Skift Research’s 2025 Travel Outlook වාර්තාව පවසන්නේ 2025දී සංචාරය සඳහා ලෝකවාසීන්ගේ උනන්දුව ඉහළ ගොස් ඇති බවයි. සංචාරක සමාගම් 2024ට සාපේක්ෂව ඉදිරි වසර සඳහා සැලසුම් කරන සංචාර සංඛ්‍යාවේ 24%ක වැඩිවීමක් අපේක්ෂා කරන බවයි. ගෝලීය වශයෙන්, දිගු සතිඅන්ත සංචාර සඳහා ජනප්‍රිය තේරීම බවට පත්වී තිබිණි. ස්කිෆ්ට්ගේ වාර්තාව 2025 අනුව එම තත්ත්වය වෙනස් වී “දිගු නිවාඩු ගතකිරීමේ වසර” ලෙස හඳුන්වා දී තිබේ. මෙම තත්ත්වය චීනය, ඉන්දියාව සහ ජර්මනියේ සංචාරකයන් වෙතින් වැඩි වශයෙන් දක්නට ලැබෙන බව සමීක්ෂණයෙන් හෙළිවී තිබේ. එක්සත් ජනපදයේ, ප්‍රතිචාර දැක්වූවන්ගෙන් හතරෙන් එකක් කියා සිටියේ මෙම වසරේ දී දිගු ජාත්‍යන්තර හෝ මහාද්වීපික සංචාර අපේක්ෂා කරන බවයි.
“සංචාරකයන් තමන් එහි ගොස් ඇති බව පැවසීම සඳහා තදබදයක් ඇති සංචාරක ස්ථාන හෝ ප්‍රසිද්ධ හෝටල්වල ඡායාරූප ගැනීම සඳහා උමතුවෙන් පසුවූ කාලය දැන් අවසන් වෙලා” යනුවෙන් සුඛෝපභෝගී සංචාරක සමාගමක් වන Craft Travel හි නිර්මාතෘ ජූලියා කාටර් පැවසුවේ” දැන් සංචාරකයන් වැඩි වැඩියෙන් තෝරාගන්නේ සංචාරය කිරීමේදී ගමනාන්තයක් සැබවින්ම ජීවමාන වන්නේ සැලකිය යුතු කාලයක් රැඳී සිටීමෙන් පමණක් බවයි.”
තවත් ඉහළ මට්ටමේ සංචාරක සැලසුම් සමාගමක් වන Zicasso හි සුඛෝපභෝගී සංචාරක වාර්තාවට අනුව පැවසෙන්නේ සුඛෝපභෝගී සංචාර බොහොමයක් සති දෙකකට ආසන්න සංචාර කාල සීමාවක් දක්වා විහිදෙන බවයි. එම සමාගමේ නිර්මාතෘ සහ ප්‍රධාන විධායක නිලධාරි බ්‍රයන් ටැන් මාධ්‍ය වෙත පවසා ඇත්තේ “දින 13 – 14 දක්වා සැලසුම් කරන සංචාර අඛණ්ඩව වැඩිවීමක් දක්නට ලැබෙන බවයි. එසේම ඇතැම් සංචාරකයන් තනි ගමනාන්තයක් හෝ ඇතැම් ස්ථාන තනිවම භුක්ති විඳීම සඳහා ඇනවුම් කිරීමේ ප්‍රවණතාවක් ඇති බවයි. එහිදී ඔවුන්ට සංස්කෘතියක් වඩාත් ගැඹුරින් ගවේෂණය කළ හැකි බව පිළිබඳ අවධානය යොමුකර තිබෙනවා. රටවල් කීපයක සංචාරය කරනු වෙනුවට චාරිකා කාලසීමාව වැඩිකරමින් සෙමෙන් ගමනෙහි නිරතවීමට වැඩිදෙනෙකුගේ කැමැත්තක් ඇතිවී තිබෙනවා. මෙම වාර්තාව සඳහන් කරන්නේ ප්‍රතිචාර දැක්වූවන්ගෙන් 76.2% කට වැඩි දෙනෙක් 2025 සඳහා තනි රටක සංචාරවලට කැමැත්තක් දක්වා ඇති බවයි.
බුද්ධිකා බ්‍රාහ්මණගේ
