‘ස්විට්සර්ලන්තයේ ජිනීවා බෞද්ධ විහාරයේ හා හෝකන්දර ශ්‍රී විජයානන්ද ධර්මායතනයේ ප්‍රධාන, ජිනීවා ශික්ෂණ රෝහල්හි හා බන්ධනාගාර බෞද්ධ උපදේශක, ජිනීවා අන්තර් ආගමික සංසදයේ ආරම්භක සාමාජික’ ආචාර්ය තවලම ධම්මික නාහිමි
නව වසර උදාවත් සමඟ අපට ලැබෙන පළමු පුර පසළොස්වක පොහෝ දිනය අදයි. සිද්ධාර්ථ ගෞතමයන් වහන්සේ බුදු බවට පත්ව නව මසකින් සිදු වූ බුදු රදුන්ගේ පළමු ලංකාගමනය, උරුවෙල් දනව්වේ ජටිල දමනය, ලක්දිව ප්‍රථම වරට ත්‍රිපිටකය ග්‍රන්ථාරූඪ කිරීම වැනි සුවිශේෂ ඓතිහාසික සිදුවීම් රැසක් සිදු වූ මේ දවස සකල ලෝකවාසි බෞද්ධයන් හට අතිශය පූජනීය දිනයකි.
මේ උතුම් දිනයෙහි සමස්ත ශ්‍රී ලංකාවාසීන්ගේම අවධානයට ලක් විය යුතු, අප හැම දෙනාටම බෙහෙවින් ඵලදායි වන දහම් කරුණු හතරක් සච්ච විභංග හා සතිපට්ඨාන සූත්‍ර ඇසුරෙන් මෙසේ ඔබට සිහිපත් කරමු.
පසුගිය වසර පුරා, අප කරගෙන ආ සියලු හොඳ කටයුතු, පින් ලෙස හෝ කුසල් ලෙස සම්මතව ඇති, සමාජයට සුභදායක වන හැම දෙයක්ම තවදුරටත් කරගෙන යෑම අපට නව වසරේ පැවරෙන පළමු වගකීම හා යුතුකමයි.
මෙය පුංචිම හොඳ දෙයක සිට තමන් කර ඇති ඕනෑම ආකාරයක කුසලකර්මයක් දක්වාම ක්‍රමානුකූලව පුහුණුවක යෙදිය හැකිය. එසේ වූ කල අවබෝධයෙන්, යෝනිසෝමනසිකාරයෙන් අප හැමට මේ උදාර කටයුත්ත ක්‍රියාවට නැංවිය හැකිය.
දෙවැනි වගකීම වන්නේ මෙතෙක් අපට විවිධ හේතු නිසා කරගන්නට නොහැකි වූ අලුත් හොඳ දේ, නුවණින් විමසා බලා සිදු කරන්නට උත්සුක වීමයි. මේ කාර්යයද පුංචි පින්කම්වලින් ආරම්භ කර, තම තම නැණ පමණින්, තම හැකියාවන්ට අනුකූලව සිදු කිරීමට අප සමත් විය යුතුමය.
තුන්වැනි කාරණය වන්නේ අප වැරදි හෝ අකුසල් සේ සම්මත ක්‍රියාවක පසුගිය වසරේ යෙදුණේ නම්, නව වසරේදී සද්භාවයෙන් යුතුව ඒවායින් මිදීමට අප්‍රමාදිව ක්‍රියා කිරීමයි. නිවැරදි සමාජ හිතකාමි සත්පුරුෂ චරිතයක් අධිෂ්ඨාන පූර්වකව ගොඩනංවා ගැනීමට එය අපට මඟ පාදයි.
සිවුවැනි උපදේශාත්මක ආරාධනය වන්නේ අපේම අනාගත ජීවිතවලට බෙහෙවින් බලපාන අගනා ධර්ම කරුණකි. විවිධ පරාසවල විවිධ වගකීම්, යුතුකම් ඉටු කරමින් ගත කරන ජීවිතයකදී සිතා හෝ නොසිතා අප අතින් වැරදි හෝ අකුසල් සිදු වීමට ඕනෑ තරම් ඉඩ ප්‍රස්තා ඇත. එබඳු ඉඩ ප්‍රස්තා අනාගතය ගැන සිතමින් ඇති නොවීමට වගබලා ගැනීම මේ වසරේ අපට අයිති අනාගතවාදි අවසන් යුතුකම හා වගකීමයි. මේ ධර්ම කරුණු අපේ ජීවිතවලට සම්බන්ධ කර ගැනීමට විවිධ ආකාරයෙන් උත්සාහ ගත යුතු බව මේ සූත්‍ර දෙකෙහිම අවධාරණය කරමින් අපට උගන්වන අයුරු බෙහෙවින් සිත්ගන්නාසුලුය; වචන මාලාවකින් ඒ වෙනුවෙන් අප ධෛර්යවත් කරන ආකාරය ආහ්ලාදජනකය:
‘ඡන්දං ජනේති වායමති විරියං ආරභථ. චිත්තං පග්ගණ්හාති. පදහති.’
ඒ සඳහා කැමැත්ත ඇති කර ගැනීම පළමුව කළ යුතුය. ඒ සමඟම ඒ වෙනුවෙන් වීර්යය ඇති කර ගැනීමට නිබඳ උත්සාහයක නිරත විය යුතුය. ඒ අරමුණු කොට සිත ශක්තිමත් කරගත යුතුය. ඒ තුළම සිත පවත්වා ගැනීමට උත්සුක විය යුතුය.
ඔබ හැම බුද්ධිමත්ව මේ අනගි ප්‍රතිපදාවෙහි අවබෝධයෙන්ම හැසිරීමට මේ උතුම් පොහොය දිනයේ පමණක් නොව, නව වසර පුරාම අප අවංකව කටයුතු කළ යුතු නොවේද?
මේ ධර්මාවවාද ජීවිතයට ළං කර ගනිමින්, භෞතික ජීවිතය මෙන්ම ආධ්‍යාත්මික ජීවිතයද දිට්ඨධම්මවේදනීය වශයෙන්ම සාර්ථක කර ගන්නා ලෙස අද වැනි උතුම් දිනක සැමට සිහිපත් කරමු.
තෙරුවන් සරණයි !
