ශ්‍රී ලංකා රාජ්‍ය ඖෂධ නීතිගත සංස්ථාව මඟින් මුඛ ද්‍රාවන ටෙන්ඩරයක් අසාදු ලේඛන ගත සමාගමකට ප්‍රදානය කර ඇති බවට මාධ්‍ය මඟින් පළවූ පුවත අසත්‍ය බව ශ්‍රී ලංකා රාජ්‍ය ඖෂධ නීතිගත සංස්ථාවේ සභාපති වෛද්‍ය මනුජ් ක්‍රිශාන්ත වීරසිංහ මහතා සඳහන් කරයි.
එම ඇණවුම වෛද්‍ය සැපයුම් අංශය සිදු කරන ලද ඇණවුමක් බවත් මෙම ටේන්ඩරය ප්‍රදානය කර ඇත්තේ ඖෂධ නියාමන අධිකාරියේ ලියාපදිංචි සහතිකය සහිත අවම මිල ඉදිරිපත් කළ ලංසුකරුට බවද කියා සිටී.
එමෙන්ම මෙම ටේන්ඩරය සඳහා සහභාගී වූ ලංසුකරු ඖෂධ නියාමන අධිකාරියේ ලියාපදිංචි සැපයුම්කරුවකු වන අතර රාජ්‍ය ඖෂධ සංස්ථාව වෙත ගෙවීම් පැහැර හැරීම මත අධ්‍යක්ෂ මණ්ඩලය 2024-10-29 වන දින ගනු දෙනු පැහැර හරින ලද සැපයුම්කරුවකු ලෙස තීරණය කර ඇත.
ප්‍රසම්පාදන කමිටුව එම සැපයුම්කරු වෙත ටෙන්ඩරය ප්‍රදානය කිරීමට තීරණය කර තිබුණද නැවත කරන ලද පසු විපරම් ක්‍රියාවලියේදී මෙම සැපයුම්කරු අධ්‍යක්ෂ මණ්ඩලය ගෙවීම් පැහැර හරින ලද සැපයහුම්කරුවකු බව හඳුනාගෙන එම ටේන්ඩර් මණ්ඩලය විසින්ම එය අවලංගු කොට තිබුණු බවද සඳහන් කරයි.
එසේම මෙම ටෙන්ඩරය නැවතත් ඉදිරිපත්ව තිබු අනෙක් ලංසුකරුවන් අතරින් සුදුසු ලංසුකරුවකු තෝරා ගැනීම සඳහා අවශ්‍ය පියවර ගෙන අවසන් කොට තිබුණු බවද කියා සිටී.
මාධ්‍ය මඟින් මෙම ටේන්ඩරය සම්බන්ධ තොරතුරු ප්‍රකාශයට පත් වන විටත් ඉහත ක්‍රියාවලිය අවසන් කොට තිබූ බව ශ්‍රී ලංකා රාජ්‍ය ඖෂධ නීතිගත සංස්ථාව පවසයි.
එබැවින් අසත්‍ය තොරතුරු මාධ්‍ය මගින් ප්‍රකාශ කිරීම සම්බන්ධයෙන් ශ්‍රී ලංකා රාජ්‍ය ඖෂධ සංස්ථාව අප්‍රසාදය පළ කර සිටින අතර ඉදිරියේදි නීතිමය පියවර ගැනීමට කටයුතු කරන බවද වැඩිදුරටත් සඳහන් කරයි.
