බළන්ගොඩ, අලුත්නුවර, පරණපට්ටිය ගම්මානයට පෙරේදා (18) අලුයම ඉතිහාසයේ පළමු වරට වනඅලි පැමිණ ආර්ථික භෝග රැසක් විනාශ කර දමා ඇති බව පරණපට්ටිය ගම්මානයේ පදිංචි ජනතාව පවසති. කෙසෙල්, පොල්, ගම්මිරිස්, කිතුල්, අල ඇතුළු වගා හානි රැසක්ම සිදුකර තිබෙන බව එම ජනතාව පෙන්වාදෙති. මීට පෙර කිසිදු දිනෙක මෙම පරණපට්ටිය ප්‍රදේශයට වනඅලි පැමිණ නොමැති බව පවසන ගම්වාසීහු, මෙම ප්‍රදේශයේ නිවාස විස්සක් පමණ තිබෙන බවත්, නිවෙස්හි මිදුල්වලට පවා වනඅලි ඇවිත් පලංචියක් කඩා දමා තිබෙන බවත්, මේ හේතුවෙන් නිවෙස්වල සිටීමට පවා බියක් ඇතිවී තිබෙන බවත් ප්‍රකාශ කළහ. මේ සම්බන්ධයෙන් ඩබ්.ඒ. වික්‍රමරත්න මහතා මෙසේ කීවේය.
මේ ගම්මානයට මීට පෙර වනඅලි ආවා කියලා අපි අහලා නැහැ. පාන්දර හතරට විතර මිදුලේ විශාල ශබ්දයක් ඇහුණා. මම ගිහින් ටෝච්එක ගහල බලනකොට මිදුලේ හදලා තිබුණ පලංචිය කඩනවා. මිදුලේ හිටවලා තිබුණ අල, කෙසෙල්, පොල් ගස් ගලවලා විනාශ කරලා. කිතුල් ගස් කිහිපයක් සහ ගම්මිරිස් වැල් ගලවලා දමලා. අලි තුන්දෙනකු ඇවිත් පැනලා දිව්වා. අපි ඉල්ලා සිටින්නේ මේ අලි ප්‍රශ්නය වැඩිවෙන්න කලින් මේක පාලනය කරන්න කියලයි.
පී.ආර්. සුනිල් සෙනවිරත්න මහතා මෙසේ අදහස් දැක්වීය.
‘මේ දවස්වල කුඹුරු වගා කරලා තිබෙනවා. ආයේ පාරක් ආවොත් කුඹුරු ටිකත් විනාශ කරලා යයි. ආපු පළවැනි පාරම මිදුල්වලට ඇවිත් මෙහෙම විනාශයක් කළා කියන්නේ රෑට නිවෙස්වල නිදාගෙන ඉන්න පවා බයයි. අපි මේ ගැන ඉඹුල්පේ ප්‍රදේශීය ලේකම් කාර්යාලයට දැනුම් දුන්නා. නිලධාරීන් ඇවිත් බලලා ගියා. සමනලවැව රක්ෂිතයේ ඉන්න අලි තමයි මේ පැත්තට එන්න ඇත්තේ. මේ තත්ත්වය තවදුරටත් වැඩිවෙන්න කලින් අලි වැටක් හෝ ගහලා මේ ප්‍රශ්නය විසඳන්න කියලා අපි බලධාරීන්ගෙන් ඉල්ලා සිටිනවා.’
