දීර්ඝ කාලයක් පුරා පලස්තීන ජනතාව පීඩාවට පත් කළ යුද ගැටුම් තාවකාලිකව අත්හිටුවමින් ගාසා තීරයේ සටන් විරාම ගිවිසුම ආරම්භ වූ බව විදෙස් මාධ්‍ය වාර්තා කළේය. සටන් විරාමය ආරම්භ වූයේ පළමු දිනයේදී නිදහස් කිරීමට නියමිත ඊශ්‍රායල ප්‍රාණ ඇපකරුවන්ගේ නම් ලැයිස්තුව නිකුත් කිරීම හමාස් සංවිධානය විසින් ප්‍රමාද කරනු ලැබීම හේතුවෙන් නියමිත වේලාවට වඩා පැය තුනකට පසුව බව ද විදෙස් මාධ්‍ය වැඩිදුරටත් වාර්තා කළේය.
අදියර 3කින් ක්‍රියාත්මක වන ගාසා සටන් විරාමයේ පළමු දිනයේදී ඊශ්‍රායල ප්‍රාණ ඇපකරුවන් තිදෙනකු නිදහස් කිරීමට හමාස් සංවිධානය එකඟතාව පළ කර තිබූ අතර, ඒ අනුව ඊශ්‍රායල ජාතික කාන්තාවන් තිදෙනකු නිදහස ලැබීමට නියමිතව තිබූ බවද වාර්තා වේ. ප්‍රාණ ඇපකරුවන්ගේ නම් ලැයිස්තුව නිකුත් කිරීම ප්‍රමාද වූ පැය කිහිපය තුළදිත් ඊශ්‍රායල හමුදාව ගාසා තීරයට ගුවන් ප්‍රහාර එල්ල කර ඇතැයි ද, එම ප්‍රහාරවලින් පුද්ගලයන් 19 දෙනකු ජීවිතක්ෂයට පත්වී ඇතැයි ද විදෙස් මාධ්‍ය සඳහන් කළේය.
