කුරුණෑගල, හංගමුව නි‍ෙවසක සේප්පුවක සඟවා තිබිය දී සොයාගත් රුපියල් කෝටි 28කට අධික මුදල “හරක් කටා” නමැති පාතාලයේ මත්කුඩු ජාවාරම්කරුගේ ප්‍රධාන ගෝලයකු වන රන්මල්ලී විසින් මත්ද්‍රව්‍ය ජාවාරමෙන් උපයාගත් මුදල් බව මෙතෙක් කර ඇති විමර්ශනවලින් හෙළිවී තිබේ.
හරක් කටාගේ එම ගෝලයා මේ වනවිට රැඳී සිටින්නේ ඩුබායි හි බවත් හරක් කටා, මැඩගස්කරයේ දී අත්අඩංගුවට පත්වීමෙන් අනතුරුව හරක් කටාගේ මත්කුඩු ජාලය මෙහෙයවා ඇත්තේ ඔහු විසින් බවටත් සැකකරන තොරතුරු අනාවරණය වී ඇත. හරක් කටාගේ මත්කුඩු ජාලය ගැන තොරතුරු විමර්ශනයේ දී හෙළිවූ සැකකරුවකු සම්බන්ධයෙන් කළ දීර්ඝ විමර්ශනයක ප්‍රතිඵලයක් ලෙස එම සැකකරු කොටුකර ගැනීමෙන් අනතුරුව මත්කුඩු ජාවාරමෙන් උපයාගන්නා මුදල් ආරක්ෂිතව සඟවා තබා ගැනීමට යොදාගත් කුරුණෑගල, බෝගමුව පොලිස් වසමේ හංගමුවේ පිහිටි නි‍ෙවස ගැන තොරතුරු හෙළිකර ගැනීමට පොලිස් මත්ද්‍රව්‍ය කාර්යාංශය සමත්ව ඇති බව සඳහන්ය.
වැඩ බලන පොලිස්පති නීතීඥ ප්‍රියන්ත වීරසූරිය මහතාගේ උපදෙස් මත මත්කුඩු ජාලය බිඳ දැමීමටත් අපරාධ මර්දනයටත් විශේෂ පොලිස් මෙහෙයුමක් දිවයිනපුරා පැවැත්වේ. පොලිස් මත්ද්‍රව්‍ය කාර්යාංශය එම මෙහෙයුමට සමගාමීව මෙම වැටලීම දියත් කර තිබේ. කුරුණෑගල, දොරටියාව පොලිස් වසමේ තෝරයා‍ය, කිරිවවුල ප්රදේශයේ දී පොලිස් මත්ද්‍රව්‍ය කාර්යාංශයේ මහනුවර උප ඒකකයේ නිලධාරීන් විසින් සිදුකරන ලද වැටලීමක දී අයිස් මත්ද්‍රව්‍ය ග්‍රෑම් 18ක් සන්තකයේ තබාගත් පුද්ගලයකු කැබ් රථයකින් ගමන්කරමින් සිටිය දී අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිවේදී බුද්ධික මනතුංග මහතා සඳහන් කළේය.
මෙම සැකකරු ගමන් කළ කැබ් රථයේ රියැදුරු අසුන යට බෑගයක තිබී හෙරොයින් ජාවාරමෙන් උපයාගත් බවට සැකකරන රුපියල් දෙකෝටි තිස්පන් ලක්ෂයක මුදලක් හා මැණික් ගල් බවට සැකකරන විවිධ වර්ණවලින් යුත් පාෂාණ කොටස් 70ක් පමණ තිබී හමුවී ඇති බව ද පොලිස් මාධ්‍ය ප්‍රකාශකවරයා සඳහන් කළේය. ප්‍රශ්න කිරීමේ දී සැකකරුගෙන් හෙළිවූ තොරතුරු මත හංගමුව ප්රදේශයේ සැකකරු පදිංචිව සිටි නි‍ෙවසට ගොස් පරීක්ෂා කිරීමේ දී එහි තිබුණු සේප්පුවකින් රුපියල් විසිපන්කෝටි අනූඅට ලක්ෂයක මුදලක් හමුවූ බව ද බුද්ධික මනතුංග මහතා පවසයි. මෙම මුදල් නීත්‍යානුකූලව උපයාගත් ආකාරයක් අනාවරණය නොවූ බවත් මත්ද්‍රව්‍ය ජාවාරමෙන් උපයාගත් මුදල් බව විමර්ශනවලින් හෙළිවූ බවත් පොලිසිය කියයි. මෙම නිවෙස පිහිටි ගෙවත්තේ වෑන් රථයක් ද තිබී පොලීසියට හමුවී ඇත. එම වෑන් රථය ද මත්ද්‍රව්‍ය ජාවාරමෙන් උපයාගත් මුදල්වලින් මිල දී ගෙන ඇති බව පෙනී ගොස් තිබේ.
මෙම මුදල් සමඟ අත්අඩංගුවගත් සැකකරු ඩුබායි හී රැ දී සිටින මත්කුඩු ජාවාරම්කරුවකුගේ සමීපතමයකු බවත් ඔහුගේ මෙහෙයවීම මත මෙම සැකකරු මත්කුඩු ජාවාරම සිදුකර ඇති බවත් දැනට සිදුකළ විමර්ශනවලින් අනාවරණය වී ඇති බවත් පොලිස් මාධ්‍ය ප්‍රකාශක සඳහන් කරයි. මෙම සැකකරු අවුරුදු 39ක් වයසැති අයකු බවත් ව්‍යාපාරිකයකු ලෙස පෙනී සිට ඇති බවත් පොලිස් මත්ද්‍රව්‍ය කාර්යාංශය සඳහන් කළේය. ඉබ්බාගමුව, හංගමුවේ ඔහු තාවකාලිකව පදිංචිව සිට ඇති බවත් ඔහු දික්වැල්ලේ, බතීගම පදිංචිකරුවකු බවත් විමර්ශනවලින් හෙළිවී තිබේ. මෙරට ඉතිහාසයේ මත්කුඩු ජාවාරම්කරුවකුගේ මුදල් මෙතරම් ප්‍රමාණයක් සොයාගත් පළමු අවස්ථාව මෙය වන බව පොලිස් තොරතුරු සඳහන් කළේය. මෙම මුදල් මත්කුඩු ජාවාරමෙන් උපයාගත් ඒවා බව මත්ද්‍රව්‍ය කාර්යාංශයට ලැබී ඇති තොරතුරුවල සඳහන්ය.
මැඩගස්කරයේ සිට මෙරටට රැගෙන ඒමෙන් අනතුරුව අපරාධ පරීක්ෂණ දෙපාර්තමේන්තුව තුළ හරක් කටාව වසරකට වැඩි කාලයක් තිස්සේ රඳවාගෙන පරීක්ෂණ පැවැත්වූ අපරාධ පරීක්ෂණ දෙපාර්තමේන්තුවේ නිලධාරීන්ට පවා හරක් කටාගේ මෙම මත්කුඩු ජාලය ගැන කිසිදු තොරතුරක් සොයා ගැනීමට හැකියාවක් ලැබී නොතිබුණි. හරක් කටා අපරාධ පරීක්ෂණ දෙපාර්තමේන්තුවේ රඳවාගෙන සිටි කාලය තුළ දූෂිත නිලධාරීන් ඇතුළු විවිධ තරාතිරමේ පුද්ගලයන් ඔහුගෙන් විවිධ වරප්‍රසාද ලබාගත් බව කියැවේ.
පොලිස් මත්ද්‍රව්‍ය කාර්යංශය විසින් හෙළිකරගෙන ඇති තොරතුරුවලට අනුව හරක් කටා බන්ධනාගාරගතව සිටිමින් ද මත්කුඩු ජාවාරම මෙහෙයවනු ලබයි. හරක් කටාගෙන් කර ඇති ප්‍රශ්න කිරීම්වල දී ඔහු පවසා ඇත්තේ තමා අවස්ථා 10ක දී එකවර කිලෝ 400 බැගින් මත්කුඩු කිලෝ 4000ක් මුහුදු මාර්ග ඔස්සේ ගෙනවිත් ඇති බවය. එම මත්කුඩුවලින් කිලෝ 400ක ප්‍රමාණයක් හැරුණුකොට සෙසු සියලුම මත්කුඩු ගොඩබිමට රැගෙනවිත් බෙදා හැර ඇති බව ද ඔහු පවසා තිබේ. එක් මත්ද්‍රව්‍ය කිලෝවකින් ඔහුට ලැබෙන ශුද්ධ ආදායම රුපියල් ලක්ෂ 25ක් වන බව ද ඔහු ප්‍රශ්න කිරීම් හමුවේ පවසා තිබේ. හරක් කටා මේ වනවිට බන්ධනාගාරගතව සිටින අතර ඔහු නැවතත් මත්කුඩු ජාවාරම බන්ධනාගාරයේ සිට සිදුකරන බවට සැකකරන තොරතුරු ඔස්සේ විමර්ශන ද සිදුවෙමින් පවතියි.
පසුගිය වසරේ සැප්තැම්බර් 23 වැනිදා සිට 2025 වසරේ ජනවාරි 10 දක්වා කාලය තුළ කළ වැලීම්වලින් සහ මෙහෙයුම්වලින් හෙරොයින් කිලෝ 373ක්, ගංජා කිලෝ 3, 504ක්, අයිස් කිලෝ 751ක්, කොකෝන් කිලෝ 7ක්, හෂීස් කිලෝ 167ක් සහ වෙනත් මත්ද්‍රව්‍ය කිලෝ 482ක් සොයාගෙන ඇති බව වැඩ බලන පොලිස්පති නීතීඥ ප්‍රියන්ත වීරසූරිය මහතා සඳහන් කළේය.
