බොරු චෝදනා දාලා ආණ්ඩුව අපි හිරේ දැම්මට අපේ ගමන නතර වන්නේ නැතැයි ශ්‍රී ලංකා පොදු ජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා පැවසීය.
මේ වන විට රජය දේශපාලන මර්දනයක් ක්‍රියාත්මක කිරීමට සූදානම් වන බවත් දේශපාලන දඩයමක් ගැන ආණ්ඩුවේ කතාවලින් පැහැදිලි වන බවත් හෙතෙම කීවේය.
දේශපාලන පළිගැනීම් ඉදිරිපත් කිරීම වෙනුවෙන් නව කාර්යාලයක් නෙළුම් මාවතේ පක්ෂ කාර්යාලයේදී ඊයේ (16) විවෘත කළ අවස්ථාවේ මාධ්‍යවේදීන් නඟන ලද ප්‍රශ්නවලට පිළිතුරු දෙමින් ඒ මහතා මේ අදහස් පළ කළේය.
තවදුරටත් ඒ මහතා මෙසේද පැවසීය.
ක්ලීන් ශ්‍රී ලංකා යටතේ අගමැතිවරිය බේරේ වැව බලන්න ගිහින් තිබුණා. බේරේ වැව සුද්ද කරන එක බොහොම හොඳයි. හැබැයි කොළඹ කුණු ටික බේරේ වැවට දානකල් වැව සුද්ද කරන්න බැහැ. පාර්ලිමේන්තුවේ 159 දෙනා අනුරාධපුරේ වැවකට බැස්සා වගේ බේරේ සුද්ද කරන්න බේරේ වැවට බැහැලා බැහැ. නමුත් අපේ පාක්ෂිකයන්ව අරගලය මුවාවෙන් බේරේ වැවට බැස්සුව අයට අද බේරේ වැව සුද්ද කරන්න බහින්න සිදු වෙන එක ගැන මම සතුටු වෙනවා. ඒ වගේම රාජපක්ෂලගේ ඩොලර් බිලියන 18 උගන්ඩාවේ තිබෙනව නම් ගෙනාවට කමක් නැහැ. හැබැයි නඩු හදලා පසුගිය යහපාලන ආණ්ඩුව වගේ ජනතා අප්‍රසාදය වළක්වා ගන්න කටයුතු කරනව නම් ඊට එරෙහිව අපේ වෘත්තීය සමිති හා නීතිඥ සංගමය කටයුතු කරනවා යැයි ද පැවසීය.
