රුපියල් එක්කෝටි පන්ලක්ෂයක් පමණ වටිනා ගංජා කිලෝ 35 ග්‍රෑම් 565ක් ළඟ තබාගැනීම යන චෝදනාව යටතේ මහා පරිමාණ ගංජා ව්‍යාපාරයක කොටස්කරුවකුව, මීගමුව කොට්ඨාස බුද්ධි අංශ ස්ථානාධිපති, පො.ප. සරත් මහතා ඇතුළු කණ්ඩායමක් විසින් ඒත්තුකාල ප්‍රදේශයේ දී පෙරේදා (13) අත්අඩංගුවට ගෙන ඇත. ‘ක්ලීන් ශ්‍රී ලංකා’ වැඩපිළිවෙළ යටතේ මීගමුව කොට්ඨාස භාර ජ්‍යෙෂ්ඨ පොලිස් අධිකාරි අශෝක ධර්මසේන මහතාගේ උපදෙස් පරිදි, මීගමුව කොට්ඨාස බුද්ධි අංශයට ලද තොරතුරකට අනුව මෙලෙස අත්අඩංගුවට ගෙන ඇත්තේ, කාත්තන්කුඩියේ පදිංචි 21 හැවිරිදි මොහොමද රිස්වාන් මොහොමදු අර්පත් නමැති තරුණයෙකි.
මෙම ප්‍රධාන සැකකරුට අමතරව ගංජා ව්‍යාපාරය පවත්වාගෙන යාමට කුලී පදනම යටතේ ලබා දුන් නිවෙසේ අයිතිකාරිය වන අනූෂා නිලන්ති යන කාන්තාව ද, සිද්ධියට අනුබල දුන් සැකකාරියක වශයෙන් අත්අඩංගුවට ගත් බව පොලීසිය කියයි.
මීගමුවේදී අත්අඩංගුවට ගත් ප්‍රධාන සැකකරු, මීගමුවේ පවත්වාගෙන යන හෝටල් සමූහයක අයිතිකරුවකුගේ ඥාති පුත්‍රයකු බව කියයි. ඒත්තුකාල ප්‍රදේශයේ අලුත් නිවෙසක් මසකට රුපියල් 40,000ක බදු කුලී පදනම යටතේ ගෙන මෙම ව්‍යාපාරය පවත්වාගෙන ගොස් ඇති අතර පොලීසියෙන් මෙම ස්ථානය වටලන අවස්ථාවේ, ස්ථාන කිහිපයකට බෙදාහැරීම සඳහා මෙම ගංජා පාර්සල් වශයෙන් සකස් කර තිබුණු බව ද පොලීසිය පවසයි. කොට්ඨාස බුද්ධි අංශයේ ස්ථානාධිපති පො.ප. සරත්, පොලිස් කොස්තාපල්වරුන් වන (86500) සේනාධීර, (33113) සංජීව, (34531) බණ්ඩාර, (37927) දිසානායක, (37928) වන්නිනායක යන නිලධාරීහු වැටලීමට එක්වූහ.
කොච්චිකඩේ – ඩී. මිහිඳුකුල
