අනුරාධපුර තලාව බිඳුන්කඩ ගම්මැද්දේ පාරේ සුදෝ සුදුවන් ධජ පතාක, ශෝකය පළ කළ බැනර් ආදියෙන් වෙනස්ව තිබුණේ අවාසනාවන්ත ලෙසින් ජීවිතයෙන් සමුගත් අහිංසක මල් කැකුළක් සහ ඇගේ මවත් නිසාවෙනි. දෙදරු මවක වන තිස්නව හැවිරිදි නිරෝෂණි මංජුලා විජේසිංහ සහ ඇගේ සිඟිති දියණිය ගිහන්සා දම්සදී මෙසේ අවාසනාවන්ත ලෙසින් මරණයට පත්වූයේ මේ මව සිය සිරුරටත්, දියණීගේ සිරුරටත් කිසියම් ඉන්ධන ද්‍ර‍ව්‍යයක් හලා ගිනි තබාගෙනය. නිරෝෂණි ගමේ කාන්තා සමිතියේ භාණ්ඩාගාරික තනතුර හෙබවූවාය. එහි සංවත්සර මහා සභාව ඉකුත් දෙසැම්බර් මස 22 වැනි ඉරිදා දින පැවැත්වූ බව සඳහන් වේ. එහිදී නිරෝෂණි සතුව පැවැති සමිතියේ මුදල් නිසි ලෙස තුලනය කොට පියවීමට නොහැකි වීම පිළිබද චෝදනාවකට ඇයට ලක්වන්නට සිදුව ඇත්තේ දෛවෝපගත සිද්ධියක් ලෙසින්ය. විවිධ දොස්, අපවාද මැද එදින සමිතිවාරය නිමා වුවද මේ පුවත ගම පුරා මොහොතින් මොහොත ඇවිළී යන්නට විය. ඉන් නිරෝෂණිට ඇතිවූ ලජ්ජාව සහ මානසික බිඳවැටීම කිසිවකු දැන සිටියේ නැත.
තමා සතු රත්තරන් බඩුවක් උගසට තබා ගත් මුදල් මඟින් සමිතියේ මුදලින් කොටසක් පියවීමට ඇය සමත් වුවද ගැටලුව ඉන් නිමා වූයේ නැත.
ඉකුත් දෙසැම්බර් 31 වැනිදා උදාවූයේ ඒ අතරේය. පොද වැහි වැටෙද්දීම පෙදරේරුවකු වූ නිරෝෂණිගේ සැමියා වැස්ස නොතකා රැකියාව සඳහා පිටත්ව ගොස් තිබිණි. දහතුන් වියැති වැඩිමහල් දියණිය ද යාබද නිවසකට ගොස් තිබුණේ දෛවය කළ සැලසුමක් පරිද්දෙනි. වයස අවුරුදු දෙකකුත් මාස නවයක් වූ ගිහන්සා දහම්දී සිගිති දියණිය සිදුවන්නට යන්නේ කවරක්දැයි නොදැන නොකිලිටි සිනහවෙන්ම මව ළඟ දැවටුණාය.
තීරණාත්මක මොහොත එළැඹී ඇත්තේ ඉන් අනතුරුවය. එතෙක් සඟවාගෙන සිටි ඉන්ධන බෝතලය උරයකට දමා ගත් ඇය කුඩා දියණිය ද උකුලේ හොවාගෙන ගෙවත්ත පහළට ගොස් ඇත්තේ කිසිවක් කිසිවකුට නොහැඟෙන අන්දමිනි. ඇය යනු දුටු අසල්වැසියකු කොහේ යන්නේ ද යනුවෙන් ඇසූ පැනයට ඇගේ පිළිතුර වී ඇත්තේ පොල් අහුලන්නට යන බවය. එහෙත් දින කිහිපයක් තිස්සේ නොසන්සුන් සිතුවිලි සමඟ පොරබැදූ ඈ කාටත් රහසේ තීන්දුවක් ගෙන තිබිණි. කාලය සෙමින් ගෙවී ගියේය. අනතුරුව නි‍ෙවසට පැමිණි වැඩිමහල් දියණිය මව සහ නැගණිය පිළිබඳව විමසිලිමත් වී ඇත්තේ ඒ අතරේය.
තවත් මිනිත්තු කිහිපයකින් සිඟිති නැඟණිය මර ළතෝනි දෙන හඬින් ඇය වික්ෂිප්ත වූවාය. යාබද නිවැසියන්ද සමඟ විමසිලිමත් වූ විට දැක ඇති දසුනින් ඔවුනගේ නෙත් අදහාගත නොහැකිව තිබේ. මුළු ලෝකයම එක මොහොතකදී නැවතුණාක් මෙනි.
ඒ වන විට සියල්ලක් සිදුවී හමාරය. ගිනි දලු මැද දැවෙමින් සිටි මව සහ දරුවා වහා රෝහල්ගත කිරීමට අසල්වාසීන් කටයුතු කොට ඇත්තේ ඉන් අනතුරුවය. නිරෝෂණි සිය කුඩා දියණියට ඉන්ධනයක් වත් කොට ගිනි තබා ඇයද දිවි හානි කර ගන්නට ඇතැයි යන්න මේ වන විට අනුමාන වශයෙන් පොලීසිය සැක පළ කරයි. කලකට ඉහතදී ඇගේ නිවෙස ආසන්නයේ පිහිටි නෙලුබෑව ඇඟලුම් කම්හලේ ද නිරෝෂණි සේවයේ නිරතව සිට ඇති බව ගැමියෝ පවසති.
නිරෝෂණි මංජුලා විජේසිංහ සහ ඇගේ දියණිය පළමුව ශ්‍රාවස්තිපුර, නෙලුබෑව රෝහලට ඇතුළත් කිරීමෙන් අනතුරුව වැඩිදුර ප්‍රතිකාර සදහා අනුරාධපුර ශික්ෂණ රෝහලට ඇතුළත් කර තිබේ, එහිදී දෙදෙනාම මිය ගොස් තිබේ. නිරෝෂණිගේ සැමියා තලාව පොලිසියට කරන ලද පැමිණිල්ලකට අනුව පොලිස් විමර්ශන ආරම්භ වී තිබේ. තලාව පොලිස් ස්ථානාධිපති, එල්.එම්.එම්.එන්. ලංසකාර මහතාගේ උපදෙස් පරිදි පොලිස් විමර්ශන ක්‍රියාත්මක වේ.
නිරෝෂණීගේ සිතුවිලි නිවැරැදිව කියවීමට හැකි සමතකු සිටියේ නම් මෙවැන්නක් සිදුවන්නට ඉඩ නොතිබූ බව ගම්වාසීහු පැවසූහ.
ජීවින ගැටලු සහ අපේක්ෂාභංගත්වය කළමනාකරණය කර ගැනීම පිළිබඳ සමාජ කථිකාවක් නොපමාව ආරම්භ කළ යුතුව ඇති බව නිරෝෂණි මෙරට සමාජයට පණිවිඩයක් ලබා දී තිබේ.
