කඩේට ආ හිතවතා පන්සල් එක්ක ගිහින් එලොව පොල් පෙන්වූ මුදලාලි

දැන් පොල් ගෙඩියක මිල රුපියල් 200කටත් වැඩියෙන් ඉහළ ගොසිනි. මේ කතාව කියන්නේ පොල් ගැන වන අතර පොල් හිඟයක් ඇති ප්‍රදේශයක් ගැනය. මේ ගමේ කඩේ මුදලාලි කළුකඩ කාරයෙක් බව මුළු ගමම දන්නා කතාවකි. මුදලාලිගේ සමීපතම හිතවතකු එදා දහවල් ඒ කඩයට ගොඩවුණේ ‘ආ.. මුදලාලි කොහොමද? පොල් ගෙඩියක් ගන්න තියෙනවාද?’ යැයි අසමිනි. ඔහු කඩේ පිලේ සිට වටපිට බැලුවත් ‘පොල්’ නම් දුටුවේ නැත.

‘පොල් නැද්ද මුදලාලි?’ ඔහු යළිත් ඇසුවේය. ඒත් මුදලාලිගෙන් උත්තරයක් නැත. මුදලාලි උන්නේ හෙන කල්පනාවකය.

‘‘මහත්තයා බයිසිකලයෙන් නේද ආවේ?. යමුකෝ පොඩි ගමනක් මේ ළඟට ගිහින් එන්න. විනාඩි 30න් ආපහු එන්න පුළුවන්.” යැයි කියූ මුදලාලි, අනාරාධනයෙන්ම හිතවතා කැටුව ගොස් ඔහු සමඟ යතුරුපැදියට ගොඩවූයේය.

‘‘කොහේ යන්නද මුදලාලි මේ තකහනියේ?”

‘‘යමුකෝ පන්සලට පොඩ්ඩක් දුවලා එමු“

හනි හනිකට විහාරස්ථානයට ගිය මුදලාලි පන්සලේ වැඩහුන් විහාරාධිපති හිමියන්ට දණ ගසා වැඳ එකත්පස්ව හිඳ, ‘අපේ හාමුරුවනේ මේ මගේ යාළුවෙක්. මෙයා ගැන දන්නවා නේද? මෙයා ගැන නොදන්න කෙනෙක් නැහැ නොවැ’ යැයි කීවේ ඒ පුද්ගලයා මුළු ගමේම ප්‍ර‍සිද්ධ චරිතයක් වූ නිසාවෙනි.

‘‘ආ.. මම මේ මහත්තයා ගැන හොඳට අහලා තිබෙනවා. නමුත් දැක්කේ අදනේ.” යැයි පැවසූ හිමියෝ ඔවුන් දෙදෙනාට වාඩිවීමට අසුනක් පනවා ආගිය තොරතුරු කතා කළහ.

එසේ කතා කරමින් සිටින අතරේ මුදලාලි විහාරාධිපති හිමියන්ට පැවසුවේ ‘‘අපි ආවේ නම් උදව්වක් ඉල්ලා ගන්නයි. මේ මහත්තයාට පොල් ටිකක් ඕනෑ වෙලා තිබෙනවා. අපේ කඩෙත් පොල් නැහැ. මෙහෙවත් තියෙයිද කියලා බලන්නයි ආවේ. අපේ හාමුදුරුවනේ” යනුවෙනි.

‘‘ආ බලමුකෝ” යැයි කියූ හාමුදුරුවෝ ‘ඒයි, කොල්ලෝ පොඩ්ඩක් මෙහෙට වරෙන් කෝ.’ යැයි තරුණයකු ඇමතු විට විනාඩි දෙක තුනකින් ස්ථානයට පැමිණි තරුණයාට හාමුදුරුවෝ පැවසුවේ ”පහළ තිබෙන පොල් ගොඩෙන් පොල් ගෙඩි දහයක් ලෙලි ගහලා මේ මහත්තයාට දීපන්. හැබැයි සල්ලි ගන්න එපා. මේ මහත්තයා වටිනා කෙනෙක්.” යැයි කීහ. පසුව උන්වහන්සේ එම ස්ථානයෙන් වෙනත් වැඩකට පිටත්ව ගියහ.

ඇබිත්ත කොලුවා ලෙලි ගසා දුන් පොල් ගෙඩි 10 මල්ලකට දමාගත් මුදලාලි පෙරළා මිතුරා සමඟ කඩේට පැමිණියේය.

වහාම මල්ලෙන් පොල් ගෙඩි දෙකක් අතට ගත් මුදලාලි ‘‘ආ, මේ පොල් ගෙඩි දෙක මහත්තයාට මං ගානේ. මේකට සල්ලි එපා.” යැයි කියා මිතුරා අත පොල් ගෙඩි දෙකක් තැබු මුදලාලි ඉතිරි පොල් ගෙඩි 08ම එකක් රුපියල් 160ක් වැනි මිලට පැමිණ සිටි පාරිභෝගිකයන්ට අලෙවි කළේ කිසිම මහන්සියක් නොමැතිව රුපියල් දහසකට අධික මුදලක් තමන්ට ලැබීමේ සතුට ද සමඟිනි. මේ සියල්ල දෙස අසිහියෙන් මෙන් බලා සිටි මුදලාලිගේ හිතවතාට නම් ඒ වෙලාවේ ‘එලොව පොල්’ පෙනෙන්න ගත් බව මේ පුවත දත්, කඩයට පැමිණ සිටි අය කියනු ඇසිනි.

හසලක සමූහ – ඊ.එම්.එස්. ඒකනායක