නවසීලන්ත කණ්ඩායම සමඟ ඔක්ලන්ඩ්හිදී පැවති තෙවැනි එක්දින තරගයෙන් ලකුණු 140ක විශිෂ්ට ජයක් හිමි කර ගැනීමට ශ්‍රී ලංකා කණ්ඩායම සමත් විය.
ශ්‍රී ලංකා පිල නවසීලන්තයේදී එක්දින තරගයක් ජය ගත්තේ වසර 10කට පසුව වීම විශේෂත්වයක් වුවත් දෙපිල අතර, තරග 3කින් සමන්විත තරගාවලියේ මුල් තරග දෙක ජය ගැනීම හේතුවෙන් 2-1ක් ලෙස තරගාවලියේ ජය හිමි කර ගැනීමට නවසීලන්තයට හැකි විය.
තරගයේ පළමුව පන්දුවට පහර දෙමින් ශ්‍රී ලංකා පිල දුන් ලකුණු 291ක ඉලක්කය හමුවේ නවසීලන්තයට ගත හැකි වූයේ ඕවර 29.4කදී සියල්ලන් දැවී ලකුණු 150ක් පමණි.
ශ්‍රී ලංකා පිල අවසන් වරට 2015 වසරේ දෙසැම්බර් 1 වැනිදා නවසීලන්තයේදී ඔවුන්ට එරෙහිව එක්දින තරගයක් ජය ගෙන තිබිණි.
ශ්‍රී ලංකා පන්දු යවන්නන් හමුවේ නවසීලන්ත මුල් කඩුලු 5 ලකුණු 21ක් තුළ බිඳ වැටුණු අතර, හුදෙකලා සටනක නිරත වූ මාක් චැප්මන් ලකුණු 81ක් ඉනිමට එක් කළේය. පන්දු යැවීමේදී අසිත ප්‍රනාන්දු, මහීෂ් තීක්ෂණ සහ ඒෂාන් මාලිංග කඩුලු 3 බැගින් දවාගත් අතර, අසිත තරගයේ වීරයා ලෙස නම් කෙරිණි.
පළමුව පන්දුවට පහර දුන් ශ්‍රී ලංකා පිල වෙනුවෙන් පැතුම් නිස්සංක (66), කුසල් මෙන්ඩිස් (54) සහ ජනිත් ලියනගේ (53) අර්ධ ශතක රැස් කළ අතර, කමිඳු මෙන්ඩිස් ලකුණු 46ක් ඉනිමට එක් කළේය. පන්දු 31කින් ලකුණු 50ක් රැස් කර සිටියදී ආබාධයකට ලක්වීමෙන් පිටියෙන් ඉවත් වූ පැතුම් යළි 5 වැනි කඩුල්ලට පිටියට පිවිස ලකුණු 16ක් ඉනිමට එක් කර ගත්තේය. පන්දු යැවීමේදී මැට් හෙන්රි කඩුලු 4ක් දවා ගත්තේය.
ශ්‍රී ලංකාව – 290/8 (ඕවර 50) පැතුම් නිස්සංක 66, කුසල් මෙන්ඩිස් 54, ජනිත් ලියනගේ 53, කමිඳු මෙන්ඩිස් 46 (මැට් හෙන්රි 55/4, මිචෙල් සැන්ට්නර් 55/2)
නවසීලන්තය – 150 (ඕවර 29.4) මාක් චැප්මන් 81 (අසිත ප්‍රනාන්දු 26/3, මහීෂ් තීක්ෂණ 35/3, ඒෂාන් මාලිංග 35/3)
