ගන්දර පොලිස් වසමේ තලල්ල දකුණ, පානාර හන්දියට නුදුරින් පිහිටි වංගුවේ දී බස් රථ දෙකක් එකිනෙක මුහුණට මුහුණලා ගැටීමෙන් ඇතිවූ රිය අනතුරකින් තුවාල ලැබූ මගීන් 61 දෙනකු පමණ මාතර මහ රෝහලට ඇතුළත් කර ඇත. තුවාල ලැබූවන් අතර විදේශිකයකු, කාන්තාවන් 30ක් හා දරුවන් තිදෙනකු වන බව පොලීසිය පැවසුවේය.
බරපතළ තත්ත්වයේ සිටි දෙදෙනෙක් ගාල්ල කරාපිටිය රෝහලට ඇතුළත් කර ඇත.
ඊයේ (19) පෙරවරු 9.30ට පමණ මෙම අනතුර සිදුව ඇති අතර මාතර සිට ඇඹිලිපිටිය බලා ධාවනය වූ පෞද්ගලික මගී ප්‍රවාහන බස් රථයක් සහ තංගල්ලේ සිට මාතර දෙසට ධාවනය වූ පෞද්ගලික මගී ප්‍රවාහන බස් රථයක් මුහුණට මුහුණ ගැටීමෙන් මෙම අනතුර සිදුව ඇති අතර එක් බස් රථයක් අසල නිවෙසේ තාප්පයේ ගැටී එහි කොටසක් ද කඩා වැටී ඇතැයි ඇතැයි ගන්දර පොලීසිය කියයි.
අනතුර සිදුවෙන අවස්ථාවේ වැස්සක් ඇදහැලෙමින් තිබී ඇති අතර අනතුරින් බස් රථ දෙකෙහිම ඉදිරිපස කොටස් කුඩු වී විනාශ වී තිබෙනු දක්නට ලැබිණි. අනතුරින් පසු එක් බස් රථයක දුමක් නගිමින් ගින්නක් හට ගැනීමට ආසන්නව තිබී ඇති අතර අසල නිවෙසේ සිටි ශ්‍රී ලංකා ගමනාගමන මණ්ඩලයේ විශ්‍රාමික ඉංජිනේරුවරයකු වූ ලැන්ටි රත්නසිරි මහතා වහාම බස් රථයේ බැටරියේ වයර ගලවා දමා සිදුවන්නටගිය විශාල අනතුරක් වළක්වාලීමට පියවර ගෙන ඇත. මාතර ජ්‍යෙෂ්ඨ පොලිස් අධිකාරි විකුම් ගිනිගේ මහතා සඳහන් කළේ අනතුරින් බස් රථවල ගමන් ගත් මගීන් හැට එක් දෙනකු තුවාල ලබා මාතර මහ රෝහලට ඇතුළත් කර ඇති බවත් ඉන් කිසිවකුටත් මාරාන්තික තුවාල නැති බව හා බස් රථ දෙකෙහි අධික වේගය නිසා මෙම අනතුර සිදුව ඇති බවට මූලික පොලිස් විමර්ශනවල දී අනාවරණය වී ඇති බවයි.
තලල්ල ග්‍රාමීය රෝහලේ ප්‍රකාශකයකු සඳහන් කළේ තුවාල ලැබූවන් මූලික ප්‍රතිකාරවලින් පසු ගිලන් රථ හතක් යොදා ගෙන මාතර මහ රෝහලට යැවීමට කටයුතු කළ බවයි.
පසුව ගන්දර පොලිස් ස්ථානාධිපති දේශබන්දු සේනාරත්න හා අපරාධ විමර්ශන ඒකකයේ ස්ථානාධිපති උප පොලිස් පරීක්ෂක සලින්ත මහත්වරු ඇතුළු ගන්දර පොලීසියේ නිලධාරීන් විසින් බැකෝ යන්ත්‍රයක් හා දොඹකර රථයක් ගෙන්වා බස් රථ දෙක මාර්ගයෙන් ඉවත්කොට ප්‍රධාන මාර්ගයේ රථවාහන ගමනාගමනයට ඉඩ පහසුකම් සලසා දීමට පියවර ගනු ලැබීය.
