ක්‍රිකට් ක්‍රීඩා ලෝකයේ සනත් ජයසූරිය විරුවකු බවට පත්ව ඇත්තේ ඔහුගේ ආකර්ෂණීය ක්‍රීඩා විලාසය නිසාය. 1996 ලෝක කුසලාන තරගාවලියේ දී ඔහු අනුකම්පා විරහිත පහර දෙන්නෙක් විය. ලෝක පූජිත ඉන්දීය ක්‍රිකට් කණ්ඩායමට දිගට හරහට පහර දුන් සනත්ගේ ක්‍රීඩා විලාසය නිසා ඉන්දීය පිලේ මනෝජ් ප්‍රභාකර්ට ගෙදර යෑමට ද සිදු විය.
අපට සනත් ජයසූරියගේ සික්සර් කතාව මතකයට නැඟෙන්නේ කළුතර කටුකුරුන්දේ දී පෙරේදා (19) පැවති ජන හමුව අමතමින් ජනපති අනුර කුමාර දිසානායක කළ කතාව හේතුවෙනි. පූර්ව ප්‍රචාරක දැන්වීම්වලින් තොරව පැවති මේ ජන හමුවේ දී ඔහු විසින් සිදු කරන ලද කතාවේ ‘දේශපාලනික සික්සර්’ රැසක් අන්තර්ගත බව හඳුනා ගත හැකිය.
මෙය ජනාධිපතිවරයාගේ චීන සංචාරයෙන් පසු පැවති පළමු ජන හමුවයි. එමෙන්ම මහමැතිවරණයෙන් පසු පැවති පළමු ජන හමුව ද වේ. ඔහු එහි දී මුලින් ම පැවසුවේ මේ හමුව මීට පෙර සිදු කළ යුත්තක් වුවත්, ඊට පෙර සිදු කළ යුතු ක්‍රියාකාරකම් රැසක් පැවති හෙයින් එය කල් දැමීමට සිදු වූ බවයි.
වර්තමාන ආණ්ඩුව පිළිබඳ බලාපොරොත්තු පළ කළ බොහෝ ජනතාව තුළ පැවති කනස්සලුසහගත සිදුවීම් රැසකට ආමන්ත්‍රණය කිරීමට ඔහුගේ කතාව සමත් වූ බව අපේ හැඟීමයි.
ඔහු පළමුවෙන් ම සඳහන් කළේ, පතුලටම බිඳවැට්ටවූ රාජ්‍යයක් එක්වර නඟාසිටුවීම කළ නොහැකි බවයි. ඒ සඳහා නිශ්චිත විධිමත් ක්‍රමවේද අවශ්‍ය බවත්, ඇතැම් රාජ්‍ය නිලධාරි පන්තියෙන් ඊට ලැබෙන සහාය පිළිබඳ තමාගේ ද ප්‍රසාදජනක හැඟීමක් නැති බවය. එමෙන් ම හොරුන් ඇල්ලීම පිළිබඳ නිශ්චිත නීති ක්‍රමවේදයක් සකස් කරන බව ද පැවසූ ජනාධිපතිවරයා ඒ සඳහා ඉවසිල්ලෙන් සිටින ලෙස ද ඉල්ලා සිටියේ ය.
ජනතාව පීඩාවට පත්ව සිටිය දී සුඛිත මුදිත ජීවිත ගත කරන ඇමැතිවරුන් මින් ඉදිරියට නැති බවත්, හිටපු ඇමැතිවරුන්ගේ සැප වාහන වෙන්දේසි කොට භාණ්ඩාගාරයට මුදල් ගෙන එන බවත් ඔහු වැඩිදුරටත් සඳහන් කළේ ය. එමෙන්ම රට පුරා ඇති ජනාධිපති මන්දිරවලින් කිහිපයක් පමණක් ඉතිරි කොට ගෙන, ඉතිරි ඒවා සංචාරක මධ්‍යස්ථාන සහ අධ්‍යාපනික මධ්‍යස්ථාන බවට පත් කිරීමට ඇති හැකියාව සොයා බැලීමට කමිටුවක් පත් කරන බව ද ඔහු සඳහන් කළේ ය.
ජනාධිපති වැය ශීර්ෂය අඩකින් කප්පාදු කොට ඇති බව ද, හිටපු ජනාධිපතිවරුන්ගේ ආරක්ෂාව වෙනුවෙන් රාජ්‍ය ධනය වැය කිරීම යම් පමණකට නතර කොට ඇති බව ද ඔහු සඳහන් කළේ ය. හිටපු ජනාධිපති මහින්ද රාජපක්ෂ මහතා ආරක්ෂකයන් දෙසීයක් පිරිවරා ගෙන සිටි බවත්, ඔහුගේ නිල නිවෙසේ මාසික කුලිය ලක්ෂ හතළිස් හයක් බවත් සඳහන් කළේ ය.
මේ ආකාරයට වූ තවත් කරුණු රැසක් එකී රැස්වීමේ දී ජනාධිපතිවරයා විසින් හෙළිදරවු කරනු ලැබූ අතර, එය වර්තමාන ආණ්ඩුව පිළිබඳ යම් විපිළිසර හැඟීමකින් යුතු ජනතාවට දුන් නිශ්චිත පිළිතුරක් ද විය.
ක්ෂණික සහන සහ ඉක්මන් ක්‍රියාමාර්ග අපේක්ෂා කරන ජනතාවට ඉවසිලිවන්තව සිටින ලෙස ද මේ කතාවෙන් කියවිණි.
ජනාධිපතිවරයා විසින් කරන ලද මේ කතාව හුදු දේශපාලනික රැස්වීමක කරන ලද කතාවක් ලෙස පමණක් කියවා නොගෙන, එහි දේශපාලනික අර්ථය කියවා ගන්නා ලෙස අපි ඉල්ලා සිටිමු.
රාජ්‍යතාන්ත්‍රිකභාවය සහ දේශපාලනික දුරදැක්ම පිළිබඳ කතාබහ ද මෙහි අන්තර්ගතය.
පොදු සමාජයේ ජනතාව යනු ඉතා ක්ෂණික ක්‍රියාමාර්ග අපේක්ෂා කරන පිරිසකි. ඔවුහු ඉතා ඉක්මනින් ම අපේක්ෂා භංගත්වයට පත් වෙති. ඇතැම් කාරණා පෞද්ගලික මනෝභාවය මත පදනම් වූ ඒවා ය. ඇතැමකුට ඇත්තේ ඉතා දුර දේශපාලනික අවබෝධයකි. මේ සියල්ල කළමනාකරණය කර ගැනීම විමසිලිමත් දේශපාලන නායකයකුට අත්‍යවශ්‍ය ය.
රට නිවැරදි දිශාවට හරවා ගැනීම පිළිබඳ සහ ක්ලීන් ශ්‍රී ලංකාවක් ගොඩනැඟීම සම්බන්ධයෙන් රජයේ දැක්ම හා අවබෝධය පිළිබඳ වඩා පුළුල් සන්නිවේදන ක්‍රියාවලියක් අත්‍යවශ්‍ය බව අපි අපේක්ෂා කරමු.
කලකිරුණු ජනතාවට ඇත්තේ සන්නිවේදන ගැටලුය. එය නිවැරදි කිරීමට ජනාධිපතිවරයාට පමණක් නොහැකි ය. එබැවින් වෙනස්වනසුලු මනෝභාවයකින් යුතු ජන සමාජයට මෙකී සන්නිවේදන ක්‍රියාවලියේ අවුල ලිහා ගැනීමට අපි සියල්ලෝ ම සමත් විය යුතු ය.
අපි යළිත් සනත් ජයසූරියගේ උදාහරණය දෙසට හැරෙමු. ඔහු ලෝක පූජිත ක්‍රීඩකයකු වීමේ දී, ලැබෙන හැම පන්දුවකට ම පිත්ත දැම්මේ නැත; නිපන්දුව සහ නීති විරෝධි පන්දුව හොඳින් හඳුනා ගෙන ඊට මුහුණ දුන්නේ ය.
ජයසූරිය ක්‍රීඩා කරන කාලයේ නිපන්දු වෙනුවට දඬුවමක් ලෙස ලැබෙන ‘ෆ්‍රී හිට්’ ක්‍රමය තිබුණේ නැත. එදා ජයසූරියට නොලැබුණු වාසිය දේශපාලනයේදී ජනපති අනුර කුමාරට හිමිව තිබේ. එනම්: දේශපාලන නිපන්දුවලට ‘ෆ්‍රී හිට්’ ගැසීමට අවස්ථාව උදා වී තිබේ.
එහෙයින් දේශපාලනය, දේශපාලනික අර්ථයෙන් තේරුම් ගෙන, ප්‍රතිවිරුද්ධ පාර්ශ්වයේ හැම පන්දුවකට ම පෙරළා පහර දිය යුතු නැත. ඔවුන්ගේ ප්‍රතිප්‍රහාර බහුතරය දේශපාලනික නිපන්දු සහ නීති විරෝධි පන්දු වේ. ඒවාට දේශපාලනික සික්සර් ගැසීමට ජනාධිපතිවරයා ප්‍රමුඛ ආණ්ඩුවට හැකියාව ඇතැයි අපි සිතමු.
වඩාත් යහපත් පිරිසුදු ශ්‍රී ලංකාවක් පිළිබඳ බලාපොරොත්තු පළ කළ පොදු ජනතා අපේක්ෂාව වන්නේ ද එයයි.
