මහනුවර ක්‍රීඩා සමාජය සහ ශ්‍රී ලංකා නාවික හමුදා ක්‍රීඩා සමාජය අතර ඊයේ නිත්තවෙල ක්‍රීඩාංගණයේ පැවැති තරගය විනිශ්චය කරමින් අන්තර් සමාජ පළමු පෙළ පිරිමි ලීග් තරගයක් විනිශ්චය කළ පළමු තීරකවරිය ලෙස චරනි තීක්ෂණා ලියනගේ ඉතිහාසයට එක් වූවාය. 33 හැවිරිදි චරනි ලියනගේ මෙරට පාසල් පළමු පෙළ ලීග් රග්බි තරගයක් විනිශ්චය කළ පළමු තීරකවරිය ලෙස ඉතිහාසයට එක් වූයේ පසුගිය වසරේ අන්තර් පාසල් ලීග් රග්බි තරගාවලියේ තර්ස්ටන් හා වෙස්ලි විදුහල් අතර පැවති තරගයේ තීරකවරිය ලෙස කටයුතු කරමිනි.
දෙමටගොඩ සාන්ත අන්තෝනි විදුහලෙන් ක්‍රීඩාවට පිවිසි ඇය වසර 2015 සිට ශ්‍රී ලංකා යුද හමුදා කාන්තා රග්බි පිලට එක්වූ අතර, 2016 සිට පසුගිය වසර දක්වා ජාතික කාන්තා රග්බි කණ්ඩායම නියෝජනය කළාය. ඇය වසර 2022 සිට ශ්‍රී ලංකා රග්බි තීරකවරුන්ගේ හා විනිසුරුවරුන්ගේ සංගමයේ සාමාජිකාවකි.
