රටට සෞභාග්‍ය උදා කරලීම සඳහා විපක්ෂයේ උපරිම දායකත්වය ලබාදෙන ලෙස විපක්ෂ නායක සජිත් ප්‍රේමදාස මහතා අවධාරණය කරයි.
විපක්ෂ නායක සජිත් ප්‍රේමදාස මහතා මේ බව කියා සිටියේ ඊයේ (15) පාර්ලිමේන්තුවේදී සමගි ජන බලවේග හා සමගි ජන සන්ධානයේ පාර්ලිමේන්තු මන්ත්‍රීවරුන් අමතමින් අය වැය විවාදයට සහභාගී විය යුතු ආකාරය සම්බන්ධයෙන් දැනුම්වත් කරමින්ය. සෞභාග්‍ය සම්පන්න රටක් ගොඩනැඟීමට නම් නිවැරැදි ප්‍රතිපත්තීන් නිර්මාණය විය යුතු බවත් ඒ සඳහා පහළින් ඉහළට ගලා යන ජනතා අදහස්, යෝජනා, චින්තන, දර්ශන මුදුන් පත් කර ගත් ප්‍රතිපත්ති සම්පාදන ක්‍රමවේදයකට ප්‍රවේශ විය යුතු බවත් විපක්ෂ නායකවරයා පෙන්වා දෙයි.
ප්‍රතිපත්ති සම්පාදනය, ක්‍රියාත්මක කිරීම හා පසුවිපරම යන අංශ ගණනාවක් තුළින් යහපත් දේශයක් උදෙසා කාර්යභාරය ඉටු කිරීම විධිමත් කළ යුතු බවත් විපක්ෂ නායකවරයා කියා සිටියේය.
මේ සඳහා සක්‍රිය දායකත්වය, කැපවීම, වගකීමෙන් දත්ත තොරතුරු සහිත කරුණු කාරණා හා යෝජනා අවශ්‍ය බවත් එය ජනතා පිළිගැනීම හා විශ්වාසනීයත්වය තහවුරු කළ හැකි බවත් ව්‍යාජ තොරතුරු දත්ත මත දේශපාලනීකරණයට ලක්වූ වැඩපිළිවෙළක් නොවිය යුතු බවත් විපක්ෂ නායකවරයා පැවසීය.
එබැවින් සෑම මසකම පාර්ලිමේන්තුව දින 4ක් රැස් වන බවත් එම දින 4 විවාදයට ගන්නා කරුණු කාරණාවලට සක්‍රිය දායකත්වය, සහභාගීත්වය අවශ්‍ය බවත් එහිදී ප්‍රතිපත්තිමය ක්‍රියාදාමය වඩාත් ශක්තිමත් කර සහභාගීත්ව ප්‍රතිපත්ති සම්පාදනයේ පෙරගමන්කරුවන් බවට පත් විය යුතු බවත් විපක්ෂ නායක සජිත් ප්‍රේමදාස මහතා පැවසීය. සහභාගීත්ව ක්‍රියාවලිය තුළින් වඩාත් යහපත් යෝජනා හා අදහස් ඉදිරිපත් කර රටට සෞභාග්‍ය උදා කරලීම සඳහා විපක්ෂයෙන් අවශ්‍ය දායකත්වය ලබාදෙන ලෙසත් විපක්ෂ නායක සජිත් ප්‍රේමදාස මහතා තවදුරටත් පැවසීය.
රක්ෂණ ශ්‍රියන්ත
