බස්නාහිර පළාතේ, ගම්පහ දිස්ත්‍රික්කයේ නැඟෙනහිර සියනෑ කෝරළයේ, මෙගොඩපත පත්තුවේ, රදාවාන ග්‍රාමයේ, තුංමංහන්දියේ පිහිටි බප/ගම්/ මහගමසේකර මහා විද්‍යාලයට ශතවර්ෂයකටත් වඩා දිගු ඉතිහාසයක් තිබේ. සේකර පාසල් අධ්‍යාපනය ලැබුවේ මෙහි ය.
මෙම පාසල රදාවාන, ඉහළකුඹුර නැමති වෙල්යාය ඉස්මත්තේ පොල්අතු සෙවිලි කළ කටුමැටි ගැසූ තාවකාලික ගොඩනැඟිල්ලක 1872 වර්ෂයේදී ආරම්භ කරන ලදී. එය පිරිමි පාසලක් වූ අතර එහි මුල් ගුරුතුමා වූයේ සියදෝරිස් පෙරේරා මහීපාල මහතා ය. ගැහැනු පාසල රදාවාන, අම්බලම් කොටුව අසළ කුඩා ගොඩනැඟිල්ලක ආරම්භ කර ඇති අතර එහි මුල් ගුරුතුමිය මිසිනෝනා මැතිනිය යි.
වත්මන්හි මහගමසේකර මහා විද්‍යාලයේ සිසු සිසුවියන් 2000ට ආසන්න සංඛ්‍යාවක් අධ්‍යාපනය ලබයි. වත්මන් විදුහල්පති මේජර් සනත් පුෂ්පකුමාර මහතා, ‘ සේකර සමරුව’ පිළිබඳ අදහස් දක්වමින් මෙසේ පැවසී ය. “ සේකර කියන්නේ ඒ කාලෙ දීප්තිමත් ශිෂ්‍යයකුව සිටි කෙනෙක් විතරක් නෙවෙයි, අදටත්, අප අතර නැතිවුණත් රටක් ලෝකයක් බබළවපු කෙනෙක්. ඒ නම අමරණීයයි. අපේ පාසලේ තාප්පය පුරා තියෙන්නේ එතුමා වෙනුවෙන් ඇඳපු චිත්‍ර, පුස්තකාලය, සේසර මාධ්‍ය ඒකකය හා කලා උළෙල, විද්‍යාගාරය වගේ හැම දෙයක්ම, හැම වැඩසටහනක්ම අපි නම් කරලා තියෙන්නේ සේකර නමින්. කුඩා සිසුවකුව සිට දැවැන්ත චරිතයක් බවට පත්වූ මේ උතුම් මිනිසා ගැන පාසල තුළ විවිධ වැඩසටහන් කෙරෙනවා. ඒ අතර වාර්ෂිකව සිදුකෙරෙන අනුස්මරණ වැඩසටහන්වලටත් දායක වෙනවා.
අදටත් එතුමා තුළ පැවති විවිධ දක්ෂතාවන්, නිහතමානි ගුණය, අවංකත්වය, නිර්ව්‍යාජත්වය අපේ දරුදැරියන්ට ආදර්ශයක්. එතුමාගේ ගෞරවය ආරක්ෂාවන පරිදි අනාගත පරපුර නිර්මාණය කිරීම අද දවසේ අපගේ වගකීමක්”
