සෞඛ්‍ය වෘත්තිකයින්ට වර්තමානයේ බලපාන වෘත්තීය ගැටලුවලට කඩිනම් විසඳුම් ලබාදී ඔවුන්ට අවශ්‍ය පහසුකම් සහ රාජකාරී වටපිටාව සකසා දීම සෞඛ්‍ය අමාත්‍යාංශයේ ප්‍රමුඛ අරමුණක් බව සෞඛ්‍ය සහ ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පවසයි.
එයින් වෘත්තීය තෘප්තිමත්භාවයට පත්වන සෞඛ්‍ය වෘත්තිකයාගෙන් මෙරට ජනතාවට වඩාත් ඵලදායී, විධිමත්, කාර්යක්ෂම, ගුණාත්මක සෞඛ්‍ය සේවාවක් අඛණ්ඩව ලබා ගැනීමට හැකියාව නිරන්තරයෙන්ම ලැබෙන බව අමාත්‍යවරයා කියා සිටියි.
සෞඛ්‍ය වෘත්තිකයින් සමග පැවති සාකච්ඡාවකදී නලින්ද ජයතිස්ස අමාත්‍යවරයා මේ බව සදහන් කළේය.
ඔවුන් සමග සාකච්ඡා කර මුහුණදෙන ගැටලු පිළිබඳව විමසා බැලීමේ සහ සෞඛ්‍ය සේවාවේ ප්‍රගමනය උදෙසා වෘත්තීය සතු අදහස්, යෝජනා හා දායකත්වය ලබාගැනීම සඳහා අමාත්‍යවරයාගේ අදහසකට අනුව විශේෂ සාකච්ඡාමය වැඩසටහනක් ක්‍රියාත්මකය.
ඒ අනුව ගුණාත්මක සහ ප්‍රශස්ත සෞඛ්‍ය සේවාවක් මෙරට ජනතාවට ලබාදීම සඳහා වත්මන් රජය ගෙන යනු ලබන වැඩපිළිවෙලට සියලුම වෘත්තීය සමිතිවල සහය සෞඛ්‍ය අමාත්‍ය නලින්ද ජයතිස්ස මහතා නිබඳව අපේක්ෂා කරන බැවින් ඒ සඳහා අවශ්‍ය සහය ලබාදෙන ලෙස අමාත්‍යවරයා වෘත්තීය සමිතිවලින් ඉල්ලීමක් ද සිදුකර තිබේ.
සෞඛ්‍ය ක්ෂේත්‍රයේ සියලුම වෘත්තිකයන්, වෘත්තීන් අතර මනා අවබෝධයක් තබා ගනිමින් තම රාජකාරී වගකීම අකුරටම ඉටුකරන බවත්, ඔවුනට බලපාන ගැටලුවලට විසදුම් ලබා දීමතුළින් ද, ඔවුන් සමග අනෝන්‍ය අවබෝධයෙන් යුතුව කටයුතු කිරීම තුළින්ද වැඩවර්ජන, උද්ඝෝෂණ අවම කරගත හැකි බවද අමාත්‍යවරයා මෙහිදී වැඩිදුරටත් පෙන්වා දුන්නේය.
