ඊශ්‍රායලය සහ හමාස් සංවිධානය අතර ගාසා තීරයේ සටන් විරාමයක් සඳහා කටාර් රාජ්‍යයේ පැවැත්වෙන සාකච්ඡා අවසන් අදියරට පැමිණ ඇතැයි විදෙස් මාධ්‍ය වාර්තා කළේය. මාස ගණනාවක් පුරා සිදු කළ උත්සාහයන් රැසකට පසුව ඊශ්‍රායල ප්‍රාණ ඇපකරුවන් නිදහස් කරගැනීමේ අවස්ථාව උදාවන ලකුණු පෙන්නුම් කර ඇතැයි ද විදෙස් මාධ්‍ය වැඩිදුරටත් වාර්තා කළේය. ඒ අනුව ඉදිරි පැය කිහිපය ඇතුළත හෝ දින කිහිපය ඇතුළත සටන් විරාම ගිවිසුම ක්‍රියාත්මක වනු ඇතැයිද වාර්තා වේ.
ගාසා යුද්ධය පැවැති මාස 15ක කාලයක් තුළ පළමුවරට ඊශ්‍රායල සහ හමාස් නියෝජිතයන් කටාර් රාජ්‍යයේ එකම ගොඩනැඟිල්ලක ස්ථාන දෙකක සිට පැය 6ක කාලයක් වක්‍රාකාරයෙන් සාකච්ඡාවට එක්වූ බව පලස්තීන නිලධාරියකු ප්‍රකාශ කර තිබේ. සටන් විරාම ගිවිසුම ක්‍රියාත්මක කිරීමට අවශ්‍ය පසුබිම නිර්මාණය වී ඇත්තේ ගාසා තීරයෙන් ඊශ්‍රායල හමුදාව ඉවත් විය යුතු බවට හමාස් සංවිධානය මීට පෙර පනවනු ලැබූ කොන්දේසිය ඉවත් කරගැනීම හේතුවෙන් බවද වාර්තා වේ. සටන් විරාම ගිවිසුමේ පළමු අදියරේ 16 වැනි දිනයේදී දෙවැනි හා තුන්වැනි අදියර සම්බන්ධයෙන් සාකච්ඡා කිරීමට ඊශ්‍රායලය සහ හමාස් සංවිධානය කැමැත්ත පළ කර ඇතැයි වාර්තා වේ.
ගාසා තීරයේ සටන්විරාම ගිවිසුම පිළිබඳ යළි සාකච්ඡා ආරම්භ කර ඇත්තේ අමෙරිකාවේ නව ජනාධිපතිවරයා ලෙස ලබන 20 වැනිදා දිවුරුම් දීමට නියමිත ඩොනල්ඩ් ට්‍රම්ප්ගේ මැදිහත්වීමෙන් බවත්, පසුගිය ඉරිදා ඔහු ඊශ්‍රායල අගමැති බෙන්ජමින් නෙතන්යාහු සහ කටාර් රාජ්‍යයේ පාලක ශේක් ටමීම් බින් හමාඩ් අල් තානි සමඟ සාකච්ඡා කිරීමේ ප්‍රතිඵලයක් ලෙස බවත් විදෙස් මාධ්‍ය වාර්තා කළේය.
නව සටන් විරාම ගිවිසුමට අනුව එය ක්‍රියාත්මක වන පළමු දිනයේදි ඊශ්‍රායල ප්‍රාණ ඇපකරුවන් තිදෙනකු නිදහස් කිරීමට හමාස් සංවිධානය එකඟතාව පළ කර ඇති අතර, එදිනම ගාසා තීරයේ ප්‍රධාන නගරවල ස්ථානගතවී සිටින ඊශ්‍රායල හමුදාව ඉවත් කරගැනීමට බෙන්ජමින් නෙතන්යාහු කැමැත්ත පළ කර ඇතැයි වාර්තා වේ. අනතුරුව තවත් දින 7කට පසු ප්‍රාණ ඇපකරුවන් සිවුදෙනකු නිදහස් කිරීමටත්, ගාසා තීරයේ දකුණු පළාතේ අවතැන්වී සිටින පලස්තීන ජාතිකයන්ට නැවත උතුරු පළාතේ පිහිටි සිය නිවාස කරා යෑමට ඊශ්‍රායලයෙන් අවසර ලැබෙනු ඇතැයි වාර්තා වේ.
මේ සටන් විරාම ගිවිසුමට අනුව ඊශ්‍රායලයේ සිරගත කර සිටින පලස්තීනුවන් දහසක් නිදහස් කිරීමට ද ඊශ්‍රායලය එකඟතාව පළ කර ඇතැයි වාර්තා වේ. ඉන් ඇතැම් පුද්ගලයන් වසර 15කට අධික සිරදඬුවම් ලැබූ අය බවද වාර්තා වේ. මේ හුවමාරුව සඳහා හමාස් සංවිධානය විසින් ඊශ්‍රායල ප්‍රාණ ඇපකරුවන් 34 දෙනකු නිදහස් කිරිමට එකඟ වී ඇතැයි ද විදෙස් මාධ්‍ය සඳහන් කළේය.
