මෙරටට පැමිණෙන දේශීය හා විදේශීය ආයෝජකයන්ගේ ආයෝජන ව්‍යාපෘති ඉක්මනින් ආරම්භ කිරීමට පහසුකම් සැලසීමේ අරමුණින් තම ආයතනයේ සේවා කටයුතු සම්පූර්ණයෙන්ම ස්වයංක්‍රීය ක්‍රියාවලියක් හරහා සැපයීමේ ඩිජිටල් වේදිකාවක් ප්‍රථම වරට හඳුන්වා දෙන බව ශ්‍රී ලංකා ආයෝජන මණ්ඩලයේ (BOI) අධ්‍යක්ෂ ජනරාල් රේණුකා වීරකෝන් මහත්මිය පැවසුවාය.
මේ ඩිජිටල් වේදිකාව ආයෝජකයන්ගේ ව්‍යාපෘති සඳහා අවශ්‍ය අනුමැතිය ලබා ගැනීමේ ක්‍රියාවලිය පහසු සහ කාර්යක්ෂම කරනු ඇත. එවැනි ක්‍රමයක් මෙතෙක් රටේ ක්‍රියාත්මක කර නැති බැවින්, ආයෝජකයන්ට අවශ්‍ය අනුමැතිය ලබා ගැනීමේ ප්‍රමාදයක් පවතින බව නිරීක්ෂණය වී ඇති අතර එපමණක් නොව එය ආයෝජකයන් අධෛර්යමත් කිරීමට හේතු වේ.
එබැවින්, පළමු අදියරේදී ඩිජිටල් වේදිකාවක් හඳුන්වාදීමට ශ්‍රී ලංකා ආයෝජන මණ්ඩලය දැනට අවශ්‍ය පියවර ගනිමින් සිටියි. දෙවන අදියර යටතේ,අනෙකුත් රාජ්‍ය ආයතන මේ ඩිජිටල් වේදිකාවට සම්බන්ධ කිරීමට පියවර ගනු ලබයි.
ඒ අනුව,මාර්ග සංවර්ධන අධිකාරිය,ජල සම්පාදන මණ්ඩලය,පරිසර අධිකාරිය,වෙරළ සංරක්ෂණ අධිකාරිය ඇතුළු ව්‍යාපෘති සඳහා අනුමැතිය ලබාදෙන සියලු ආයතන මේ ඩිජිටල් වේදිකාවට සම්බන්ධ කරනු ලැබේ.
මේ ක්‍රියාවලිය මේ වසර මැද භාගය වන විට අවසන් කිරීමට අපේක්ෂා කරන බව ඇය තවදුරටත් පැවසුවාය.
ඒ අනුව ආයෝජකයන්ට ශ්‍රී ලංකාවට පැමිණීමෙන් තොරව ලෝකයේ ඕනෑම තැනක සිට ශ්‍රී ලංකා ආයෝජන මණ්ඩලයට ආයෝජන අයැදුම්පතක් මාර්ගගතව ඉදිරිපත් කිරීමට හැකි වනු ඇත. ඊට අමතරව අයැදුම්පත්‍රයේ තත්‍ය කාලීන ක්‍රියාවලිය මාර්ගගත පද්ධතිය හරහා නිරීක්ෂණය කළ හැකිවීම සැලකිය යුතු කරුණකි.
අයැදුම්පතක් සැකසීමට ගතවන කාලය අඩු කිරීමට අමතරව මාර්ගගත ගෙවීම් ක්‍රම,මාර්ගගත අනුමත කිරීමේ ක්‍රියාවලිය සහ තවත් බොහෝ පහසුකම් ආයෝජකයන්ට ලබාදිය හැකි බව ඇය තවදුරටත් පැවසුවාය.අනුමැතියක් ලබා ගැනීමට කොපමණ කාලයක් ගතවේ දැයි විමසූ විට අනුමැතිය ලබා ගැනීමට ගතවන කාලය ව්‍යාපෘතියේ වර්ගය සහ ව්‍යාපෘතිය ක්‍රියාත්මක කිරීමට අපේක්ෂා කරන ප්‍රදේශය අනුව වෙනස් විය හැකි බව ඇය සඳහන් කළාය.
මේ නව ක්‍රියාවලිය හඳුන්වාදීමෙන් පසු, නිදහස් වෙළෙඳ කලාපයක (FTZ) ආරම්භ කිරීමට අපේක්ෂා කරන ව්‍යාපෘතියක් සඳහා මාසයක් පමණ ඇතුළත අවශ්‍ය අනුමැතිය ලබාදීමට හැකි වනු ඇතැයි ඇය අනාවැකි පළ කළාය.
ජයසිරි මුණසිංහ
