අතිවිශාල ජනතා මුදලක් වැය කරමින් අක්‍රමවත්ව තනාගෙන යන අත්තනගලු ඔයේ මංගලතිරිය පාලම නිරීක්ෂණය කිරීම සඳහා ඉකුත් 17 දා පෙරවරුවේ ජාතික ඒකාබද්ධතා කටයුතු නියෝජ්‍ය අමාත්‍ය මුනීර් මුලව්ෆර් හා පාලක පක්ෂයේ ගම්පහ දිස්ත්‍රික් පාර්ලිමේන්තු මන්ත්‍රී රුවන් මාපලගම යන මහත්වරු ප්‍රමුඛ පිරිසක් පැමිණ කරන ලද සොයා බැලීමකදී, කිසිදු ටෙන්ඩර් පටිපාටියකින් හා විනිවිදභාවයකින් තොරව අක්‍රමවත්ව ඉදිකිරීම් කටයුතු කරන බවට අනාවරණයවීම හේතුවෙන් ඒ පිළිබඳව විධිමත් පරීක්ෂණයක් පැවැත්විය යුතු බව ඔවුහු ප්‍රකාශ කළහ.
කොළඹ – මහනුවර ප්‍රධාන මාර්ගයේ කළගෙඩිහේන මංසන්ධියේ සිට මංගලතිරිය, බෝගමුව, පිලංකඩ හරහා කොස්හේන දක්වා දිවෙන මාර්ගයේ අත්තනගලු ඔය හරහා ඇති මංගලතිරිය පාලම, වසර තුනකටත් වඩා වැඩි කාලයක් තිස්සේ කැඩී විනාශවී යාම හේතුවෙන් වාහන ධාවනය කළ නොහැකිව පාසල් දරු දැරියන් ඇතුළු දහස් ගණනක ජනතාවක් දැඩි පීඩාවන්ට පත්ව සිටිති. පසුගිය පාලන සමයේ එම පාලම සම්පූර්ණයෙන්ම කඩා ඉවත් කර නව පාලමක් තැනීම ආරම්භ කෙරිණි. ජනතා අදහස් විමසීමකින් හා ටෙන්ඩර් පටිපාටියකින් තොරව එම පාලමේ තැනීම් කටයුතු කරගෙන යන අතරතුර පසුගිය ජනාධිපතිවරණය සඳහා නාමයෝජනා භාර දීමත් සමඟ තැනීම් කටයුතු සම්පූර්ණයෙන්ම නවතා තිබිණ.
මේ හේතුවෙන් ජනතාව බලධාරීන් දැනුම්වත් කිරීමෙන් අනතුරුව මහමැතිවරණයෙන් පසුව නැවතත් පාලම තැනීමේ කටයුතු ආරම්භ කර ඇතත්, එය මන්දගාමීව හා විනිවිදභාවයකින් තොරව කරගෙන යන බවට ලද තොරතුරකට අනුව ජාතික ඒකාබද්ධතා කටයුතු නියෝජ්‍ය අමාත්‍ය මුනීර් මුලව්ෆර් හා ගම්පහ දිස්ත්‍රික් පාර්ලිමේන්තු මන්ත්‍රී රුවන් මාපලගම යන මහත්වරු ප්‍රමුඛ පිරිසක් එම ස්ථානයට පැමිණ කරන ලද සොයා බැලීමකදී, හිටපු දේශපාලකයකුගේ මැදිහත් වීම යටතේ විද්‍යාත්මක පදනමකින් තොරව හා විනිවිදභාවයකින් තොරව ඉදිකිරීම් කටයුතු කරගෙන යන බවට අනාවරණය විය. එමෙන්ම ටෙන්ඩර් පටිපාටියකින් තොරව එය තනාගෙන යන බව ද එහිදී අනාවරණය විය.
මෙහිදී මාධ්‍යවේදියකු නැඟූ ප්‍රශ්නයකට පිළිතුරු දෙමින් පා.ම. රුවන් මාපලගම මහතා මෙසේ කීය.
‘මෙවැනි ඉදිකිරීමක් කරන විට සාමාන්‍යයෙන් වැය වන මුදල මේ ස්ථානය තුළ දැන්වීම් පුවරුවක් මඟින් මහජනතාවට ප්‍රදර්ශනය කළ යුතු වෙනවා. මෙතන එහෙම දෙයක් සිද්ධ වෙලා නැහැ. අනෙක් පැත්තෙන් විශාල උසකින් යුතුව මෙය තනාගෙන යනවා. කොහොම නමුත් මේ පිළිබඳව විධිමත් පරීක්ෂණයක් පැවැත්විය යුතු වෙනවා.’
මේ අවස්ථාවට ජාතික ජන බලවේගයේ අත්තනගල්ල ප්‍රධාන සංවිධායක පුබුදු කපුරුගේ මහතා හා පීඩාවට පත් ගම්මානවල ග්‍රාම නිලධාරී මහත්ම මහත්මීන්, සමෘද්ධි සංවර්ධන නිලධාරී මහත්ම මහත්මීන් ඇතුළු ග්‍රාමීය මට්ටමේ නිලධාරී මහත්ම මහත්මීන් පිරිසක් ද සහභාගී වූහ.
