එක්සත් ජාතික පක්ෂ මහ ලේකම්වරිය ලෙස නුදුරු දිනෙක වැඩ භාර ගැනීමට නියමිත තලතා අතුකෝරළ මහත්මිය පසුගිය කාලය තුළ එක්සත් ජාතික පක්ෂය සහ සමගි ජන බලවේගය නැවත එකඟතාවකට පත්විය යුතු බවට ප්‍රසිද්ධියේ යෝජනා කළ චරිතයකි. ඉතිහාසයේ අවස්ථා ගණනාවකදී මෙරට ආණ්ඩු බලය හෙබවූ ප්‍රධානම ජාතික දේශපාලක කඳවුරක් වූ එජාපය, පසුගිය කාලය තුළ ඉතාමත් පහළ අඩියකට පත්වූ අතර ඒ තැනට එජාපය පත්වූයේ ඇයි, නැවත පක්ෂය ගොඩනැඟීමට කටයුතු කිරීමට ඇති සැලසුම් මොනවාද යන්න පිළිබඳව හිටපු පාර්ලිමේන්තු මන්ත්‍රී නීතිඥ තලතා අතුකෝරළ මහත්මිය සමඟ කළ සාකච්ඡාවකි.
එක්සත් ජාතික පක්ෂය කියන්නේ කලක් විශාල ඡන්ද පදනමක් තිබූ දේශපාලන පක්ෂයක්. එහෙත්, අද වනවිට එක්සත් ජාතික පක්ෂය කුඩා දේශපාලන පක්ෂයක් බවට පත්ව තිබෙනවා. එසේ කඩා වැටුණු එක්සත් ජාතික පක්ෂය නැවත ගොඩනැඟීමට ගෙන තිබෙන පියවර මොනවාද?
“එක්සත් ජාතික පක්ෂය කියන්නේ අවුරුදු හැත්තැ හයකට වඩා අතීතයක් තිබෙන දේශපාලන පක්ෂයක්. ඒ දේශපාලන පක්ෂය අතීතය තුළ ලොකු කාර්යභාරයක් ඉටු කර තිබෙනවා. මහාමාන්‍ය ඩී. එස්. සේනානායක මහතාගේ සිට රනිල් වික්‍රමසිංහ මහතා දක්වා ජාතික වශයෙන් ඉටු කළ සේවාවන් තිබෙනවා. උදාහරණයක් විදිහට ගනිමු සේනානායකවරුන්ගේ ගොවි ජනපද ව්‍යාපාරය, ජයවර්ධන යුගයේ මහවැලි ව්‍යාපාරය රටට සිදු කළ ජාතික මෙහෙවර ඉතාමත් විශාලයි. රණසිංහ ප්‍රේමදාස මහතා උදාගම් සංකල්පය මඟින් රටට ලොකු සේවාවක් ඉටු කරනු ලැබුවා. ඒත් එක්සත් ජාතික පක්ෂය ඉටු කළ මේ ඉතිහාසගත මෙහෙවර වර්තමාන පරම්පරාව දන්නේ නැහැ. එදා සිටි පැරණි පරම්පරාව අද නැහැ. අලුත් පරම්පරාව, අපි රටට කළ සේවය ගැන දැනුම්වත් වෙලා නැහැ. ඒ තත්ත්වය නිසා තමයි අපට මැතිවරණවලින් පරාජය වීමට සිදු වුණේ. සමාජය තුළ ලොකු මතයක් හැදුණා අවුරුදු හැත්තෑ හයක සාපය කියලා. ඒ අදහස නව මාධ්‍ය හරහා තරුණ පරම්පරාවට කාවැදුණා. ඒ අදහස සමාජය වෙත අරන් ගියේ ජාතික ජන බලවේගය විසිනුයි. 2021 වෙද්දි ඔවුන් තමන්ගේ මේ දේශපාලන ප්‍රචාරක ව්‍යාපෘතිය ආරම්භ කළා. ඒත්, අපට විපක්ෂය විදිහට අපට ඒ විදිහේ ප්‍රචාරක ව්‍යාපාරයක් ආරම්භ කරන්න බැරි වුණා. ඒ නිසා තමයි එක්සත් ජාතික පක්ෂය මේ තරම් පහළට වැටුණේ.”
එක්සත් ජාතික පක්ෂය නැවත නඟාසිටුවීම සඳහා ඔබ පක්ෂයේ නව සැලසුම කුමක්ද?
“අනිවාර්යයෙන්ම අපි නැවත ප්‍රතිසංවිධානය විය යුතුයි. ඒ සඳහා වැඩසටහන ගම් මට්ටමෙන් ආරම්භ කිරීම කළ යුතුයි. ගමෙන් පටන් ගන්නා මෙම වැඩසටහනක් මඟින් අපට හැකියාව ලැබෙනවා එක්සත් ජාතික පක්ෂය නැවත ප්‍රතිසංවිධානය කිරීමට. ඒකට මූලිකව කළ යුතු දේ වන්නේ එක්සත් ජාතික පක්ෂය දශක හතක් තුළ ඉටු කළ සේවය ගැන, ජාතික මෙහෙවර පිළිබඳව ජනතාවට අවබෝධයක් ලබා දිය යුතුයි. පාක්ෂිකයන් ශක්තිමත් කළ යුතුයි. එසේ කිරීමෙන් අපට හැකියාව ලැබෙනවා එක්සත් ජාතික පක්ෂය ශක්තිමත් කරමින් නැවත ගම් මට්ටමේ සිට එජාපය ඉදිරියට ගෙන ඒමට. මොකද එක්සත් ජාතික පක්ෂයට එදා සිට ගම් මට්ටමේ විශාල ශක්තියක් තිබුණා අප නැවතත් ඒ ශක්තිමත් එජාපයක් ගොඩනැඟිය යුතුයි. එය තමයි අපේ අරමුණ බවට පත්ව තිබෙන්නේ.”
එජාප – සමගි ජන බලවේග එකමුතුව ගැන අද ඔබේ අදහස කුමක්ද ?
“එදා සිට මම විශ්වාස කළා සමගි ජන බලවේගය සහ එක්සත් ජාතික පක්ෂය මොනයම් ක්‍රමයකට හෝ එක් පක්ෂයක් විදිහට, එක් කණ්ඩායමක් විදිහට කටයුතු කළ යුතුයි කියලා. ජනාධිපතිවරණයේදී මම උත්සාහ කළේ එවැනි සමගියකින් අපේ කඳවුර ජයග්‍රහණය කරවීමටයි. ඒත්, එදා ඒ උත්සාහය අපතේ ගියා. මම අදත් උත්සාහ කරනවා, ප්‍රාර්ථනා කරනවා, මේ පක්ෂ දෙක නැවත එක දේශපාලන කණ්ඩායමක් බවට පත් කිරීමට. එමඟින් අපිට මුලින් ප්‍රබල විපක්ෂයකුත් පසුව ආණ්ඩුවක් අත්පත් කර ගැනීමටත් පැහැදිලි අවස්ථාවක් තිබෙනවා. අනෙක එක්සත් ජාතික පක්ෂයට සහ සමගි ජන බලවේගයට වෙනස් දේශපාලනයක් කරන්න තරම් හේතුවක් නැහැ. අපේ පක්ෂ දෙකේම ප්‍රතිපත්ති ඉතාමත් සමීපයි. ගම් මට්ටමෙන් ගත්තත් අපේ පාක්ෂිකයෝ සහ සමගි පාක්ෂිකයෝ ගොඩක් සමීප පිරිසක්. ඒ නිසා මේ අවස්ථාවේ දි රටට ප්‍රබල විපක්ෂ භූමිකාවක් අවශ්‍ය වෙනවා. ඒ සඳහා මූලික වශයෙන් අපේ පක්ෂ දෙක එකට එක්ව කටයුතු කිරීම සිදු විය යුතුයි.”
ඒ කියන්නේ රනිල් – සජිත් සන්ධානයක් ද ?
මම පුද්ගලයෝ මූලිකව කතා කරන්නේ නැහැ. අපි දෙපාර්ශ්වයටම පුළුවන් යම් එකඟතාවට එන්න. ඒකයි වෙන්න ඕනෑ. ඒ එකඟතාව කුමක්ද, ඒ එකඟතාව ඇති කරගත හැක්කේ කොහොමද, මොන විදිහට ද කියන එක සාකච්ඡා මාර්ගයෙන් විසඳාගත යුතුයි. සිදු විය යුත්තේ එකමුතුවක් ඇති වීම පමණයි.”
ජාතික ජන බලවේග ආණ්ඩුව බලයට පත් වී තෙමසක් ඉක්මවා ගොස් තිබෙනවා. ඒ කාලය තුළ ආණ්ඩුව සිදු කළ කාර්ය ප්‍රමාණය පිළිබඳව ඔබේ අදහස මොකක්ද ?
“ඇත්තෙන්ම අපි දේශපාලන වශයෙන් කුහක විය යුතු නැහැ. ජනපතිට සහ ආණ්ඩුවට බලය ලැබුණේ අවුරුදු පහකට. ඔවුනට අවුරුදු පහක වැඩපිළිවෙළක්, ප්‍රතිපත්ති මාලාවක් තිබෙනවා. ඔවුන් ඒ දේ අවුරුදු පහක් තුළ ඉටු කළ යුතුයි. එහෙම නොවුණොත් ලබන ජාතික මැතිවරණයේදී ජනතාව නිසි තීන්දුවක් ගනීවි. ඇත්තෙන්ම මාස තුනකින් ලොකු වැඩපිළිවෙළක් ලොකු කාර්යභාරයක් ඉටු කරන්න කාලයක් නැහැ. ඒ තත්ත්වය අප තේරුම් ගන්න ඕනෑ. යම් කාලයක් තිබිය යුතුයි කියලා.
ඒත්, අද ආණ්ඩු බලය දරන ජාතික ජන බලවේගය කණ්ඩායම මේ තත්ත්වය තේරුම් ගෙන කටයුතු කළේ නැහැ. හැමදාම ආණ්ඩුවක් බලයට පැමිණි දා සිටම උත්සාහ කළේ විවිධ ඉල්ලීම් ඉදිරිපත් කරමින් ඒ ආණ්ඩු අපහසුතාවට පත් කිරීමටයි. එදා දවසකට වැඩ වර්ජන, උද්ඝෝෂණ කීයක් තිබුණ ද, ඒත් අද ඒ උද්ඝෝෂණ කෝ? උද්ඝෝෂණ නැත්තේ රටේ කිසිම ගැටලුවක් නැති නිසා ද නැහැනේ. ඒ උද්ඝෝෂණවලට නායකත්වය දුන් අය අද ආණ්ඩු පක්ෂයට පත්ව සිටින නිසයි. ඒත් අපි එහෙම කරන්නේ නැහැ. ආණ්ඩුවට යම් කිසි කාලයක් ලබා දෙනවා තමන්ගේ වැඩ ටික කරන්න. ඒ කාර්යය නිසි ලෙස ඉටු නොකළොත් අප අවශ්‍ය දේශපාලන ප්‍රති විරෝධය පළ කරනු ලබනවා.”
රනිල් වික්‍රමසිංහ මහතා ගනු ලැබූ ආර්ථික ප්‍රතිපත්තිය සහ වර්තමාන ආණ්ඩුව අනුගමනය කරනු ලබන ආර්ථික ප්‍රතිපත්තිය අතර වෙනසක් ඔබ දකිනවා ද ?
“රනිල් වික්‍රමසිංහ මහතා භාර ගත්තේ සම්පූර්ණයෙන්ම කඩා වැටුණු රටක්. ආහාර ගෙනෙන්න සල්ලි නැති, තෙල් නැව් හැරී යන කඩා වැටුණු රටක් තමයි රනිල් වික්‍රමසිංහ භාර ගත්තේ. වෙනත් විදිහකට කියනවා නම් රනිල් ගිනි ගොඩක් මැදට පැනලා රට බේරා ගත්තේ ඔහු ඉතාමත් නිවැරැදි ආර්ථික ප්‍රතිපත්තියක් අනුගමනය කර ප්‍රශ්නය කළමනාකරණය කළා, අලුත් ආණ්ඩුවට භාර වුණේ සාමාන්‍ය තත්ත්වයට පත් වූ රටක්. ඒ නිසා ඔවුනට පහසුවෙන් රට ඉදිරියට ගෙන යන්න පුළුවන්. ඒත් මේ ආණ්ඩුව, රනිල් වික්‍රමසිංහ මහතාගේ ආර්ථික ප්‍රතිපත්තිය අකුරක් නෑර අනුගමනය කිරීම තමයි සිදුවන්නේ. එදා රනිල් වික්‍රමසිංහ මහතා අනුගමනය කළ ප්‍රතිපත්ති නිවැරැදි එකක්.”
ඒත් රනිල් වික්‍රමසිංහ මහතාට එල්ල වූ චෝදනාවක් වූයේ රනිල් , රාජපක්ෂවරු රකින බවයි’ ඒ තත්ත්වය තුළ තමයි රනිල් වික්‍රමසිංහ මහතා වෙත ප්‍රබල විරෝධයක් මතුව ආවේ ?
“ඒ කතාව වැරදියි. රනිල් වික්‍රමසිංහ මහතා කිසිවකු රැක්කේ නැහැ. ඔහු ඒ අවස්ථාවේ රට වෙනුවෙන් ඉටු කළ යුතු යුතුකම තමයි ඉටු කළේ. මම එදා පාර්ලිමේන්තු මන්ත්‍රීවරයකු විදිහට පාර්ලිමේන්තුවේ පැවති ජනාධිපති පත් කිරීමේ ඡන්දයේදී ඡන්දය දුන්නෙ ඔහුට විරුද්ධව ඩලස් අලහප්පෙරුමට. රනිල්ට පාර්ලිමේන්තුවේදී ඡන්දය නොදුන් කෙනෙකු විදිහටයි මම ඇත්ත තත්ත්වය සඳහන් කළේ. රනිල් වික්‍රමසිංහ මහතා සාධනීය වෙනස්කම් රැසක් කළා. මම සාම්ප්‍රදායික තේ ගොවියෙක්. එදා රනිල් වික්‍රමසිංහ මහතා බලයට එද්දි තේ පොහොර මිටියක් රුපියල් විසිහත්දහසක් වුණා. අද වෙද්දි මිල රුපියල් නව දහස් පන්සියයක් විතරයි. ගොවියා වෙනුවෙන් කළ ඒ වෙනස වුණත් ලොකු දෙයක්.”
ජාතික ජන බලවේගයේ පළමු ඡන්ද පොරොන්දුවක් බවට පත්ව තිබෙන්නේ හොරු ඇල්ලීම, දූෂණය පිටුදැකීම’ ඇත්තෙන්ම මේ දේවල් රටක විය යුතු දේවල් නේද ?
“අනිවාර්යයෙන්ම හොරු ඉන්නවා නම් හොරු ඇල්ලිය යුතුයි. මාත් යහපාලන ආණ්ඩුවේ අධිකරණ ඇමැතිවරිය විදිහට වැඩ කළා. ඒ කාලෙත් අපි හොරකම පිටුදකින්න වැඩ කළා. මේ ආණ්ඩුවත් ආවේ හොරු ඇල්ලීම මූලික කරගෙන. ඒකට කාටවත් විරුද්ධ වෙන්න බැහැ. ඒත් හොරු කියලා කටින් කියලා වැඩක් නැහැ. කළ හොරකම් මොනවාද කියලා නීතිය ඉදිරියේ ඔප්පු කළ යුතුයි. කෙනෙකු රිමාන්ඩ් බන්ධනාගාරගත කරලා සති දෙකෙන් නැතිනම් මාසයෙන් ඇප ලබා ගෙන එළියට එනවා නම්, ඒක වැඩක් නැහැ. ඒ නිසා හොරු අල්ලන වැඩේ හරියට නීතියානුකූලව කළොත්, නීතිය ඉදිරියේ වැරැදිකරුවන් කළ හැකියි.
උදිත ගුණවර්ධන
ඡායාරූපය – කැළුම් ලියනගේ
