පසුගිය වසරේ (2024) යල කන්නයට අදාළ වගා හානි වන්දි ගෙවීම්වලින් 90%ක් මේ වන විට අවසන් කර ඇතැයි කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි මහතා ප්‍රකාශ කරයි.
අනුරාධපුරය, ගාල්ල, ගම්පහ, හම්බන්තොට, මාතර, මොනරාගල, කුරුණෑගල, රත්නපුරය, කළුතර, ත්‍රිකුණාමලය, අම්පාර, කොළඹ, මාතලේ, මහව, මනම්පිටිය, මුලතිව්, තඹුත්තේගම, දෙහිඅත්තකණ්ඩිය, නුවරඑළිය, පුත්තලම, මන්නාරම, මහනුවර, ඇඹිලිපිටිය සහ වවුනියාව දිස්ත්‍රික්කයන්හි වගා හානි වූ ගොවීන්ට වගා හානි වන්දි ගෙවීම මේ වන විට සිදු කර ඇතැයිද ඒ මහතා අවධාරණය කරයි.
යල කන්නයේ වගා හානි වන්දි සඳහා ගොවීන් 6459 දෙනකු ඉල්ලුම් කර තිබූ අතර ඔවුන්ගේ වගා හානි සිදුවූ අක්කර 5246 වෙනුවෙන් රුපියල් මිලියන 100ක් නිදහස් කර ඇත.
එම වන්දි මුදල් නිර්දේශිත වූ ගොවීන්ට හිමි වන්දි මුදල ඔවුන්ගේ ගිණුම්වලට බැර කර තිබේ.
පොලොන්නරුව සහ බදුල්ල
දිස්ත්‍රික්කයන්හි ගොවීන් වෙත යල කන්නයේ වගා හානි ගෙවීමට නියමිතය.
වගා හානි නිර්දේශිත වී තිබුණ ද වන්දි මුදල් ගිණුම්ගත වී නොමැති ගොවීන් වේ නම් ඒ පිළිබඳ අභියාවනා කිරීමට ඔවුන්ට හැකි බව කෘෂිකාර්මික හා ගොවිජන රක්ෂණ මණ්ඩලයේ සභාපති
පේමසිරි ජාසිංආරච්චි මහතා දැනුම් දෙයි.
යල කන්නයේ පැවති ගංවතුර, නියඟය සහ වල් අලි උවදුරු සඳහා වගා හානි වන්දි හිමිවන අතර රජය මේ වෙනුවෙන් රුපියල් බිලියනයක් වෙන් කර ඇත. යල කන්නයේ වගා හානි වූ දිස්ත්‍රික්කවල, මෙතෙක් වන්දි නොගෙවූ ගොවීන්ගේ වන්දි මුදල් කඩිනමින් නිදහස් කිරීමටද කටයුතු යොදා තිබෙන බව සභාපතිවරයා පවසයි.
