ළමයින් 300ට අඩු පාසල්වල ‘අස්වැසුම’ නොලබන පවුල්වල ළමයින්ටත් ළමා සංවර්ධන මධ්‍යස්ථාන සහ පිරිවෙන්වල ඉගෙනුම ලබන ගිහි පැවිදි සිසුන්ටත් රුපියල් 6000 ලිපිද්‍රව්‍ය දීමනාව වවුචර මඟින් දීමට කැබිනට් අනුමැතිය හිමිව තිබේ.
ඒ අනුව 2025 නව පාසල් වාරය ආරම්භයේදීම ලබා දීමේ අවශ්‍යතාව සැලකිල්ලට ගනිමින් දිවයින පුරා පිහිටි මුළු පාසල් 10,096 අතුරින් ළමයින් 300ට වඩා අඩු පාසල් 6576ක අස්වැසුම ප්‍රතිලාභී නොවන පවුල්වල සියලු ළමයින්ට මෙම දීමනාව දෙන බව කැබිනට් ප්‍රකාශක, ඇමැති, වෛද්‍ය නලින්ද ජයතිස්ස මහතා පැවසීය.
රජයේ ප්‍රවෘත්ති දෙපාර්තමේන්තුවේ ඊයේ (07) පැවති කැබිනට් තීරණ දැනුම් දීමේ මාධ්‍ය හමුවේදී ඇමැතිවරයා මේ බව සඳහන් කළේය. අධ්‍යපන, උසස් අධ්‍යාපන සහ වෘත්තීය අධ්‍යාපන ඇමැතිවරයා ලෙස අගමැති, ආචාර්ය හරිනි අමරසූරිය මෙණෙවිය ඉදිරිපත් කළ යෝජනාවට අනුමැතිය හිමි වූ බව ඇමැතිවරයා කියා සිටියේය.
අස්වැසුම ප්‍රතිලාභී පවුල්වල පාසල් ළමයින් සඳහා ලිපිද්‍රව්‍ය ගැනීමට රුපියල් 6000ක් බැගින් වන දීමනාව මේ වන විටත් එම පවුල්වල බැංකු ගිණුම හරහා දීමට පියවර ගෙන ඇති බව ඒ මහතා කීවේය.
අස්වැසුම ප්‍රතිලාභී පවුල්වලට අයත් නොවන මවුපියන් අහිමි ළමයින්, මව හෝ පියා ආබාධිත පවුල්වල ළමයින්, ළමා නිවාසගත පාසල් වයසේ සිටින සියලු ළමයින් සහ විශේෂ හේතු මත අසරණභාවයට පත්ව ඇති කාණ්ඩවලට අයත් ළමයින් සඳහා එම දීමනාව දීමට අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය වෙත පවරනු ලැබ ඇති බව හෙතෙම සඳහන් කළේය.
එම කාණ්ඩයන්ට අයත් පවුල්වල ළමයින් තෝරා ගැනීමට යාවත්කාලීන දත්ත පද්ධතියක් දැනට නැති වීම සහ යෝජිත ලිපිද්‍රව්‍ය 2025 නව පාසල් වාරය ආරම්භයේදීම ලබා දීමේ අවශ්‍යතාව සැලකිල්ලට ගනිමින් මෙය ක්‍රියාත්මක කරන බව ඇමැතිවරයා වැඩිදුරටත් පැවසීය.
නුවන් කොඩිකාර
