කොළඹ තර්ස්ටන් විද්‍යාලයේ 75 වැනි සංවත්සරය නිමිත්තෙන් ‘තර්ස්ටන් තීර්ථය’ පාසල් නිල පුවත්පත සහ අන්තර්ජාල ඊ පුවත්පත එළිදැක්වීම පසුගියදා (10) ලේක්හවුස් පරිශ්‍රයේදී උත්සවාකාරයෙන් සිදු කෙරිණි. 
අංකුර මාධ්‍යවේදීන් සොයා දිවයින පුරා පාසල්වල නිල පුවත්පත් අරඹමින් ලංකාවේ සීමාසහිත එක්සත් ප්‍රවෘත්ති පත්‍ර සමාගම (ලේක්හවුස් ආයතනය) විසින් අරඹන ලද ‘විදු පියස’ පාසල් නිල පුවත්පත් සහ අන්තර්ජාල ඊ පුවත්පත් වැඩසටහනෙහි තවත් එක් සුවිශේෂී එළිදැක්වීමක් ලෙස මෙය හැඳින්විය හැකිය.
එහිදී අදහස් දැක්වූ ලේක්හවුස් ආයතනයේ කර්තෘ මණ්ඩල අධ්‍යක්ෂ සිසිර යාපා මහතා මෙලෙස ද පැවසීය.
“අපට ඒ කාලයේ නොලැබුණු මේ වටිනා අවස්ථාව පිළිබඳ බොහෝම ආදරණීය ඊරිෂියාවක්, නිහතමානී ආඩම්බරයක් තියෙනවා. පුවත්පතට ලිපි ලියූ මේ දරුවන් තව අවුරුදු 10කින් 15කින් ලේක්හවුස් ආයතනයේ කර්තෘ මණ්ඩල අධ්‍යක්ෂ වෙන්නත් පුළුවන්. ඊට ප්‍රථම මා ඔබෙන් ඉල්ලීමක් කරනවා. ලියපු අකුරු තොගයක් මල්ලක දාගෙන ලේක්හවුස් එකට ලියන්න එන්න. “දිනමිණ, සිළුමිණ, තිනකරන්, වාරමංජරී, මිහිර, සරසවිය, බුදුසරණ, සුබසෙත, ඩේලිනිවුස්, සන්ඩේ ඔබ්සර්වර්” විතරක් නෙවෙයි නව මාධ්‍ය ඒකකයත් ඔබ එනතුරු බලා සිටිනවා. අලුත් මිනිසුන්ට මේ ඉඩ විවර කරන්නේ නැතිනම් මෙය පැරැන්නන්ගේ ලෝකයක් බවට පත් වෙනවා. එම නිසා අධ්‍යාපන වැඩ කටයුතුත් සිදු කරන ගමන්ම එයට බාධාවක් නොවන අයුරින් මේ මාර්ගය තෝරා ගන්න.”
තර්ස්ටන් විද්‍යාලයේ විදුහල්පති ප්‍රමුදිත වික්‍රමසිංහ මහතා,
“විද්‍යාලයේ 75 වැනි සංවත්සරය නිමිත්තෙන් පුවත්පතක් එළිදැක්වීමේ වැඩසටහනින් මට අවශ්‍ය වූයේ පුවත්පතක් පමණක් නෙවෙයි, මේ හරහා පරම්පරාවක් නිර්මාණය කිරීමටයි. ඒ වෙනුවෙන් පාසල් සංවර්ධන සමිතිය මෙහි මූල්‍ය බර කරට ගෙන අනුග්‍රාහක භවතුන් සම්බන්ධීකරණය කළා. පුවත්පත සඳහා සම්බන්ධ වූ දරුවන් අනාගතයේදී මාධ්‍ය ක්ෂේත්‍රයේ දැවැන්තයන් වනු නොඅනුමානයි. මේ පුවත්පත මට කෝටියක් වටිනවා.”
ලේක්හවුස් මූල්‍ය අධ්‍යක්ෂ චන්න කෙවිටියගල, මෙහෙයුම් අධ්‍යක්ෂ චාමර පීරිස්, සාමාන්‍යාධිකාරි සුමිත් කොතලාවල, තර්ස්ටන් විද්‍යාලයේ නියෝජ්‍ය විදුහල්පතිවරුන් සහ පාසල් සංවර්ධන සමිතියේ ලේකම්, ආදි ශිෂ්‍ය සංගමයේ ජ්‍යෙෂ්ඨ උප සභාපති, ලේක්හවුස් රාජ්‍ය සබඳතා ප්‍රධානි ඇතුළු ගුරුවරු ද, තර්ස්ටන් විද්‍යාලයීය ප්‍රධාන ශිෂ්‍ය නායක සහ සිසුහු පිරිසක් ද මේ අවස්ථාවට එක්ව සිටියහ.
කෞශල්‍යා සඳමාලි
ඡායාරූප – රංජිත් අසංක සහ චින්තක කුමාරසිංහ චමත්ක අංගෙකුඹුර, ගවිරු සසේන් (තර්ස්ටන් විද්‍යාලය)
