පාර්ලිමේන්තුවේදී තම අදහස් දැක්වීමට විපක්ෂය කාලය වෙන් නොකරන්නේ නම් නිකන් උඩ බලාගෙන සිටීමට යාපනයේ සිට පාර්ලිමේන්තු පැමිණීමේ තේරුමක් නැති බව පාර්ලිමේන්තු මන්ත්‍රී අර්චුනා රාමනාදන් මහතා පැවසීය.
පාර්ලිමේන්තුවේදී ඊයේ (07) අදහස් දක්වමින් මන්ත්‍රීවරයා පැවසුවේ මේ සම්බන්ධයෙන් වරප්‍රසාද ප්‍රශ්නයක් මතු කළ ද මෙතෙක් ඊට විසඳුමක් නැති බවයි.
‘දෙසැම්බර් 18 වැනිදා මම මගේ පාර්ලිමේන්තු වරප්‍රසාද සම්බන්ධ සිදුවීමක් මතු කළා. කථානායකතුමනි, ඔබතුමාට ලිපියක් දුන්නා. මට කතා කරන්න වෙලාව වෙන් කරන්නේ නැහැ. අද ජනවාරි 07 වැනිදා. විපක්ෂ නායකතුමාට ඔබතුමාලා ලිපියක් යවා තිබෙනවා. නමුත් මට තවමත් කතා කරන්න වෙලාව වෙන් කරන්නේ නැහැ. අදත් වෙලාව වෙන් කර නැහැ. මම පාර්ලිමේන්තු එන්නේ යාපනයේ සිට. කතා කරන්න වෙලාව වෙන් කරන්නේ නැත්තම් මම පාර්ලිමේන්තු ඇවිත් වැඩක් නැහැ. නිකන් උඩ බලාගෙන ඉඳලා යන්න පාර්ලිමේන්තු ඇවිත් වැඩක් නැහැ. පාර්ලිමේන්තුව ඇතුළේ කතා කරන්න විපක්ෂය මඟින් අපට වෙලාව වෙන් කරන්නේ නැත්තම් අපි කොහොමද එක රටක් විදිහට ඉදිරියට යන්නේ යැයි” ද හෙතෙම මෙහිදී පැවසුවේය.
මන්ත්‍රීවරයාගේ ගැටලුව සම්බන්ධයෙන් සොයා බැලීමට කමිටුවක් පත් කිරීමට තීරණය කර ඇති බැවින් එම කමිටුව ඉදිරිපත් කරන වාර්තාව අනුව කටයුතු කරන බව කථානායක වෛද්‍ය ජගත් වික්‍රමරත්න මහතා මේ සම්බන්ධයෙන් අදහස් දක්වමින් කීවේය.
ස්වර්ණා විජේකෝන්, සන්ධ්‍යා කරුණාරත්න
