මහනුවර හන්තාන වත්තේ ඇති දිරාගිය හා වැටුණු ගස් කපා ඉවත් කිරීම සඳහා ජාතික වතු සංවර්ධන මණ්ඩලය මඟින් මෙයට මාස හයකට ඉහත දී ලබාදුන් අවසරයක් අවභාවිත කරමින් ඉවත් නොකළ යුතු මට්ටමේ පවතින ගස් 104ක් කපා දැමීම සම්බන්ධයෙන් සිදුකළ විමර්ශනයකින් පසු හන්තාන වත්තේ වතු අධිකාරිවරයාගේ සහ සහකාර වතු අධිකාරිවරයාගේ සේවය වහාම ක්‍රියාත්මක වන පරිදි අත්හිටුවා ඇත.
සේවය අත්හිටුවීමෙන් පසු වතු අධිකාරිවරයා තමන් සේවයෙන් ඉවත් වන බව දන්වමින් ජාතික වතු සංවර්ධන මණ්ඩලයට ලිපියක් යොමු කර තිබේ.
කපා දැමූ ගස්වල වටිනාකම තක්සේරු කිරීමෙන් පසු ඊට අදාළ මුදල ගෙවීමට තමන් සූදානම් බව වතු අධිකාරිවරයා දැනුම් දී ඇතැයි ජනතා වතු සංවර්ධන මණ්ඩලයේ සභාපති නීතිඥ ජයන්ත තිලකරත්න මහතා කීය.
දිරාගිය සහ අවදානම් ගස් 411ක් කපා ඉවත් කිරීම සඳහා මෙයට මාස හයකට ඉහත දී අවසර ලබා දී තිබෙන බවත් ඒ අනුව මාස තුනක් ඇතුළත එම ගස් කපා ඉවත් කළ යුතු බවත් කී සභාපතිවරයා එම කාලය තුළ අදාළ කාර්යය ඉටුකළ නොහැකි වුවහොත් නැවත කාලය දීර්ඝ කර ගැනීමක් සිදුකර ගත යුතු බව ද අවධාරණය කළේය.
අදාළ කාලය පසුවීමෙන් අනතුරුව කාලය දීර්ඝ කර ගැනීමකින් තොරව හොඳ තත්ත්වයේ පවතින ගස් කපා ඉවත් කරන බවට ලද පැමිණිලි කිහිපයක් සම්බන්ධයෙන් තමන් විමර්ශනයක් ආරම්භ කළ බවත් ඒ අනුව විමර්ශන කණ්ඩායම් දෙකක් හන්තාන වත්තට යවා පරීක්ෂණ සිදුකළ බවත් කී තිලකරත්න මහතා එම වාර්තා අනුව අමතර ගස් 104ක් කපා ඉවත් කර තිබෙන බව තහවුරු වූයේ යැයි පැවසුවේය.
හන්තාන රක්ෂිත සීමාවේ ගස් කිහිපයක් ද ඉවත් කර තිබෙන බවත් සිද්ධිය සම්බන්ධයෙන් තලාතුඔය පොලීසියට පැමිණිල්ලක් ඉදිරිපත් කර විමර්ශන සිදු කෙරෙන බවත් ඒ මහතා කීය.
හන්තාන වතු අධිකාරිවරයා සම්බන්ධයෙන් තවත් පැමිණිලි කිහිපයක් ලැබී තිබෙන බවත් ඒ සම්බන්ධයෙන් ද විමර්ශන සිදු කෙරෙන බවත් සභාපතිවරයා පැවසුවේය.
ජනතා වතු සංවර්ධන මණ්ඩලය මෙම ගස් කපා ඉවත් කිරීමේ ටෙන්ඩරය ලබා දී ඇත්තේ හන්තාන කළමනාකරණ කමිටුවේ නිර්දේශය ලබා ගැනීමකින් තොරව බවත් ඒ සම්බන්ධයෙන් ද පරීක්ෂණයක් සිදුකළ යුතු බවත් හන්තාන සුරැකීමේ සංවිධානයේ සභාපති අමිත් සේනානායක මහතා කීය.
ගස් ඉවත් කිරීමේ ටෙන්ඩරය පසුගිය වසරේ ජූනි මස රුපියල් ලක්ෂ 14කට ලබා දී තිබෙන බවත් ටෙන්ඩරයට අනුව ගස් ඉවත් කිරීම ආරම්භ කර තිබෙන්නේ එම වසරේ සැප්තැම්බර් මස 27 දින බවත් සේනානායක මහතා පැවසුවේය.
පරිසර ආරක්ෂිත කලාපයේ හොඳ තත්ත්වයේ පවතින ගස් කිසිදු විමසීමකින් තොරව මොවුන් කපා ඉවත් කර තිබෙන බවත් වතු අධිකාරිවරයා සහ සහකාර වතු අධිකාරිවරයාට අමතරව මෙයට වගකිවයුතු තවත් පිරිසක් සිටින බවත් ඒ මහතා කීය.
සිද්ධිය සම්බන්ධ‍ෙයන් මහනුවර පොලීසිය මඟින් ද පරීක්ණයක් ආරම්භ කර තිබේ.
