මේ කියන්නේ ගම්පහ පැත්තේ විහාරස්ථානයක සිදුවූ අපුරූ සිදුවීමක් ගැන කතාවකි. නව වසර උදාවට සෙත්පතා එම විහාරයේ පැවැති ආගමික උත්සවයක් සඳහා ප්‍රදේශයේ පොලිස් ස්ථානාධිපතිවරයකු ද සහභාගිවී සිටියේ ඉතාමත් සැදැහැවත් සිතින් යුතුවය. මේ ආගමික උත්සවයට පොලිස් නිලධාරීන් මෙන්ම ප්‍ර‍භූ පෙළැන්තියේ සැදැහැවතුන්ද සහභාගි වී සිටීම හේතුවෙන් ප්‍රදේශයේ පොලීසිය මඟින් අවශ්‍ය සියලු ආරක්ෂක රැකවල් යොදා තිබෙනු දක්නට ලැබුණි. පොලිස් ස්ථානාධිපතිවරයා ද මෙහි කටයුතුවලට පුද්ගලිකවම සහභාගි වී කටයුතු කරන ලද්දේ ඔහු හොඳ බොදුනුවකු නිසාවෙනි .
මෙම උත්සවයේ සර්වඥ ධාතු ප්‍රදර්ශනය ආරම්භ වූ අවස්ථාවේ ඊට වන්දනාමාන කිරීම සඳහා කතානායක ස්ථානාධිපතිවරයා ද ගියේ බැති සිත පෙරටු කොටගෙනය.
ඔහු විහාර භූමියට ඇතුළු වූයේ නිල ඇඳුමේ අංගයක් වූ සපත්තු යුගලය දොරකඩ ගලවා තබාය. වන්දනාවේ යෙදුණු ඔහු ටික වේලාවකින් එළියට පැමිණ සපත්තු යුගලය පැලඳ ගැනීමට සොයා බලද්දී ඔහුට ‘තරු“ විසි විණී.
දැන් පොලීසියේ ඕඅයිසී සර්ගේ සපත්තු යුගලය හොයන්නේ ඔහු විතරක් නොවේ, ඕඅයිසී මහත්තයාගේ සහායක නිලධාරීන්ද ඉවක් බවක් නැතිව පොලිස් සපත්තු යුගලය සොයන්නට වූහ.
පැය ගාණක් විහාරස්ථානයේ ඔබමොබ ඇවිදිමින් මේ නිලධාරීන් පොලිස් සපත්තු යුගලය සෙව්වද එය හමුවූයේ නැත.
විහාරස්ථානයට පැමිණි කිසිවකු ස්ථානාධිපතිවරයාගේ සපත්තු යුගලය සොරාගෙන ගොස් ඇති බවට සැක පහළ වුණේ ඉන් අනතුරුවය.
බොහෝ වේලාවක් විහාරස්ථානයේ රැඳී සිටීමේ බලාපොරොත්තුවෙන් පැමිණ සිටි ස්ථානාධිපතිවරයා කර කියාගත හැකි දෙයක් නොහැකිව වහාම නිල රියට ගොඩවූයේ මේස් කුට්ටම් දෙක පැලඳගෙනමය. ‘දැන් ඉතින් මොකක් කරන්නද පොලීසියට ගිහින් වෙන සපත්තු දෙකක්වත් දාගෙන ආපහු එමු “යැයි කියූ ඕඅයිසී සිය නිල රියෙන් පිටව යනු පෙනුණි.. ‘‘පොලීසියේම බඩු හොරා අරගෙන ගිහින් ඕං” මේ සිද්ධිය දුටු අවට සිටි පිරිසේ කටකාර තරුණයකු එසේ කීවේ අවට සිටි පිරිසේ මුවඟට හසරැල් එක්කරමිනි.
කොටදෙණියාව සමූහ
එම්. පුෂ්පකුමාර
