යුද්ධය නිම වී වසර 14කට පසුවත් අවතැන්වූවන් රැඳී සිටින කඳවුරු නඩත්තුවට සහ ඊට ජලය සැපයීම වෙනුවෙන් රුපියල් මිලියන 16.78ක මුදලක් නාගරික සංවර්ධන හා නිවාස අමාත්‍යාංශය දරා ඇතැයි ජාතික විගණන කාර්යාලය නිකුත් කළ වාර්තාවක දැක්වෙයි.
නාගරික සංවර්ධන හා නිවාස අමාත්‍යාංශයේ 2023 වර්ෂයට අදාළව නිකුත් කළ වාර්තාවක මේ බව සඳහන්ව තිබේ. යුද්ධයෙන් අවතැන් වීම හේතුවෙන් සුබසාධක කඳවුරුවල රැඳී සිටින පුද්ගලයන් නැවත පදිංචි කිරීම සඳහා සහ යුද්ධයෙන් අවතැන් වී යාපනය දිස්ත්‍රික්කයේ කඳවුරුවල සිටින පවුල් 971ක් වෙනුවෙන් නිවාස ලබාදීම සඳහා අමාත්‍ය මණ්ඩල අනුමැතිය ලබා දී තිබුණි.
යුද්ධය නිමාවී වසර 14ක් ගත වී තිබුණද නැවත පදිංචි කිරීමේ කටයුතු ක්‍රමවත්ව සිදුකර අවසන් කර නොතිබුණි.
මේ නිසා වර්ෂය අවසාන වන විටත් සුබසාධක කඳවුරුවල අවතැන් වූවන් රැඳී සිට තිබේ.
මෙලෙස අවතැන් වූවන් රැඳී සිටින කඳවුරු නඩත්තුව හා කඳවුරුවලට ජලය සැපයීම වෙනුවෙන් අමාත්‍යාංශයට මෙවැනි වියදමක් දැරීමට සිදුව ඇත.
රන්මලී සෝමසිරි
