වැනි දා වසා දමා ඇති බවද නීතිපතිවරයා අපරාධ පරීක්ෂණ දෙපාර්තමේන්තුවට ලබාදුන් උපදෙස් ලේඛනයේ වැඩිදුරටත් සඳහන් කර ඇත.
එම විමර්ශනයට අදාළව අත්අඩංගුවට ගෙන රක්ෂිත බන්ධනාගාරගත කර දැනට ඇප මත මුදා හැර සිටින ශ්‍රී ලන්කන් ගුවන් සමාගමේ හිටපු ප්‍රධාන විධායක නිලධාරිවරයා වන කපිල චන්ද්‍රසේන සහ ඔහුගේ බිරිඳ වන ප්‍රියංකා නියොමාලි විජේනායක යන අයවලුන් මෙම සිද්ධිය සම්බන්ධයෙන් ඇප මත මුදා හැර ඇත.
සුභාෂිණී සේනානායක
