එතෙර මෙතෙර වෙළෙඳාමේ නියුතු සියලු දෙනාට රජයේ ආයතනවල අනුමැතීන් ලබා ගැනීම ඇතුළු සියලු සේවා ජාතික තනි කවුළු (Single Window) සේවාවක් ලබාදීමට රජය පියවර ගෙන තිබේ.
මේ තුළින් එතෙර මෙතෙර වෙළෙඳාම කාර්යක්ෂම වීමට සෘජුවම බලපාන බව මුදල් හා ක්‍රමසම්පාදන නියෝජ්‍ය ඇමැති ආචාර්ය හර්ෂණ සූරියප්පෙරුම මහතා ප්‍රකාශ කළේය. ආනයන සහ අපනයන දේශීය අපනයනකරුවන් සඳහා සහ දේශීය කර්මාන්තවලට අවශ්‍ය අමුද්‍රව්‍ය ආනයනකරුවන් වෙත අවශ්‍ය සේවා සම්බන්ධයෙන් කාර්යක්ෂම ආකාරයෙන් පහසුකම් සැලසීම සහතික කිරීම පිණිස, රජය විසින් ජාතික තනි කවුළු (Single Window) හඳුන්වා දී තිබේ.
මේ සම්බන්ධයෙන් මෙතෙක් සිදුකර ඇති කටයුතුවල ප්‍රගතිය සම්බන්ධයෙන් වූ කරුණු හුවමාරු කර ගැනීමට වාණිජ මණ්ඩල 05ක නියෝජිතයන් සමඟ මුදල් නියෝජ්‍ය අමාත්‍යවරයා පසුගිය දා සාකච්ඡාවකද නිරත විය.
ලංකා වාණිජ මණ්ඩලය, ජාතික වාණිජ මණ්ඩලය, අපනයනකරුවන්ගේ ජාතික මණ්ඩලය, වාණිජ සහ කර්මාන්ත මණ්ඩල සම්මේලනය සහ ජාත්‍යන්තර වාණිජ මණ්ඩලය යන මණ්ඩලවල නියෝජිතයෝ මේ සඳහා සහභාගි වී සිටියහ.
