පසුගිය වසරේදී (2024) වරාය වෙත පැමිණි සංචාරක නෞකා ප්‍රමාණවත් වර්ධනයක් පෙන්නුම් කර තිබෙන බව හම්බන්තොට ජාත්‍යන්තර වරාය (HIP) පවසයි.
එම පැමිණීම්හි සැලකිය යුතු වෙනසක් සනිටුහන් කර තිබෙන අතර, ඉන්දියානු උප මහද්වීපයෙන් පැමිණෙන සංචාරක නෞකා අඩු වීමක් දක්නට ලැබුණ ද යුරෝපයේ සිට වරායට පැමිණෙන නෞකා සැලකිය යුතු ලෙස ඉහළ යෑමක් සිදුව තිබෙන බව හම්බන්තොට ජාත්‍යන්තර වරාය පවසයි. 2024දී වරාය වෙත පැමිණි මගී නැව් 23න් 17ක් යුරෝපයෙන් වන අතර, ඉන්දියාවෙන් පැමිණ ඇත්තේ නෞකා 6ක් පමණක් බව ද එම වරාය කියයි.
විශිෂ්ට සංචාරක ගමනාන්තයක් ලෙස වරාය ක්‍රමක්‍රමයෙන් ලබා ඇති ප්‍රසිද්ධිය දෙසැම්බර් මාසයේ එහි පැමිණි නෞකා තුන තවදුරටත් ඉස්මතු කර තිබෙන අතර, දෙසැම්බර් මස මුලදී ෆ්ලොරිඩාවේ මයාමිහි පිහිටි අසමාරා සමූහයට අයත් ‘අසමාරා පර්සුයිට්’ නෞකාව හම්බන්තොට ජාත්‍යන්තර වරායට සිය මංගල සංචාරය සිදු කර ඇත.
මින් පෙර අසමාරා සමූහයේ සාමාජික නෞකා වන ‘අසමාරා ක්වෙස්ට්’ සහ ‘අසමාරා ජර්නි’ පිළිවෙළින් 2023 මැයි සහ නොවැම්බර් මාසවල දී ද, ‘අසමාරා ඔන්වර්ඩ්’ අප්‍රේල් මාසයේදී ද හම්බන්තොට ජාත්‍යන්තර වරාය විසින් පිළිගෙන ඇත. සංචාරය නිම වීමෙන් අනතුරුව ‘අසමාරා පර්සුයිට්’ නෞකාව සිය ඊළඟ ගමනාන්තය වන තායිලන්තයේ පුකට් බලා පිටත් විය. 2024 තුළ වරාය වෙත පැමිණි සංචාරක නෞකා 10ක් සඳහා පහසුකම් සැලසීමේ විශිෂ්ට කාර්යභාරය ඉටු කර ඇත්තේ අසමාරා නැව් සමූහයෙහි දේශීය නියෝජිතයන් වන පෘඩෙන්ෂල් නැව් සමාගමයි.
වසර අවසානයේදී පැමිණි අනෙක් සංචාරක නෞකා දෙක වූයේ ‘සෙලිබ්රිටි මිලෙනියම්’ සහ ‘සිල්වර් විස්පර්’ය. ‘සෙලිබ්රිටි මිලෙනියම්’ පෘඩෙන්ෂල් නැව් සමාගම විසින් හසුරුවන අතර, ‘සිල්වර් විස්පර්’ නෞකාවේ ඒජන්තවරුන් වන්නේ වරායේ තවත් ප්‍රධාන හවුල්කරුවකු වන කලම්බු ෂිපින් සමාගමයි. දෙසැම්බර් මස 13 වැනි දින HIP හි නැංගුරම් ලෑ මේ නෞකා යුවළ වරායේ කාර්යබහුල සහ සාර්ථක සංචාරක නෞකා දින දර්ශනය සම්පූර්ණ කරමින් සිය මීළඟ ගමනාන්ත සඳහා පිටත් විය.
වසරේ ක්‍රියාකරණය පිළිබඳ අදහස් දැක්වූ හම්බන්තොට ජාත්‍යන්තර වරාය සමූහයේ (HIPG) ප්‍රධාන විධායක නිලධාරී විල්සන් ක්ව් මහතා මෙලෙස පැවැසුවේය.
“සංචාරක කර්මාන්තයේ පුළුල් වීමත් සමඟ හම්බන්තොට ජාත්‍යන්තර වරාය වැනි විවිධත්වයෙන් පූර්ණ, අද්විතීය ගමනාන්ත කෙරෙහි නව උනන්දුවක් ඇති වී තිබෙනවා. සුපුරුදු මාර්ගවලින් එපිට සංස්කෘතියෙන් සහ සොබාදහමින් පොහොසත් අලංකාර ගමනාන්ත කෙරෙහි සංචාරක යාත්‍රා වැඩි උනන්දුවක් දක්වන බව අපට පෙනී ගොස් තිබෙනවා. 2024 තුළදී යුරෝපීය සංචාරක නෞකා වැඩි සංඛ්‍යාවක් දකුණු ආසියාවට පිවිසීම මෙයට වැදගත් සාක්ෂියක්. මේ වසරේදී මෙය තවදුරටත් වර්ධනය වනු ඇතැයි අපේක්ෂා කරනවා.”
