පෝලියෝ රෝගය මෙතෙක් ඉතිරිව ඇති රටවල් කිහිපය අතර සිටින පාකිස්තානයේ පසුගිය වසරේදී වාර්තා වූ රෝගීන් සංඛ්‍යාව 73 දක්වා ඉහළ ගොස් ඇතැයි එරට ඩෝන් පුවත් සේවය වාර්තා කළේය. පසුගිය වසරේ දෙසැම්බරයේදී එක්රැස් කරගත් සාම්පල පරීක්ෂාවකින් 73 වැනි රෝගියා තහවුරු වූ බව ද එම පුවත් සේවය වැඩිදුරටත් වාර්තා කළේය.
මේ අතුරින් වැඩිම පෝලියෝ රෝගීන් සංඛ්‍යාවක් වාර්තා වී ඇත්තේ බලුකිස්තාන ප්‍රාන්තයෙන් බවත්, එය ප්‍රමාණයෙන් 27ක් බවත් එරට මාධ්‍ය සඳහන් කළේය. මීට අමතරව කයිබර් පක්ටුන්ක්වා ප්‍රාන්තයෙන් හා සින්ද් ප්‍රාන්තයෙන් රෝගීන් 22 බැගින් වාර්තා වී ඇති අතර, පන්ජාබ් හා ඉස්ලාමාබාද් නුවරින් ද රෝගියකු බැගින් වාර්තා වී ඇතැයි ඩෝන් පුවත් සේවය සඳහන් කළේය. පෝලියෝ රෝගය පාලනය කිරීම සඳහා පාකිස්තාන රජය විශේෂ වැඩසටහන් ක්‍රියාත්මක කර ඇති අතර, මහා පරිමාණයෙන් එන්නත්කරණ වැඩසටහන් ද, නිවාස වෙත ගොස් දරුවන් එන්නත් කිරීමේ වැඩසටහන් ද සිදුවෙමින් පවතින බව වාර්තා වේ.
