“ශ්‍රී ලංකා පොදුජන පෙරමුණේ පක්ෂ නායකයෝ ගත්ත තීන්දු තීරණ නිසා අද වන විට ශ්‍රී ලංකා පොදු ජන පෙරමුණ සීසීකඩ කැඩී ගිහින්. ඒකේ නායකයන්ට අපගේ වටිනාකම තේරුම් ගියේ නැහැ. අපිට පක්ෂ මාරු කරන තැනට වැඩ කළේ අපේ පක්ෂයේ නායකයෝ.” යැයි හිටපු ඇමැති එස්. එම්. චන්ද්‍රසේන මහතා සඳහන් කළේය .
හිටපු අමාත්‍යවරයා මේ බව පැවසුවේ පෙරේදා (14) මාධ්‍ය වෙත අදහස් දක්වමිනි.
මෙහිදී වැඩිදුරටත් අදහස් දැක්වූ හිටපු අමාත්‍යවරයා මෙසේ ද පැවසීය.
“එකවර අපි පක්ෂ මාරු කළේ නෑ. අපේ පක්ෂ මාරු කරන තැනට පත් කළේ අපේ පක්ෂ නායකයෝ. ශ්‍රී ලංකා පොදුජන පෙරමුණ හදන්න අපි ගොඩක් මහන්සි වුණා. එම පක්ෂ ජයග්‍රහණය කරන්න අපි විශාල කැප කිරීමක් කළා. නමුත් පක්ෂ නායකයෝ ගත්ත තීන්දු තීරණත් එක්ක අද වන විට ශ්‍රී ලංකා පොදුජන පෙරමුණ සීසීකඩ කැඩී තියෙනවා. එම නිසා අපේ හිටපු මන්ත්‍රීවරුන්ගේ වැඩි පිරිසක් අද වනවිට එක එක පක්ෂ තෝරගෙන තමන්ගේ දේශපාලන ගමන යන්නට පසුබිම සකස් කරමින් කටයුතු කර තිබෙනවා.
වසර 30ක පමණ කාලයක් මේ රටේ මහජන නියෝජිතයෙක් ලෙස මම කටයුතු කර තිබෙනවා. ඉතින් අපිටත් දේශපාලන පක්ෂයක් අවශ්‍යයි. එනිසා මමත් හොයලා බැලුවා දේශපාලන ගමනක් යන්නට කොයි පක්ෂය ද හොඳ කියලා. ඒ නිසා සර්ව ජන බලවේගයේ පක්ෂනායක දිලිත් ජයවීර මහතා වමේ නායකයෙක් ලෙස එතුමාගේ පක්ෂය තෝර ගත්තා. ඒ වගේම එම පක්ෂයේ ප්‍රතිපත්ති මාලාවත් හොඳයි. ඒ වගේම රට පුරා ඉන්න අපගේ දේශපාලන සමකාලීනයන් ද අද මේ පක්ෂය වටා එකතු වෙලා සිටිනවා. ඒ නිසා ඉදිරියේදී පවතින පළාත් පාලන, පළාත් සභා මැතිවරණ ජයග්‍රහණය කර ගැනීම සඳහා අවශ්‍ය වැඩපිළිවෙළ විපක්ෂය තියෙන ප්‍රධාන පක්ෂයක් ලෙස සිදු කරමින් පවතිනවා.
ශ්‍රී ලංකා පොදුජන පෙරමුණේ නායකයන්ට අපගේ වටිනාකම තේරුම් නැති වුණාට සර්ව ජන බල පක්ෂ නායක ලෙස දිලිත් ජයවීර මහතා අපේ වටිනාකම් අපේ දක්ෂතා තේරුම් අරගෙන පක්ෂයට එනකොටම මට එම පක්ෂයෙන් නියෝජ්‍ය නායකකම ලබා දුන්නා.
ඒකයි අපි අගය කරන්න ඕනෑ. අපි ගැන අවබෝධයකින් එතුමලා කටයුතු කරන බව තේරෙනවා. මට භාරදී තිබෙන එම පක්ෂයේ නායකත්වයේ වගකීම නිසි ලෙස ඉටු කරනු ලබනවා.
මේ රටේ වසර 76ක පමණ කාලයක් පාලනය කළ අය කිසිදු වැඩක් කරනෑ. වංචා, දූෂණ සිදු කර තිබෙනවා යන්න ජාතික ජන බලවේගය ජනතාගත කරනු ලැබුවා. ඉතින් ජනතාව ඒ ගැන කල්පනා කරලා වැඩ කරන්න පුළුවන් අය ඉද්දී අපි මොකටද මේ අයට දෙන්නේ කියලා එකාවන්ව ඉඳගෙන පාර්ලිමේන්තු මැතිවරණයේ දී තුනෙන් දෙකක බලයක් ලබා දුන්නේ.
මැතිවරණය අවසන් වෙලා දැන් දින සීයක පමණ කාලයක් ගතවෙලා තිබෙනවා. එම දින සීය තුළ ජනතාව ගොඩක් දේවල් බලාපොරොත්තු වුණා.
අනුරාධපුර අතිරේක – අමිල ප්‍රභාත් වනසිංහ
