ශ්‍රී ලංකා දුම්රිය දෙපාර්තමේන්තුවේ ඔන්ලයින් ආසන වෙන් කිරීමේ ක්‍රියාවලියේදී එම ටිකට්පත් ක්ෂණිකව මිලදී ගෙන ඒවා වැඩි මිලකට වෙනත් පුද්ගලයන්ට අලෙවි කිරීමේ ජාවාරමක් සම්බන්ධයෙන් විමර්ශනයක් ආරම්භ කර ඇතැයි අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශය, කොළඹ ප්‍රධාන මහේස්ත්‍රාත් තනූජා ලක්මාලි මහත්මියට අද (20) දැනුම් දෙනු ලැබීය.
දුම්රිය දෙපාර්තමේන්තුවේ සාමාන්‍ය අධිකාරිවරයා අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශයට කරන ලද පැමිණිල්ලකට අනුව මෙම විමර්ශනය ආරම්භ කර ඇති බවද විමර්ශන නිලධාරීහු අධිකරණයට දන්වන ලදී.
මෙම සිද්ධියට අදාළව විමර්ශන සිදුකර එහි ප්‍රගතිය පිළිබඳ වාර්තාවක් ඉතා කඩිනමින් අධිකරණයට ඉදිරිපත් කිරීමට පියවර ගන්නා බවද සිද්ධිය සම්බන්ධයෙන් වැඩිදුරටත් කරුණු දක්වමින් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශය අධිකරණයට දන්වා සිටියේය
කල්පනි අබේසිංහ
