පුත්තලම යුද හමුදා කඳවුර ආසන්නයේ දෙකේ කණුව ප්‍රදේශයේදී විවාහක තරුණයකුට අමානුෂික ලෙස පහර දී දස වද දුන් බව කියන තරුණ ව්‍යාපාරිකයකු ඇතුළු දෙදෙනෙක් අත්අඩංගුවට ගත් බව පුත්තලම මූලස්ථාන පොලීසිය කියයි.
මෙසේ පහර කෑමට ලක්ව ඇත්තේ ධනුෂ්ක සම්පත් නමැති 28 හැවිරිදි එක්දරු පියකු බවත්, මොහු තබ්බෝව ධීවර ගම්මානයේ පදිංචි අයකු බවත් පොලීසිය පවසයි. පහර කෑමට ලක්වූ තරුණයා සිය බිරිය සහ දරුවා සමඟ තාවකාලිකව බැරිස්ටර්පුර ප්‍රදේශයේ පදිංචිව සිටින බව ද පොලීසිය කියයි.
විවාහකයෙක් වන මේ තරුණයා ව්‍යාපාරිකයාට අයත් හෝටලයක මාස දෙකකට ආසන්න කාලයක් සේවය කරමින් සිටියදී එම ස්ථානයේ සිදු වූ විවිධ ක්‍රියාවලට එකඟ නොවීම හේතුවෙන් එයින් ඉවත්ව වෙනත් ස්ථානයක සේවයට ගොස් ඇති බව පොලීසිය සඳහන් කරයි.
ඒ සම්බන්ධයෙන් උරණව සිටි ව්‍යාපාරිකයා ඉකුත් 10 වැනිදා තරුණයාට දුරකතන ඇමතුමක් දී හෝටලයේ තීන්ත ආලේප කරගැනීමට වුවමනා බව පවසමින් පැමිණෙන ලෙස දන්වා ඇති බව කියයි.
එම ඇමතුමට අනුව එම තරුණයා හෝටලයට ගිය පසු කාමරයකට රැගෙන ගොස් දොරවල් වසා අමානුෂික ලෙස පහර දී ඇති බව පොලීසිය පවසයි. තම පුතා සේවකයකුට අමානුෂික ලෙස පහර දෙන බවට ව්‍යාපාරිකයාගේ මවුපියන්ට දැනගැනීමට ලැබීමෙන් අනතුරුව ඔවුන් මැදිහත්ව ඔහු බේරාගැනීමට පවා දැඩි වෙහෙසක් ගෙන ඇති බව සඳහන්ය.
එහිදී සැකකාර ව්‍යාපාරිකයා එම ස්ථානය තමාට අයත් ස්ථානයක් වන බැවින් එයින් පිටව යන ලෙස මවුපියන්ට බල කර තිබුණ ද ව්‍යාපාරිකයාගේ මව තරුණයාට පහර දීම වළක්වාලීමට දැඩි ප්‍රයත්නයක් දරා ඇති බව ද සඳහන්ය.
මේ පහර දීමට සම්බන්ධ නොවූ ව්‍යාපාරිකයාගේ වැඩිමල් සොහොයුරා සහ මව මෝටර් රථයක දමාගෙන පහර කෑමට ලක්ව සිටි තරුණයා තබ්බෝව නිවෙසට ගොස් දමා ඇති බව කියයි. එසේ යන අතරතුර වැඩිමල් සොහොයුරා විසින් පහර කෑමට ලක්වූ තරුණයාට පවසා ඇත්තේ තම මල්ලි පහර දුන් බව කිසිවකුටත් නොකියන ලෙසත්, එම ස්ථානයේ සිටි මල්ලිගේ මිතුරන් එක්වී මේ පහර දීම කළ බවත් පවසන ලෙසයි. මේ සම්බන්ධව පොලීසි නොයන ලෙසත්, එසේ ගියොත් කාන්තාවන්ට අතවර කිරීමක් කළ බව පවසා පොලීසියට පැමිණිලි කරන බවටත් තර්ජනය කර ඇති බව සඳහන්ය.
මේ සම්බන්ධයෙන් තරුණයා තම මව සමඟ පුත්තලම මූලස්ථාන පොලීසියට පැමිණිලි කර ප්‍රතිකාර සඳහා පුත්තලම මූලික රෝහලට ඇතුළත් වී තිබේ.
සිද්ධිය සම්බන්ධයෙන් පුත්තලම මූලස්ථාන පොලීසිය කළ විමර්ශනවලින් පසු මේ පහර දීමට සම්බන්ධ සැකකාර ව්‍යාපාරිකයා සහ ඔහුගේ මිතුරකු අත්අඩංගුවට ගෙන ඇති අතර, අනෙක් සැකකරුවන් අත්අඩංගුවට ගැනීමට නියමිත බව පොලිස් කණ්ඩායම් පැවැසූහ.
පුත්තලම අතිරේක
හිරාන් ප්‍රියංකර ජයසිංහ
