පලස්තීනුවෝ 90ක් ඊශ්‍රායලයෙන් නිදහස / සහනාධාර ට්‍රක් රථ 630ක් ගාසා තීරයට
ලෝක ප්‍රජාව දිගු කාලයක් පුරා බලාපොරොත්තුවෙන් පසුවූ ඊශ්‍රායලය සහ හමාස් සංවිධානය අතර සටන් විරාම ගිවිසුමේ සති 6ක පළමු අදියර ආරම්භ කරමින් ඊශ්‍රායලයෙන් ප්‍රාණ ඇපයට ගත් තරුණියන් තිදෙනකු පෙරේදා රාත්‍රියේ නිදහස් කළ බවත්, ඊට ප්‍රතිචාර ලෙස ඊශ්‍රායලයේ සිරගත කර සිටින පලස්තීන යුද සිරකරුවන් 90 දෙනකු නිදහස ලැබූ බවත් විදෙස් මාධ්‍ය වාර්තා කළේය. මාස 15කට අධික කාලයක් දිග්ගැස්සුණු ගාසා යුද්ධයේ ඓතිහාසික සටන් විරාම ගිවිසුම පලස්තීනුවන්ට මෙන්ම ඊශ්‍රායල ජනතාවට ද සාමය උදා කරනු ඇතැයි සටන් විරාම ගිවිසුම ක්‍රියාත්මක වීමෙන් පසු ලෝක රාජ්‍ය නායකයන් රැසක් ප්‍රකාශ නිකුත් කළ බව ද විදෙස් මාධ්‍ය සඳහන් කළේය. ඊශ්‍රායලයේ මෙන්ම ගාසා තීරයේදී ජනතාව සටන් විරාම ගිවිසුම ක්‍රියාත්මක වීමෙන් දැඩි සතුටට පත්ව සිටි බවත්, වීදි බැස ප්‍රීතිය සැමරීමට එක්රොක් වූ බවත් වාර්තා වේ.
හමාස් සංවිධානය විසින් පළමු දිනයේදී නිදහස් කරනු ලැබුවේ ප්‍රාණ ඇපයට ගෙන සිටි අවුරුදු 24, 28 සහ 31 වයසේ පසුවන තරුණියන් තිදෙනකු බවත්, ඔවුන් ජාත්‍යන්තර රතු කුරුස සංවිධානය වෙත භාර කිරීමෙන් පසු ඊශ්‍රායල භූමියට කැටුව ගිය බවත් වාර්තා වේ. දින 470කට පසු යළි ඊශ්‍රායල භූමියට පා තැබූ තරුණියන් තිදෙනා ඔවුන්ගේ මවුපියන් හමුවීම මෙන්ම පලස්තීන යුද සිරකරුවන් නැවත සිය පවුලේ සාමාජිකයන් හමුවීම ඉතා සංවේදී දසුනක් වූ බව විදෙස් මාධ්‍ය වාර්තා කළේය. ඊට මොහොතකට පසු ඊශ්‍රායල හමුදාව එරට සිරගත කර සිටි පලස්තීන සිරකරුවන් 90 දෙනකු රතු කුරුස සංවිධානය හරහා නැවත හමාස් සංවිධානය වෙත භාර කරනු ලැබූ බව වැඩිදුරටත් වාර්තා වේ. ඒ අතර කාන්තාවන් 69 දෙනකු සහ යොවුන් වියේ පසුවන තරුණයන් 21 දෙනකු සිටි බව වාර්තා වේ. පළමු අදියරේදී පලස්තීන යුද සිරකරුවන් 1900ක් නිදහස් කිරීමට ඊශ්‍රායල අපේක්ෂා කරන බවත්, ඒ වෙනුවට ඊශ්‍රායල ප්‍රාණ ඇපකරුවන් 33 දෙනකු නිදහස් කිරිමට හමාස් සංවිධානය බැඳී සිටින බවත් විදෙස් මාධ්‍ය සඳහන් කළේය.
පසුගිය 2023 වසරේ ඔක්තෝබර් මස 7 වැනිදා ඊශ්‍රායලයට ප්‍රහාරයක් එල්ල කළ හමාස් සංවිධානය ඊශ්‍රායල භූමියට කඩා වැදී එරට වැසියන් 251 දෙනකු පැහැරගෙන ගොස් ප්‍රාණ ඇපයට රඳවා ගෙන සිටි අතර, ඉන් ප්‍රාණ ඇපකරුවන් 91 දෙනකු තවමත් හමාස් සංවිධානය සිටින බව වාර්තා වේ. එහෙත් ඊශ්‍රායල රජය ප්‍රකාශ කර ඇත්තේ ඒ අතුරින් ජීවත්ව සිටින ප්‍රාණ ඇපකරුවන්ගේ සංඛ්‍යාව 60ක් විය හැකි බවය. සටන් විරාම ගිවිසුමට අනුව සතියකට තිදෙනකු හා සිවුදෙනකු බැගින් නිදහස ලැබීමට නියමිත අතර, මීළඟ ප්‍රාණ ඇපකරුවන් නිදහස් කිරිම මේ මස 25 වැනිදා සිදුවන බව හමාස් සංවිධානය නිවේදනය කර තිබේ.
සටන් විරාම ගිවිසුමේ කොන්දේසිවලට අනුව පළමු අදියරේදී දරුවන්, කාන්තාවන් සහ වයවෘද්ධ පුද්ගලයන්ට ප්‍රමුඛත්වය දෙමින් ඊශ්‍රායල ප්‍රාණ ඇපකරුවන් 33 දෙනකු නිදහස් කිරිමට නියමිත අතර, ඒ වෙනුවට පලස්තීන යුද සිරකරුවන් 1900ක් නිදහස් කිරීමට සහ ගාසා තීරයේ ජනාකීර්ණ පළාත්වලින් ඊශ්‍රායල හමුදාව ඉවත් කරගැනීමට ඊශ්‍රායලය ගිවිසුම්ගත වී සිටී. මීට අමතරව අවතැන් වූ පලස්තීනුවන්ට සිය ගම්බිම් කරා යෑමට අවසර ලබාදීම සහ දෛනිකව සිය ගණනාවක සහනාධාර ට්‍රක් රථවලට ගාසා තීරයට ප්‍රවේශවීමට අවසර දීමට ද ඊශ්‍රායලය එකඟ වී තිබේ. සටන් විරාම ගිවිසුමට අනුව දිනකට සහනාධාර ට්‍රක් රථ 600ක් ගාසා තීරයට යායුතුව ඇති අතර, පළමු දිනය වූ ඉරිදා එවැනි සහනාධාර ට්‍රක් රථ 630ක් ගාසා තීරයට පිටත් වූ බව වාර්තා වේ.
